St. Hilary (Bishop & Bible Thiamsang)

(315-367)

Audio (aw) zong in ngai khawh a si. 👇👇

Kumzabu (4) ah a min a rak thang mi Bible lei fimthiam St. Hilary cu mirum chungkhar in AD 315 kum ah France ram, Pytia khua ah a chuak. Amah cu milem a biami chungkhar in a rak ṭhanglian mi a si i chungkhar a dirh hnu ah Alra an timi fanu pakhat a ngei. Kum (30) a si ah Pathian tampi biaknak le an hruh ning kha a rak theih hnu ah zeizong vialte sertu Pathian a umnak kong kha a rak hngalh. A hnu bik ahcun a rak kawl mi biatak kha Khrihfa Bible cauk chungah a rak hmuh caah a lung aa thleng i tipilnak a rak ing.

Mi tampi nihcun St. Hilary kha mi sawhsawh a si ko nain Pontia Bishop ah an rak thim. Cu ṭhutdan cu hrial dingin aa zuam ko nain tangdornak cu Bishop rian he aa tlak mi a si ti kha mi tampi nih zumhnak an ngeih chinnak tu a rak si. AD 353 kum, Bishop cannak a hmuh hnu ah a nupi he i sumnak in an rak um. St. Hilary nih, “Bawipa Jesuh cu Pathian a si lo” timi zumh palhnak kha a rak doh i Bawipa Jesuh Pathian a sinak kha fakpi in a rak dirkamh. Cu bangin Bawipa Jesuh cu Pathian a si lo timi zumh palhnak kha a rak doh ruangah Rome Siangpahrang Constantinus nih AD 356 kum ah ram lengah ṭhawlnak dan a rak pek. Cu dan a in chungah Thumkomh Pathian he pehtlai mi Pathian bia cauk ṭha taktak pakhat kha a rak ṭial. AD 361 kum ah Poitia khua leiah a rak kirṭhan i a thih kum AD 367 kum tiang Catholic zumhnak kha a rak kirkamh. Sr. Hilary cu mi nunnem le mikip he aa kom thiammi a si ko nain Bupi a dotu ral hna tu cu a rak kham zungzal hna.