Harsatnak lungpi a kan thawnpiak tu Jesuh

Jn 20:1-9 “Zahpi ni zingkate ah, khuadei hlanah khin, Mary Magdalin cu thlan ah khan a va kal i thlankhar lung a rak i thawn cang kha a hmuh. Mary cu a tli I Simon Peter le zultu dang pakhat Jesuh nih a dawtmi kha, “Bawipa cu thlan chung khan an lak cang I khuazei i an chiah kan hngal lo,” tiah a chimh hna. Cun Peter le zultu dang cu an i thawh i thlan ah cun an va kal. An pahnih cun an le, zultu dang kha Peter nakcun a ṭhawng deuh i thlan kha a phan hmasa. A vun bih i khiangrang puan kha cu a hmuh hna, sihmanhsehlaw a lut lo. A hnu in Simon Peter cu a ra le cutmat i thlan ah khan a lut colh. Cuka i a ummi khiangrang puan le Jesuh lu an mennak puan kha a hmuh hna. Cu puan cu khiangrang puan hna sinah khan a um lo. amah dang tein aa zual. Cun thlan a phan hmasami zultu zong kha a lut ve i a hmuh i a zumh. Cathiang nih thihnak in a tho ṭhan lai tiah a timi kha an hngal ṭhiamṭhiam rih lo. Cun zultu hna cu inn ah an kir.”

Bawi Khrih ah dawtmi u le nau hna, nihin Thawh ṭhan puai kan tuah. Hi thawh ṭhan puai hi kum fatin kan tuah mi zong a si. Mirang nih cun “the light has risen” “Ceunak cu a tho ṭhan cang” an ti. A ruang cu Jesuh nih “Keimah cu ceunak ka si” tiah a rak timi ruangah khan a si. Bawipa Thawh ṭhannak thawngin ‘muihnak cu tei a si cang’ timi zong kha kan theih ding a si. 

Mahaṭama Gandi a thih tikah Neru cu a ṭap i ‘ceunak pi cu a tlau cang’ tiah a rak ti, ti a si. Jesuh kong he pehtlai in zumtu hna zong nih ‘ceunak a tlau cang’ tiah an rak ruah ve. Sihmanhsehlaw, vawlei ceunak pi cu a tho ṭhan cang, a nung ṭhan cang. Alleluia. Alleluia cu kan caah teinak, Khrih a thawh ṭhannak i kan lunglawmhnak langhter nak zong a si. Lent- ulh caan chungah kan hman lonak kan sak lo nak cu Bawipa temh innak a tuar ruangah a si. Atu cu lunglawmhnak he kan aupi ding le kan sak zungzal ding a si cang. 

Thlaan lei  a kal mi nu hna nih ‘aho nih dah thlaankhar lung pi a kan thawnpiak lai’ tiah khuaruahhar ngai in an rak um. Kan nunnak ah a rit ngaimi lungpi a um ve. Lungpi he aa lomi “division” “ ṭheknak, raldonak, huatnak, rem lonak timi hna phun kip kan chungah an um. Cu harnak hna chung in aho nih dah a kan khamh lai? Ahodah mah bantuk lungpi cu nihin ni ah a kan thawnpiak lai? Aphi pakhat lawng a um. Thihnak teitu, thihnak in a tho ṭhanmi Jesuh Khrih lawnglawng nih mah lungpi cu a kan thawnpiak khawh. 

Thlaan lawngmi kan zoh tik ah kan nih hna zong ruahchannak nganpi kan ngei kho ṭhan hna. Cu caan ah kan hmai i aa khammi lung tumpi a rih ti lo kha kan theih khawh. Muihnak zong kan ṭih ti lo. Zeiruangah, ceunak a simi Jesuh nih a tei cang caah a si.

Dawn khaan tu lungpi cu thawn in ‘dawtnak, daihnak’ in Jesuh nih a kan tei piak cang. Hi Easter puai kan tuah nak thawngin ‘mi vialte cu ceunak lam ah a kal mi kan si cang hna. Kan hmai ah a kan dawn lengmang mi lungpi cu Khrih nih a kan thawnpiak cang.’

Khrih nih a kan hmuh sak mi ceunak lam cungah pial lo tein a kal zungzal tu kan si khawh nak hnga thlacamnak he I zuam zungzal hna u sih.