Chungkhar Kong

Vale hna nan nupi le kha dawhna u law, biahrangin ti hna hlah u, (Kolose 3:19)

 Vale cu mah nupi kha nunnak nupi sinak in dawt le zaangfah awk tuanvo a ngei. Zaangfah zawnruah nak tein thazaang pek le bawmh awk an si. Takpum he pektlaimi ningin minu hna hi mipa hna nakin thazaang derdeuh mi an si. Hrangngai in tuah lo hawikomhnak phun kha vale hna nih nupi Chungah tuah ding asi lo. Vale hna nih nupi le cungah hrangngai in komh nak cu hruhrang bantuk asi bantuk in Chungkhar ngei tha silonak a langhter.

Ka ngakchiat lio ah Irrawaddy tiva kam ah ka hawile he ti kan i kholh lio ah tikam he aa naihnawnte ah ticholei arak kaicho mi tilawng (tanban) pakhat ka rak hmuh bal. Tanban zahtu cu ader ngaimi nutung nu pakhat asi. A thaunak zawnte kan hmuhsak tuah an ti ah cun apaw pawnte kha hmuhsak ding khi asi ko. Mah nu cu fapawi nu asi. Thli zong nih ralkanh in a hrangmi, ti zong nih ralkanh in a luangmi asi hleiah tha zaang a dermi fapawi nu cu thabat retheih ngai in tan ban (lawng) a zah mi kha lungtha lo ngaiin ka rak hmuh. Tanban (lawng) ahmailei deuh ah athawng ngaimi zuri pa pakhat nuamte in athu i tankan na zahmi a nuar tiin dau hnawh in a sik pah.

Tanban cu tikam he a naihtuk caah cu pa hmai zong kan hmuh khawh. Cu mi pa cu mui a chia i hruhhrang phun khi asi. Tilawng i zahtu a nupi kha ningcanglo aphunphun in a hro len ko. Cu mipa a chimmi chungah a hmaanmi pakhatte a tel ve, cu bia cu;

“Zeihmanh ka let hlah! Kara lai i kan chuih ah cun na nau a rawk lai,” A si, ahmaan ko, Amah (a balah) athazaangpi he a chuih taktak ahcun a pawchung naute cu arawk taktak kho mi asi. Kannih lak i tlawmpalte angan deuh pa te nih cu mipa pi kha toltang in ka chiah lai, tiah angeih ngaika in a chim len. A hnu ah cu a chai taktak lo. Vale hna cu nu pile kha zawnruah in an zaangfah awk asi.

Video zatlan pakhat ka rak zoh bal. (zatkaa) Baisakup min cu ka cing ti lo. Cu zatlan chungah cun puint le Khin Hlaing nih fidi le fitlaw an tuan pah nih cu mitha hna ral in an hrial an leek i ram lak an phar tikah thabat ti lo. Cu tikah Khin Hlaing cu thinphan ngai in a tanglei bang a chim.

“Puint hi cakei nih alak cang maw? Ka thei ti lo, cakei tukha ka zaangfak. Hi tluk anganmi a pum pi kha a pu kho hnga dek maw… ka thei lo,” ati. Nihchuak capo zatlan pakhat asi. A dawtmi kha zaangfah lo in cakei tu kha a zawn ruah mi Khin Hlaing i nihchuak hmuhsaknak cu afiangtuk i cawn awk ziaza a kan pek.

 A nupi kha a sersat ahrem zungzal i zawnruahnak angei lo mipa U Ahtah nih ngaichiat ngai in ahawipa a chimh mi cu;

“Ka nupi hi Kum (30) khengte ka duhnak a ka zulh piak. zei le zei ka chim zong ah a ing peng. zei paoh ka fial mizong aka tuah piak dih. Aka let bal lo; a dinfel, zeitluk in ka tuk velh zongah a in, nupi tha pakhat asi ko. Asinain nizan ah chitkhat lo in a ka hlawt bak ko. Keimah, zeitin hmanh in kaa fiang kho tilo e…. ati. Cu tikah ahawipa nih ka kawi, Kum (30) khengte na sak sersat, na rak hrem caah pei, asiko cu ta, tiah a leh. Zawnruahnak, zaangfahnak a um lo ahcun Chungkhar kong cu afek kho lai lo.