A Thiangmi Innchungkhar Puai, Holy Family

Audio (aw) zong in ngai khawh a si. 👇👇

Joseph, Mary le Jesuh innchungkhar cu Thiangthlarau nih a umpi hna caah a thiangmi innchungkhar an si. Joseph cu kutzungthiam rianṭuannak in pawcawmnak a kawlmi a si i a dingfel mi pasalṭha a si caah a ṭuanvo tlamtling tein a hngalmi pa pakhat a si. Pathian duhnak kha a nunchung dihlak ah a tuahmi zong a si. “Pasal hna, nan nupi kha daw hna u; Biahrang in ti hna hlah u, nan fale kha an ing puanter hna hlah u, cuti nan tuah ahcun lungder lungrawhnak leiah an phan lai”. (Kol 3:19,21)

Mary cu ngaknuthiang Jesuh nu a si i duhnungmi nupi pakhat zong a si pinah nunnem mi nuṭha pakhat a si. Lungdongh hngal loin rianṭuan aa zummi nu pakhat a si i chungkhar caah a herhmi vialte kha a rak ṭuan. Pathian duh ningin, “Pathian he aa tlakmi a si bantukin a va uknak tangah a um”. (Kol 3:18). “Jesuh cu a nu le a pa bia kha ngaih buin a ṭhang chin lengmang i fimnak lei zongah a ṭhang i Pathian hmai le minung hmai ah mithmaiṭha a hmu. (Lk 2:51-52).

A thiang innchungkhar cu sifah harnak, sersat hremnak le ralzaam sinak hna kha an nunnak ah an rak ton. Mifim pathum hna an chuak, an kirṭhan tikah Pathian Vancungmi pakhat cu Joseph kha a mang ah a langh i, “Tho law, ngakchia le a nu kha i kalpi hna law Izipt ram ah va zam u; cun chuak cang u, kan ti hna hlan tiang cuka ahcun va um u, Herod nih ngakchia hi thah awkah a kawl lai” tiah a ti. (Mt 2:13). Cu tikah Joseph cu a tho i ngakchia le a nu cu Izipt ram i zampi awkah zan ahkhan a thawhpi hna. Cuka ahcun Herod a thih tiang an um. Herod a thih hnu ah Bawipa Vancungmi pakhat kha Joseph mang ah a langṭhan i, “Tho law, ngakchia le a nu kha Isarel ram ahcun hung kirpi cang hna; Ngakchia nunnak thah awkah a rak kawltu hna kha a tu cu an thi cang” tiah a ti. (Mt 2:19-21). Joseph cu a tho i ngakchia le a nu kha a lak hna i Isarel ram ah a kirpi hna. Cun Galilee ram, Nazareth khua ah an va um.