Jesuh va leng ve u sih

Nihin cathiang hna cu Acts 4:23-31, Jn 3:1-8 an si. Voikhat bible relnak ah kan hmuh mi cu zultu hna cungah Thiang Thlarau Pathian a hun ṭum tikah zultu hna nih thihnak in a thoṭhanmi kan Bawipa Jesuh Khrih kha ngamh sang ngai in mi vialte hna sinah tehte an khan ngamnak kong a si. Jesuh Khrih kong he pehtlai in bia an chim tik zongah siangpahrang si hna seh, a thihnak hnga ding caah khua a khang tu biaknak lei hruaitu zong si hna seh, ahohmanh kha ṭihnak ngei ti hna loin Pathian pakhat lawnglawng a bia kan ngaih lai i amah nih a kan hmuhsak mi a kan fial mi kha kan ṭuan lai kan chim lai timi lung khiahnak he ngamh sang ngai in Jesuh Khrih thawhṭhannak thangṭha kha mi vialte hna sinah an chim nak kong kha a voikhatnak kan relmi Bible cathiang chungin kan hmuh mi cu a si. 

Thawngṭha bia kan zoh tikah, Kan Bawipa Jesuh Khrih sinah Nicodemus cu a ra i Bawipa he an i ton, bia an i ruahnak kong kha a si. Jesuh Khrih nih Nicodemus kha hrinṭhannak kong he pehtlai in a cawnpiak tikah minung sining in Nicodemus nih cun a thei kho lo, a hngal kho lo. Sihmahsehlaw, Jesuh nih a tinhpiak mi, hmai lei ah zeibantuk dah a tuah te lai timi zong kha Bawipa nih a theih- a hngalh mi a si ko caah Nicodemus kha ‘ti le thlarau in hrin ṭhan a herhnak kong’ kha baipi ngai in a cawnpiak. Nicodemus nih a thei thiam lo, a hngal thiam lo, a lung pemh kho lo. Sihmahsehlaw, Jesuh Khrih he ton in bia a chim ṭimi bia aa ruah ṭimi, lungthin thiang tein Bawipa thluacuah a kawl mi kha Jesuh nih thluachuah tampi a pek. Jesuh Khrih a thih tikah a ruak zualtu sinak caan ṭha a hmu tu kha a dang zultu hna si loin Nicodemus a hung si. 

Cuasicaah, Jesuh Khrih he aa tong mi paoh cu thluachuah biatak tein a hmu mi an si. Lungthin thiang tein Bawipa a kawl mi hna cu Bawipa nih thluachuah a pek hna timi kha nihin kan Bible cathiang hna chungin kan hmuh mi cu a si. Special thluachuah a hmu mi an si. 

Dawtmi u le nau hna, nifatin Khrihfa kan sinak ah, kan zumhnak ah Bawipa sin kal hi dai thlang hlah u sih. A thianghlim mi theih duhnak lungthin, zumhnak lungthin he kan Bawipa Jesuh Khrih sin va kal in kan i tinhmi kan plan hna caah bia kan chim ṭi, kan theih khawh lomi kan hal a si ahcun Bawipa nih thluachuah a kan pek ko lai. Teinak a kan pek ko lai, thil ti khawhnak a kan pek ko lai i kan thlarau ca zong ah amah aa bochan mi hna zungzal nun nuamhnak cu a kan pek ko lai timi kha thazang cheuh kan duh hna. 

Nihin kan relmi Psalm lehnak cu “Bawipa cungah biatak tein zumhnak a ngeimi hna cu mi lunglawm mi an si” tiah a ti. Bawipa cungah bochannak le zumhnak a ngeimi Nicodemus bantukin kannih hna zong Jesuh Khrih sinah va kal ve in bia kan chim ṭi, bia kan i ruah ṭi a si ahcun Bawipa nih thil ti khawhnak, teinak a kan pek hrimhrim ko lai. Bawipa nih a Thiang Thlarau in a kan umpi lai i zultu hna bantukin thihnak in a thoṭhanmi kan Bawipa Jesuh Khrih kha, biatak kha mi vialte hna sinah ngamh sang ngai in le ṭhawng ngai in a phuang kho mi kan si cio ko lai. Dawtmi u le nau hna, Bawipa sin kal ding kha kan tha thu hlah seh. Bawipa thisa cohlan ding zong kan tha thu hlah seh, ṭih hlah u sih. Missa kai ding zong kan tha thu hlah seh. Bawipa sin a kal mi cu Bawipa nih thluachuah a pek hna timi kha thei cio hna u sih.