St. Jerome Emiliann

Audio (aw) zong in ngai khawh a si. 👇👇

Somaschan Fathers bu kha a rak dirhtu Mithiang Jerome Emiliann cu Italy ram, Vinice khua, 1481 kum ah a chuak. Thiamnak he a tlingmi ralbawi pakhat a si caah Arelviso khua pawng i Castledrova inn hngak ralbawi ah riankhinh a rak si. Cu khua cu ral kuttang ah a rak tlak hnu ah amah kha thonginn chungah thirhri in an ṭe mi an khumh. Cu thong chungah cun a ṭhatlonak nunzia hna kha a rak hngalhṭhan. Nu Mary bawmhnak thawngin thong chungin khuaruahhar in a rak luatṭhan hnu ah Pathian sinah a pum dihlak aa pekchanh. St. Jerome cu kum (17) a si ah Siangbawi cannak a laak i a ngeih mi thilri chawva vialte kha mi sifak hna a rak pek dih hna. Ngakṭah siizung le a lung aa thlengmi nu ṭhalo (hlawhhlang) hna caah inn a sakpiak hna. 1532 kum ah Milan le Nitou khua pakhat a simi Somach khua Siangbawi bu a rak dirh. An bu i timhmi cu ngakṭah zohkhenhnak, mino ca chimhnak le Siangbawi hme hna lam hmuhsak dinga caah a si.

St. Jerome nih Siangbawi hna sinah a rak chim tawnmi cu “Khrih nih nannih kha sifahnak, lungdernak, hlawt innak, lungretheihnak le mi nih sersatnak tampi kha in awk le ton awkah sathau thuh nan si; Pathian pakhat lawng nih sifah harnak kong kha a theih ko nain, kannih nih kan hngalhawk pathum a um rih. Pakhatnak; Pathian nih nannih kha a dawtmi a fale chungtel siter an duh hna caah hi lampi hna hmangin an thianh hna. Pahnihnak; Pathian nih Khrih le amah Pathian hleiin a dang pathian an zumhter duh hna lo caah a si. Pathumnak cu; Pathian nih mei chungin sui bantukin an chekhlat hna caah a si” tiah a ti hna. Hi bantuk sifah harnak nan in lioah nan zumhnak a feh ahcun Pathian nih nan caah a daihnak veel kha hi vawlei ca lawng si loin hmailei chan ca zongah zungzal ca in an pek hna lai. 1537 kum ah a chuakmi chungtlik (thisen) a ingmi hna kha a rak bawmh hna lioah an rak chawnh ve i a thi. 1928 kum ah Pope Pius XII nih St. Jerome Emiliann kha ngakṭah hna zohkhenhtu Mithiang sinak a rak pek.