Lenglei Ral le Chunglei Ral

Bawi Khrih ah dawtmi Nu le pa, u le nau, zumtu vialte hna Bawipa nih daihnak in pe cio ko hna seh. Thinlung, Taksa, Thlarau damnak in hrawmh cio ko hna seh. Pathian nih a kan pekmi a sunglawi tukmi ni le caan chungah hi bantukin RVA program khuakhan lairelnak thawngin keimah hna zong caan tawite Pathian bia chimphuang dingin caanṭha ka hmuh tikah hin Pathian cungah lunglawmhnak tampi ka ngei i ṭuanvo ngeitu Father te chungah lunglawmhnak tampi ka ngei ti kha a hmasabik ah vun chim ka duh. Kan vawleipi kan zoh tikah tu lio cu thawngpang a chia, ram khat le ram khat i dohnak, i kahnak ruangah minung tampi thihnak an tong inn lo tampi a rawk. Ei awk din awk ngei loin minung tampi an um hna. Cu lio caan ah vawlei cung thilman zong tampi a kai i khuasak tintuknak ah harsa ngaiin a ummi zong tampi an um hna. Sihmanhseh Pathian nih nihin ni caan tiang a kan ven, him tein ti rawl in a kan cawm, inn lo tangte ah a kan chiah rih. Pathian a dawtnak hi kan caah hin a ngantuk hringhran ko timi zong kha vun chim ta ka duh. 

Atu hi a thiangmi zarh holy week a si bantuk tein kan nih hna nih Pathian sinah caan kan pek caan, a hleiin caan pek caan, thlacam caan, Ulh caan a si. Santlai lomi sifak he nun i hrawm in nunnak chang i cheuh in i bawmhchanh caan a si bantuk tein ahlei tein Pathian sinah hin thlacam ṭi hna usih law Pathian sinah hin caan la ṭi ko hna usih timi kha vun sawm chih zong kan duh hna. 

Tuzing kan cathiang chungah kan hmuhmi he pehpar in thazaang la ṭi usih ti ka duhmi cu kan Bawipa Jesuh Khrih kha a zultu a simi Judah Iscariot timi nih a rawi tlaih a tonnak kha tuzing Bible cacaang ah kan hmuhmi kha a si. Kan Bawipa Jesuh Khrih a rawitu chungah kan zoh tikah hin kan Bawipa Jesuh Khrih nih khamhnak kong thawngṭha a chim i Pathian rian a ṭuan ah hin lenglei in ral tampi a ngei i tukforhtu tampi a ngei ko nain lenglei ral le tukforhtu nih hin a tei lemlo. Sihmanhsehlaw, chunglei ral kan timi hi ṭih a nung ngaingai mi a si bantuk in amah lila kan Bawipa Jesuh a zultu Judah Iscariot timi lila nih hin ka Bawipa Jesuh Khrih kha a lei, a rawi tikah cun kan Bawipa Jesuh zong taksa sinak lei in lungretheihnak le chung sivanghnak tampi a intuar kha kan hmuh kha a si. Cu bantukin kan nih cio hna zong kan nunnak lamtluan ah hin tukforhnak hi a phunphun kan ing lai. Hneksaknak, leinak rawinak tampi kan nunnak lamtluan a um ko lai. Cu chungah lenglei i leirawinak nakin chunglei leirawinak hi a fak khunmi a si. 

Innchungkhar ah siseh, pumpak kan nunnak ah siseh hi bantuk kan ton tikah hin a biapi cemmi cu kanmah pumpak in phisiin loin, kanmah pumpak lawngin intuar loin kan Pathian sinah chim in kan Pathian he phisiin ṭi, in ṭi kha kan Pathian nih a kan duh piakmi kha a si. Kan Bawipa Jesuh Khrih zong taksa sinak in intuar awk a har ngai. Phurh awk a har ngai. Asinain taksa sining in cawlcangh loin kan Pathian khuakhan lairelmi tu kha tangdor tein a cung i a tlungmi thil paoh kha intuar khawhnak a ngei timi kha kan hmuh khawhmi a si. 

