2025 Jubilee kum kharnak (2025 Jubilee Closing Ceremony)

Khrih chuahcam 2025 Jubilee kharnak ( Closing Ceremony of @025 Jubilee) puai cu 21-12-2025, Advent Zarhlinak ah St.Joseph Cathedral, Hakha ah Bishop Lucius Hre Kung hruainak in tlamtling tein tuah asi. Zinglei 9:30 am ah pumh thawk asi i Bishop Lucius Hre Kung le siangbawi 22 hna cu hmunṭhu siangbawi umnak (Clergy house) inntual in an rak i thawh i St.Joseph Cathedral Biakinnpi lei ah artlang tein an ra lut. Cu lio ah Biakinn chung le a lenglei in zumtu hna nih dir buin 2025 Jubilee hla (Kawl holh) in an sak. Bishop le siangbawi hna le a bawmtu (altar boys) hna cu Biakinnpi chung ah an lut i innchung lei in Bishop nih Jubilee kum a dih cang, kan dong cang ti hmelchunhnak ah Biakinnpi innkapi cu a khar. Bishop le siangbawi hna cu Biakṭheng lei ah an kal i Biakṭheng upatnak le rimhmui (incense) pekchanhnak an ngei.

Mino hna nih Bible relnak, Salm hla saknak le Khrihfa hna caah thlacamnak a phunphun tuahtawnmi ṭuanvo an lak. Rev.Fr.Joseph Aung Lwin nih Thawngṭhabia a rel i Bishop nih Thawngṭhabia a chim. Missa raithawinak a dih ah Rev.Fr.Dominic Thawm Hlei Hnin nih a rak tuahmi ca bia (essay) zuamnak ah laksawng a ngahmi hna laksawng peknak an tuah. Cu laksawng peknak a dih in Bishop le siangbawi group hmanthlaknak, Bishop, siangbawi hna le laksawng ngahtu hna group hmanthlaknak le Bishop siangbawi hna le Brother, Sister hna group hmanthlaknak an ngei lio ah 2025 Jubilee hla (Hakha holh) in mipi nih an sak. Pumh a dih ah Bishop le Siangbawi, Sister hna cu pa ngakhchia umnak boarder inn tangdot ah chuncaw ei ṭinak an ngei i mipi hna cu Biakinnpi cungdot ah zapi rawldumṭinak an ngei.