Bamenda khua ah Pope: ‘Ralkap asiloah ramkhel hlawknak caah biaknak a hmangmi hna caah mi ngaihchia taktak an si’
Cameroon ram Bamenda khua ah daihnak ca i tonnak an ngeih lio ah, Pope Leo XIV nih “raltuknak nawl pe tu bawi” hna nih “hrawh awkah caan tawite lawng an rau, sihlanhsehlaw, sak ṭhan nak ah nunchung hmanh in a za lo” tiah ngandamnak le nunnak caah bawmhnak a chuah duh loin daihnak a cohlang duh lo mi, hriamnam caah billion tampi a hman mi hna kha ralrinnak a pek hna.
Cameroon ram ah chikhat daihnak a um lio te ah, Pope Leo XIV cu Bamenda khua – Cameroon ram thlanglei ah a ummi Mirang holh a hmangmi khuapi ah a kal.
Vanlawngbual ah khuachung nawlngeitu hna he tonnak an ngeih hnu ah, Pope cu Bamenda Archdiocese ṭhutnak a simi St. Joseph Biakinn ah a kal. Cuka ahcun, Bamenda khuami hna he daihnak caah tonnak an ngei hna. Bawipa Thisa hmai ah thlacamnak caan tlawmpal a ngeih hnu ah, Pope le Archbishop Andrew Nkea Fuanya cu cathedral biakinn chungah an lut.
Hika hmun in daihnak thanh ding
Mipi hna tonmi tehte khannak hna a ngeih hna hnu ah, Pope Leo nih amah zong mipi he lungthin khat te a si nak, cun mipi sinah Pathian cu a um zungzal ko tiah a zumhnak kha a langhter ve.
Archbishop Fuanya nih Prophet Isaiah bia chungin a chimmi hna kha ruah ṭhan in Pope nih: “Tlang cungah daihnak a thanhtu lamkaltu hna ke cu zeitluk in dah aa dawh!” (Is 52:7) tiin a biahram a thawk. Bamendan khuami hna ke dawhnak cungah mi puar hrang hna nih zei rello in an tuah mi“leidip cung ah thisen in khat hmanhsehlaw a rum mi vawlei, theipar ṭha in a khat mi ram” a si ko tiah a ti hna.
An ke nih harnak an ton ko nain lamhlapi ah a kalpi hna i, hi zatlangbu cu “ṭhatnak lam ah an um peng.” Pope Leo nih khuapi ah an kan don caah a lunglawmhnak bia a chim. “Zeicahtiah,” tiah a chim,
Pope Leo nih “a hmaan: daihnak thanh awkah ka ra” tiah a ti. Sihmanhsehlaw, nanmah Bamenda khuami hna nih keimah sinah daihnak thawngpang nan thanh deuh tiah a ti.
“Ralbawi” pawl nih “hrawhnak caah caan tawite lawng a rau, sihmahsehlaw sak ṭhannak caah nunchung vialte hmanh in a zaat kho lo” tiah a ti. Cun Pope nih nawlngei tu hna kha ngandamnak, fimcawnnak le remh khuaram nunnak remh ṭhanknak caah a herhmi thilri hna le mipi harsatnak an ton mi hna kha mitcaw bangin hmuh khawh loin an um” tiah a ngaihchiatnak a chim.
Remdaihnak cu serchuahmi thil a si lo. Kan innpa kha kan unau bantuk kan farnu bantukin kan cohlan thiam hna tik lawngah daihnak taktak cu hmuh khawhmi a si tiah a chim. Chungkhar cu kanmah nih kan i thimmi thil si loin, inn pakhat ah hmunkhat ah kan um ṭi caah kan cohlan a herhmi minung an si ti a chim chap.