Chunglei ral kan timi hi kan zoh tikah Khrihfabu tuanbia chungah kan hmuh mi cu kan Bawipa Jesuh Khrih nih khamhnak rian a ṭuan i a Khrihfa a derh tikah lenglei in ral tampi Judah mi sinin siseh, ral tampi an ngei. An thah hna, an nawn hna, an tlaih hna, an hrem hna. Sihmanhsehlaw lenglei ral nih hin a tei kho lo i an hrem deuhdeuh hna an thah deuhdeuh hna Khrihfa an karh deuhdeuh. Sihmanhsehlaw Satan zong cu active a thiamtuk ve i  lenglei ral in ka tei ti lo ti kha a hngalh tikah cun chunglei ral in, Khrihfabu chungin Martin Luther hmangin Khrihfabu chungah ṭennak, buainak, Satan rianṭuannak a vun luh tikah cun nihin ni caan ah Khrihfa a timi Bu tampi kan um i mi sin zumlotu sin thlah si loin Khrihfabu chung lila ah hin pakhat le pakhat i rem lonak, pakhat le pakha i dawt lonak, i ertaunak hi a karhmi hi a si. Kan zoh tikah hin Khrihfabu tuanbia chungah kan hmuhmi cu lenglei ral nakin Khrihfabu chung chunglei ral hi ṭih a rak nung deuh timi kha kan hmuhmi a si. 

Cu bantukin kan Bawipa Jesuh Khrih zong a zultu lila, a cabuai chung i rawl a dum ṭimi lila a hrai ah a hnim ṭimi lila nih a rawi tikah hin kan Bawipa Jesuh Khrih zong lungretheihnak in a khat ve ti kha kan hmuhmi kha a si. Judah Iscariot nih hin zeiruangah dah kan Bawipa Jesuh Khrih hi a rawi kan ti a si ahcun kan Bawipa Jesuh Khrih nih a tuahmi thil le a chimmi bia hi a lungtlin lo si loin taksa in chawva phaisa duhnak ruangah hin kan Bawipa Jesuh Khrih hi a rak lei i a rak rawi ti kha cathiang ah kan hmuh kha a si. Timote cakuat chungah kan hmuhm cu phaisa duhnak hi sual vialte hna i a hrampi a si a ti bantukin nifatin kan nunnak ah kan i ralrin awk a biapi tukmi cu ningcang loin phaisa duh le ningcang loin chawva hmuh duhnak hi zumtu hna nih kan hrial awk hrimhrim a si ti kha fiang tein kan hmuhmi kha a si. Ningcang loin hmuh duhnak, ningcang loin ngeih duhnak nih hin thinlung a hmaanter lo i hmurka in a chuahmi bia zong a hmaan ter lo i tuahṭuannak zong hi a hmaan ter lo timi kha fiang tein kan hmuhmi a si. 

Cucaah dawtmi nu le pa, u le nau vialte hna tuzing zing caan ah a hleiin kan thinlung chungah Pathian bia a hleiin um seh ti ka duhmi cu kan Bawipa Jesuh Khrih zong a leitu, a rawitu Judah Iscariot nih amah a zultu lila nih a vun rawi tikah cun a phurh a hartuk mi le a in awk a hartuk mi kha a si. A ka rawitu ding a si lai ti zong a hngalh chung, a ka rawi te lai ti zong a hngalh chung ko nain taksa sining in hramhram in ti lemlo in a sining le a zeizong zate kha Pa Pathian sintu ah a chanh i intuar khawhnak thinlung a ngeih bantuk tein kannih cio hna zong kan cungah a tlungmi tukforhnak hneksaknak vialte hna hi kan Bawipa Jesuh he ingṭi in, kan Bawipa Jesuh he phurṭi in, tuar ṭi in kan Bawipa Jesuh Khrih sinah hin kan sining vialte hi a chim a phuang a phur ṭimi si hram ko hna usih tiah tawite in Pathian Bia hrawm kan duhmi hna a si. Bawipa nih thluachuahnak kan pek piak ko seh.