Thihnak cu Ngaihthiamnak a umtertu Raithawinak a si
Good Friday, kan Bawipa Jesuh Khrih a thihni nihin i Bupi nih rel dingin a kan timh piakmi Bible (Is. 52:13-53:12, Ps. 31:2-25, Heb 4:14-16,5:7-9, Jn. 18:1-19:42) tiang a si. Nihin n i thawngṭha i hrawm ṭi dingin tlangtar kan duhmi “Thihnak cu Ngaihthiamnak a umtertu Raithawinak a si” ti a si lai. Rome. 6:23a zawnah “sualnak man cu thihnak a si e” tiah a ti.
Kan nu le kan pa, a kan hringsortu Adam le Eve hna ruangah hrinsormi minung vialte kan duh zongah kan duh lo zongah sualnak man cu thihnak a si caah kan co dingmi ro cu thihnak a si. Sihmanhsehlaw a kan sertu Pathian nih amah dunning tein a kan ser i a kan sernak ah khan biatak kha a hman i sermi minung cu amah muisam keng in a kan ser i kanmah cu amah ta ka si bal caah a Fapa Jesuh Khrih min thawngin ser kan sinak a kan dawtnak kha a philh lo i amah he zungzal in nungcang hmunhnak ah a sunparnak i hrawm ṭi ding kha kan Pathian nih a duh bikmi cu a si i nihin ni ah kan relmi (Is. 53) chungah Fapa Jesuh Khrih mi vialte kan caah kan sualnak man a in te lainak kong , a thih te lainak kong cu fianghlang in Profet Isaiah hmurka in a rak chimchung cang. (Is. 53:4) “Asinain zawtnak a inmi cu kanmah nih kan rak in hngami kha a si i nganfahnak a tuarmi cu kanmah nih kan rak tuar hngami kha a si.
Temhnak a inmi cu Pathian nih a cungah dantatnak a tluntermi a si” tiin kan rak ruah zungzal. Sihmanhsehlaw hma a rak in cu kan sual ruangah a si i tuknak aa huah cu kan ṭhatlo ruangah a si. A inmi dantatnak in luatnak kan hmuh i an tuknak vual in damnak kan hmuh. Kannih cu kan dihlak in a tlaumi tuu bantuk kan si. Kan duhnak cio paoh ah khan kan rak kal. Cucaah dantatnak cu Bawipa nih amah cungtu ah khan a tlunter i cu dantatnak cu kanmah tu nih kan rak in awk a rak simi kha a si, fakpi in an hrem asinain dai tein aa in ko, bia kaa khat hmanh a chim lo. Thah awk ah an kalpi mi tuufa bantuk le a hmul meh awk ah an hruaimi tuu bantuk in awn au lo tein a um. An tlaih, thah awk in bia an khiah i thah awkah an kalpi. Zeiti a va um te lai kha zeihmanh ahohmanh a zei a pawi lo” ti kha kan Bawipa Jesuh Khrih kong he pehtlai in Profet Isaiah hmurkaa in fianghlang tein a rak chimchung cia. Amah cu sualnak ngei hlah hmanhsehlaw sualnak chungin, thihnak chungin zungzal nunnak ah kan Bawipa Jesuh Khrih nih tlanh a kan duh caah kan zapite caah amah nih temhtuarnak vialte a in dih, zawtnak vialte harnak vialte hremnak vialte kan Bawipa Jesuh Khrih nih a kan in piak dih a si.
Voikhat ah Siangpahrangpa dum ah Siangpahrangpa nih a ngeihmi hai kung a um i cu hai cu a thaw taktak mi hai pakhat a si. Zawng rual nih an theih tikah zawngrual nih cu hai cu a thli tein an rak fir tawn i a thli tein an rak ei tawn. Nikhat ahcun Siangpahrang bawipa nih ka hai ka veh tuah hna lai a ti i a Lalang pawl he a ralkap pawl he a haikung veh ding an kal. Sihmanhsehlaw haikung chungah cun zawngrual cu an rak khah tikah cu zawng hna cu haikung in a dang ah kalnak hmunhma an ngei ti lo. A tang kan ṭum lai tiah le Siangpahrangpa le a ralkap hna nih fei he, Li he Cantiang he rak hngah a si. Khatlei kan pet lai tiah le tiva a si tikah tiva nih a lian i zeitihmanh in luatnak ding an i kawl kho lo.
Cu lioah zawng palapi nih aa thawhmi cu hrihruang a chah i cu hrihruang cu zohhmanh u ka hawile hna hi hrihruang hi ka tai ah kaa ṭhen lai i khatlei varal khi ka hei peh hnawh lai i ka hei tlaih lai i hrihruang hi nan rak zulh lai i cuticun khatlei varal ah khan him tein kan chuak lai tiah bia a cah hna. Zawng palapi nih hrihruang a chahmi cu a tai ah aa tem i haikung a ṭengke cun a vun khih i a hei peh tikah khatlei varal cu a hei phan natein a hri kha a tawi deuh caah zawng palapi nih cu khatlei varal thingkung a ṭe kha a hei tlaih i cuticun hri nih a banh deuh lo caah a kut cung cu thingṭheng cu a hei tlaih tikah kha ka fale rual hna hri kha rak zawh lai ci kaw a keng cung hin zawh uh tiah a ti hna.
Cutincun Zawng pala nih cun thingnge cu thlah lo tein rethei taktak in a tlaih i a hawile hna cu a fale pawl zang rual pawl cu pakhat hnu pakhat kha thihnak chungin luat dingah a zawh ter hna i ahnubik ah cun amah cu a hawile an zawh dih hnuah a tha nih a celh ti lo i vawlei ah a tla i a tai ṭem bupi cun cuticun Siangpahrang hna kut ah zawngpala pi cu a phan i a nunnak nih a celh ti lo a banghtuk caah a thi. Zungzal nuncan khawhnak kan phak khawhnak ding caah kan Bawipa Jesuh Khrih cu Pa Pathian kalnak lam ah hlei ah aa ser i Pa Pathian kan phak khawhnak ding caah kan sualnak man Bawipa Jesuh Khrih nih a kan liampiak.
Heb 4: 15 ah kan tlangbawi ngan hi kan santlaih lonak ah kan cung i zaangfahnak a ngei kholomi tlangbawi a si lo e” tiah a ti. Kan lei a ṭangpengtu tlangbawi kan ngei i kan lei i a ṭha pengtu kanlei i a kan ṭanpi tu Pathian kan ngei. Deut. 21: 23b zawnah thingkung cung i thlaimi cu Pathian chiatserhmi an si e” a ti. Kan Bawipa Jesuh Khrih cu nangmah le keimah kan sual ruangah Pa Pathian i chiatserhnak a ingmi a si.
Heb. 4:16 zawnah cucaah cun hmai ah fawng usih law vel a umnak bawi ṭhutdan kha ralṭha ngai in fuh usih” tiah a kan ti bangin kan Bawipa Jesuh Khrih a dawtnak kha hngalh in Pa Pathian sinah bawi ṭhutdan ah zumhnak he fuh hna usih. Kan biak kan Pathian nih thluachuah in ṭhumhthlak ko hna seh.