SERNAK KONG BIATHUK

            Pathian nih vawlei hi amah finak ning tein a ser tiah kan zumh. (Cf. Fim. 9:9). Amah duh in a chuakmi a si lo. Pathian duhnak in a chuakmi a si, a sermi hna nih a sinak, a fimnak le a ṭhatnak kha i hrawm hna seh ti a duh. Zeitin tiah nangmah nih zeizong vialte kha na ser i na duhnak in an um i ser an rak si” (Bia 4:11). Cucaah Salm hla phuahtu pa nih a chim: “Maw, Bawipa, na tuahmi hi zeitlukindah an tam? Fimnak in a ser dih hna, Bawipa cu zeizong vialte cungah a ṭha i a zaangfahnak cu a sermi vialte cungah a um dih” (Ps 104:24, 145:9).

            Pathian nih thil ser awk ah a um ciami thil hna kha a herh hna lo, tiah kan zumh. Pathian nih zeihmanhlo chungin a ser dih. Zeihmanh lo chungin Pathian nih a sernak ah hin Bible nih biakamnak le ruahchannak he aa khatmi biatak a si kha tehte a khan. Cuticun fapa pasarih hna thah an huah lioah khan an nu nih tha a rak pek hna.

            “Zeitindah ka paw chungah minung nan can ti kha ka hngal lo. Nanmah kha nunnak le thaw an petu hna hi keimah ka si lo, nan chung i a ummi thil zong ningcang tein a chiatu hi keimah ka si lo, cucaah vawlei sertu, minung hramthawhnak a hruaisertu le zeizong vialte thawhkehnak a petu nih a zaangfahnak in nunnak le thaw kha an pek ṭhan hna lai, atu ah nan nih nih amah nawlbia ruangah nanmah le nanmah nanni philh cang caah van le vawlei khi zoh hmanh ulaw an cung i a ummi hna khi hmu hna u, Pathian nih a um ciami thil hna a ser hna lo ti kha hngal tuah u. Cu bantuk in minung zong hi kan rak si ve” (II Macc 7:22-23, 28).

            Pathian nih zeizong vialte kha zeihmanh lo chungin a rak ser khawh hna ahcun Thiangthlarau chungin misual mi hna chungah a thiangmi lungthin kha ser in Thlarau nunnak kha a pek khawh ve hna. (Ps 52:12) Thawhṭhannak thawngin mithi kha pumsa nunnak a pek khawh. Pathian nih mithi kha nunnak a pek hna i a um lomi thil hna kha nunak ah a auh hna. (Rom 4:17). Pathian nih a bia in muihnak chungah ceunak kha a tlanter khawh ahcun amah a hngal lomi hna cungah zumhnak in ceunak kha a pek khawh ve hna. (Cf. Gen 1:3, II Cor 4:6).

            Pathian nih fimnak in a ser hna caah sermi cu ningcang tein an um. “Zeizong vialte kha a tahnak le a milu le a khing in na chiah dih hna” (Fim 11:20). A zungzal a hmunmi BIA chung le BIA in sermi vawlei hi minung caah a si. Minung cu Pathian muisam in ser an si i, Pathian he i kawmh awk ah auh a si. (Col 1:15, Gen 1:26).

            Minung fimnak nih Pathian fimnak kha a hrawm ve caah Pathian nih sermi thil hna in chimh a kan duhmi vialte kha rethei loin kan hngalh khawh. Sihmanhsehlaw tawidawrnak le upatnak lungthin ngeih a hau. (Cf. Ps. 19:2-5, Job 32:3). Sermi thil hna cu Pathian ṭhatnak in an si dih caah mah ṭhatnak kha an ni hrawm dih. Patahian nih, “a ṭha, a ṭha ngaingai ti kha a hmuh” (Gen 1:4, 10, 12, 18, 21, 31). Pathian nih vawlei kha minung caah a ser i minung kut ah a pek. Bupi nih sermi thil a ṭhatnak kha a dirkamh lengmang.

            Pathian cu a rianṭuanmi nakin a ngan deuh ngaingai. “Na sunparnak cu van hna cungah khan na chiah” (Ps 8:2, cf. Sir 43:28). A si, “Pathian lianhngannak cu kawl khawh a si lo”. (Ps 145:3). Sihmanhsehlaw Pathian cu a luatmi le a sangbik sertu, a ummi thil vialte chuahnak a si caah a sermi hna chungbik zongah a um. “Amah chungah kan nung, kan cawlcang i kanum” (Lam 17:28). Mithiang Augustine nih, “Pathian cu ka sanbiknak nakin a sang deuh i ka chungbiknak nakin a chung deuh”, tiah a ti.

            Pathian nih a sermi hna kha anmah lawngin a chia hna lo. An sining kha a pek hna i a dawmhtlaih, a zohkhenh hna i anmah i tinhnak lei ah a hruai hna. Sertu cungah i bochan hi fimnak le luatnak, lawmhnak le zumhnak a hram a si.

            “Zeitin tiah nangmah nih a ummi thil vialte hna kha na duh hna i, na sermi zeihmanh kha na hua hna lo. Zeicah tiah na huat ahcun zeihmanh kha na rak ser hnga lo. Nangmah nih na duh lo ahcun zeitindah thil cu an hmuh lai? Nangmah nih zeizong vialte kha na zuah hna, zeicah tiah annih cu nangmah ta an si dih; Maw, Bawipa; a nungmi kha a dawmi cu nangmah na si”. (Fim 11:24-26).