Jesuh Thawhṭhannak nih kan nunzia a kan thlen a herh

Nihin cu Divine Mercy Sunday a si. 1Peter 1:3-9 – “Pathian sin in thla nan cam tikah amah cu kan Pa tiah nan kawh. Amah nih cun mi vialte kha an tuah ning cio in duhdan nak zeihmah ngei lo in bia a ceih hna. Cu Pathian cu a sin in thla nan cam tikah kan Pa tiin nan kawh ṭung ah cun hi vawlei cung nan nun lio ah hin amah upat bu tein nan um awk a si. Santlai lo nan pupa nunphung in an luaṭer tu hna zeidah a si kha nan hngalh. A rawk kho mi thil sui le ngun bantuk siloin nanmah luatnak man cu a sungmi thi, dotla lawmhnak, zeihmanh a ngei lomi tuufa thi bantuk Khrih i thi kha a si. Amah cu Pathian nih vawlei a ser hlan khan a thim cang i nangmah caah hi ni hmanung bik caan hna ah hin a hun langhter. Amah thawngin Pathian cu an zumh i Pathian nih cun thihnak in a thawhter i sunparnak a pek. Cucaah nan zumhnak le ruahchannak cu Pathian cungah aa bunh mi a si.”

Divine Mercy, Pathian dawtnak zarhpi tiang kan phanh khawh hna caah mi vanṭha kan si. Mi lunglawm kan si. Peter nih Jesuh cu Messiah, Khamhtu a si tiin a rak phuan. Cun Jesuh thisen nih a kan tlanh cang timi zong kan hmuh. Zultu dang hna zong Jesuh nih a thawhṭhan hnu ah biafiang in a chawnh hna tikah Jesuh a si kha fiang tein a theih khawh ṭhan. 

Kan nunnak ah Jesuh thawhṭhannak thawngin nun thlennak kan ngeih a herh. Zultu hna zong a tho ṭhan mi Jesuh an hmuh tikah an nun aa thleng hna. Thawhṭhan caan ah hin kan nih hna zong kan nun i thleng ve hna u sih. Samaritan minu zong Messiah Jesuh he an i ton hnu ah a nun aa thleng i mipi sinah a thawngṭha bia kha a va phuan ve. Peter zong a nun a thlen tikah a ter ah a ral a rak chia mi si ning in khan mi ralṭha si ning in a nun aa thleng mi a hung si. Zultu dang hna zong a thoṭhanmi Jesuh he an i ton hna hnu ah nun thlennak a ngeimi an hung si hna. Ralchiatnak, muihnak in an luat hna i ceunak a simi Jesuh nun kha an i hrawn kho hna. 

A thoṭhanmi Jesuh he kan i ton ve a si ahcun nun thlennak taktak cu Khrih nih a kan pek ve cio ko. Pumpak cio in kan nunnak ah nun thlennak ngei cio hna u sih. Cun nifatin kan nunnak zongah a thianghlim chinchin mi si ning in kan nun awk a si. A thoṭhan mi Jesuh kong kan ruah a si ahcun thazang ṭhawnnak le lawmhnak hi tam taktak in kan nunnak ah hmuh khawh a si. Cutin zumhnak kan ngeih khawh zong cu kan caah lunglawmh awk taktak a si ṭhan. Jesuh thawhṭhannak thawngin kan nih hna zong a thar mi le a thianghlim mi nun zia in nun khawh i zuam zungzal hna u sih.