Jesuh Unau taktak sinak timi cu

Nihin kan relmi (Jn 20: 11-18) chungin, Mary Madalene nuncan ziaza, Bawipa a dawtnak, aa bochannak vialte hna ruangah Bawipa zong nih a zohkhenh ve nak kong kha zoh ṭi hna u sih. Bawipa a thih hnu hmanh ah Mary Madalene nih a thlah siang lo. Thlan ah va kal in Bawipa pawng te ah um kha a duh zungzal mi nu a si. 

Minung si ning zongah chungkhar pakhat khat thih loh an ton tikah ngaihchia ngai in an ṭhah leng mang hna zong kha hmuh khawh a si. Cucu dawtnak an langhter nak a si. Nun lio caan ah zeitluk hmanh in rak i rem lonak um hmanhsehlaw, thihnak, ṭhennak a hung um tikah an celh cio lo. An i sian lo ruangah a si. 

Mary Madalene zong Jesuh a thih kha a rak siang ve hrimhrim lo caah a si. A nunnak a dongh tiang Jesuh Khrih he um ding kha a duh zungzal caah a si. Jesuh an vuinak hmun ah kal in a va kawl tikah a kawlmi a Bawipa cu thlan hmun ah cun a rak um ti lo. A tho ṭhan cang. Jesuh zong nih a kawl tu, a siang lo tu nu Mary Madalene i a dawtnak kha hmuh tikah a sinah langhnak a tuah i a nung ṭhan cangmi sining in bia in a chawnhṭhan. 

“Ka zultu hna sinah khan va kal law, Galilee ah va kal hna seh, cu ka hmun ah cun an ka hmuh lai ee” tiah a ti. “Nan Pa le ka Pa sinah ka kai lai,” va chim hna law tiah Jesuh nih a ti tikah Mary Madalene nih a Bawipa fial ning te in a zultu hna a va chimh hna i cuticun a Bawipa a dawtnak kha a langhter. 

Dawtmi u le nau hna, nang le kei zong hi vawlei cung kan nun lio ah hin Pathian he siseh, kan u kan nau hna he siseh, a caan ah cun a sinpit lo nak zong kha a um kho tawn. Mary Madalene nih a Bawipa a thlah sian lo bantukin kan nih hna zong Pathian kha thlah lo in, kan u nau hna he kan i dawtnak kha thlah lo in kan um ding a si. Unau a simi hna nih pakhat le pakhat bawmhnak an i pek bantukin “Ka Pa a simi le nan Pa a simi Pathian” tiah Jesuh nih a ti caah, kan u nau le kan Pathian a simi Jesuh sinah khan bawmhnak kan herh mi vialte caah khan panh hna u sih law bawmh hal hna u sih.

Jesuh Khrih kha kan dawt taktak a si ah cun Mary Madalene bantukin Jesuh kha a kawl tu kan si zungzal ko lai. Jesuh Khrih cu na daw taktak kho cang maw? Cun Jesuh cu a kawl tu hna kha zeitik hmanh ah Jesuh nih kal tak hna lo in an sin tu ah khan a ra tiah kan hmuh bangin nifatin kan nunnak ah, kan herh kan baunak hna caah bawmhnak hal ding in Jesuh kha kawl zungzal ding kan si. A sin panh zungzal ding kan si. 

Cun Mary Madalene kha rian a fial, a zultu hna sinah va kal in thihnak in a thawhṭhan cang nak kong kha va chim dingin a fial bangin, kan nih tipilnak a ing cang mi hna zong “Jesuh Khrih thihnak in a thawhṭhannak thawngṭha” kha kan u nau a simi minung vialte hna sinah kan chim ve ding a si. Jesuh Khrih a dawtnak a hngal rih lo mi hna, a thawngṭha bia a hngal rih lomi, a thei rih lomi hna sin ah kal in “Jesuh” thawngṭha bia kha a u nau a simi kan nih vialte zongnih chim ve ding in rian fial kan si ve cang hna. 

Mary Madalene nun zia kan zoh tikah tlamtlin lonak in a rak um ve mi nu a rak si ko. Sihmahsehlaw, Bawipa he an i ton tikah a nuncan ziaza vialte le a ruahnak vialte kha aa thleng hna i Bawipa hnu zul, Bawipa a zummi nu a si kha kan hmuh.  Cu ruangah Mary Madalene zong nih a nun dih tiang Bawipa hnatlaknak, duhnak kha a tuah mi ah a hung cang. Cu ruangah Mary Madalene cu Catholic Bupi nih ‘Mithiang’ tiah upatnak a pek nak kha a si. 

Cucaah, nang le kei zong Bawipa u nau kan si ve a si ahcun Bawipa Jesuh kha a kawl mi si i zuam hna u sih. Cun a unau taktak kan si ve a si ahcun Bawipa a thei rih lomi hna sinah khan “Bawipa Jesuh thihnak in a thawhṭhannak, Pathian a si nak kha chimphuan awk ah rian fial kan si ve lai.”