Urbi et Orbi: Pope nih vawleicung hruaitu hna cu hriamnam chiah dingin a forh hna

Pope Leo XIV nih vawleicung hruaitu hna cu hriamnam chiah in “tonnak” lam kha i thim u tiah a ti hna.

“Hriamnam a ngeimi nih chiah ko hna seh!”, tiah Pope nih Easter Sunday i ‘Urbi et Orbi’ (‘Khuapi le Vawleicung’) dihlak thluachuah peknak a tuah lio ah a chim. 

St Peter’s Square ah aa pummi khualtlawngmi thong tampi sinah bia a chim lio ah, Pope Leo nih “raltuknak chuahter khawhnak nawl ngeitu hna” kha daihnak lam i thim dingin forhfialnak bia a chim. 

Daihnak cu “hriamnam hman le midang uk duhkin tuahmi” si loin biaruah ṭi nak in hmuhmi a si awk a si awk a si tiah a ti.

Pakhat le pakhat zeirel lonak’

Pope Leo nih “vawlei thil kal ning nih thahnawnnak lam aa thiam chin lengmang” tiah ralrinnak a pek.

Mi thong tampi thihnak lawng si loin “huatnak le ṭhencheunak” “sipuazi le zatlang nun zongah” zei i rel lonak, i theihter duh lonak in nun lam kan panh chin lengmang.

A thi cangmi Pope Francis nih a rak chimmi bia hmangin, Pope Leo nih “a karh chin lengmangmi ‘vawleicung pumpi ah pakhat le pakhat zei i rel lonak’” kong zong in ralrinnak a pek.

“Zei i rel lonak in kan um peng kho lai lo. Ṭhatlonak ah kanmah le kanmah kan i thla kho lo!”, tiah a ti. 

Hi ruang ah, a ra laimi zarhteni, April 11, ah St Peter’s Basilica ah daihnak caah Pope nih ‘thlacamnak ka hruai lai’ tiah a ti.

Ṭhawnnak taktak’

Easter ah, Pope nih a chimmi cu, Jesuh nih thihnak a tei i, cu teinak in cun “hlanlio ral a si mi, hi vawlei uktu (satan) kha voikhat ah a tei dih cikcek” tiah a ti. 

Sihmanhsehlaw, Pope Leo nih a chimmi cu, Khrih nih hi teinak a hmuhnak ṭhawnnak cu “thahnawnnak um loin (nonviolence)” a si. A tuahsernak ah dawtnak cungah hram a bunh i ngaihthiamnak in vawlei cu a tlanh” tiah a ti. 

Hi dawtnak le ngaihthiamnak cu daihnak a sertu “ṭhawnnak taktak” a si i pumpak in seiseh, zatlangbu karlak ah siseh pehtlaihnak a sersiam tu a si a ti.

Chunglei daihnak

A Urbi et Orbi bia a donghter lai ah, Pope nih Easter daihnak cu “hriamnam hna an daih” lawng si loin “kanmah pakhat cio lungthin a thlengtu” chunglei daihnak a si tiah a chim.

“Khrih daihnak thawngin kanmah le kanmah i thleng hna u sih”, tiah Pope Leo nih a ti i, daihnak taktak a hngakmi hna le lungthin fahnak a ing tuar mi vialte” hna kha “Daihnak taktak a pe kho tu” Pathian sin apnak in a caan a donghter.