Kannunnak a kan hruaitu cu Bawipa Thisa a si
Nihin ni kan relmi cathiang (Acts 3:1-10, Lk24:13-35) hna chungin thazang lak ṭi ka duh mi cu ‘Thawhṭhannak kong’ hi a si. Thawhṭhannak kan ti mi hi Khrihfa hna kan zumhnak a muru, abiapi tuk mi a si bantukin, Thawhṭhannak hi um hlah sehlaw, Khrih kan zumh mi zong hi sullam a ngei hnga lo ding hi a si. Khrih nih thihna tei in a Thawhṭhannak thawngin a zum tu vialte kha Thawhṭhan nun a kan hrawmh i zungzal nunnak kan co timi kha Khrihfa hna nih kan zumh mi cu a si i kan zumhnak a sunglawi bik a si ti zong kha vun langhter ka duhmi cu a si.
Vawlei cung minung hna nih hin biaknak hi an ngei cio hna i zeibantuk an biakmi pathian hmanh hi thihnak a tei i a tho ṭhan timi pathian an um lo. Kannih kan biakmi Pathian cu Pathian vialte lakah Pathian bik, Siangpahrang vialte lak ah Siangpahrang, Bawi vialte lak ah Bawi bik a si kan ti nak cu thihnak a tei i a tho ṭhan mi Pathian a si i a zumtu vialte hna kha ‘a Thawhṭhan nun’ a kan hrawmhtu Pathian a si caah hin Pathian vialte lak ah Pathiam cem tiah kan tinak cu a si.
Tuzing kan cathiang chungah kan hmuh bantukin, Emmaus khua lei kal nak lam ah zultu hna pahnih um har lileng ngai in, an kal pah in kan Bawipa Jesuh Khrih, vailam an tah, an vui i a Thawhṭhannak kong kha Jerusalem khua pumpi a cualnak kong kha an thinlung ah ruat in, tuak pah in siherh lengmang in an i ruah lio ah khan kan Bawipa Jesuh Khrih kha an sin ah fiang tein a lang timi kha kan cathiang ah kan hmuh mi cu a si. Kan Bawipa Jesuh Khrih hi amah kong a ruatmi, a kan tlanhnak kong, a thih i a Thawhṭhannak kong a ruatmi le caan a pe deuh mi hna sinah hin a lang ve timi kha kan hmuh mi cu a si.
Kannih cio hna zong kan nunnak ah hin, kan ṭuannak, kan tuahnak, kan tlonlennak le nunnak kan hmannak ah hin kan Bawipa Jesuh Khrih caan kan pek le a kan khamhnak kong kan ruah deuh a si ahcun kan Bawipa Jesuh Khrih hi kan thinlung chungah a lut deuh i, hmunhma a la deuh i amah nih hin a kan hruai, a kan mawngh deuh ko timi kha a lang mi kha a si.
Cuve bantukin kan Bawipa Jesuh Khrih zultu hna sinah a langh tikah khan bia a chim ko, anmah he bia aa ruah ko, asinain aho a si kha an i fiang kho lo, an hngal kho lo. Sihmanhsehlaw, changreu kha a lak i a cheu tikah khan ‘thihnak a teitu kan Bawipa Jesuh Khrih, Messiah a si’ ti kha fiang tein an hngalh ti kha cathiang ah kan hmuh. Cuve bantukin kan Bawipa Jesuh Khrih cu thihnak teitu a si, a tho ṭhan timi kha kan hngalh, kan zumh, sihmanhsehlaw fiang tein kan sinah a um ko ti nak cu a “Thi le Sa”, changreu cheunak ah khan a si ti kha fiang tein kan hmuh khawh mi kha a si.
Cucaah zumtu u le nau vialte hna, kan biak kan Pathian hi, thihnak a tei i a tho ṭhan i zungzal nunnak a kan hrawmh timi zumhnak tiang lawng siloin ‘nan sinah zungzal in zungzal tiang ka um ko’ tiah a kan timi a langhnak cu a thi le sa in hin a si. A thi le sa a kan hrawmhnak in kan sinah a um i, amah nih kan sinah hmunhma a lak i zungzal in zungzal tiang kan sinah a um timi kha kan zumh, kan hmuh mi, cathiang nih a kan chimhmi a si.
Cucaah dawtmi nu le pa u le nau vialte hna, kannih kan biakmi kan Pathian cu Pathian sawhsawh a si lo. Thihnak teitu Pathian, a tho ṭhan i a zumtu vialte hna a Thawhṭhan nun a kan hrawmh i vawlei ah hin a thi le sa in zungzal in a kan um pi ko ti kha fiang tein a kan theihter tu Pathian a si bantukin nifatin kan nunnak ah hin a thi le sa in kannih hna nih kan sin a umnak kha fiang tein hngal in, a khamhnak a dawtnak hi nifatin a ruat mi si hna u sih law, Bawipa thi le sa nih kan nunnak a mawngh i, kan nunnak a hruai i cuticun zungzal nunnak kan co khawh nak ding caah a kan hruaitu si hram ko seh timi kha tawi tein i ruah ṭi hna u sih ti kha ka duhmi a si. Bawipa nih a ṭha a ti ning paoh in thlua run kan chuah hram cio ko seh. Amen