St. John, Apostle & Evangelist (101)

Audio (aw) zong in ngai khawh a si. 👇👇

Bawipa Jesuh i a dawtmi zultu, Thawngṭhabia ṭialtu St. John-St. John the Evangelist cu Zebede fapa St. James the Great nau a si. Galilee rili ah an unau pahnih in an pa he tilawng chungah sur an thlop lio kha Jesuh nih a hmuh hna i a auh hna. Mah hna unau zong nih, an pa le an sur kha an kaltak i Jesuh hnu an zulh colh. (Mt 4:22). Jesuh nih annih pahnih kha Khuarifa-Son of Thunder ti sullam in Boagegers tiah minthar a sak hna. Jn 13:27 ah Johan cu zultu vialte lakah a hmebik a si i amah hrimhrim nih “Jesuh dawtmi” tiin a rak ṭial. Jesuh Khrih muihmel thlen lioah a um ve mi a si i hmanungbik zanriah dum lioah “Bawipa, nangmah an zuartu ding pa cu aho hi dah kan si? tiah Jesuh ṭang hngat in a rak hal mi pa kha a si. Jesuh Vailam an tah lio zongah zultu vialte hna lakah amah pakhat lawng Vailam tung hram ah a rak um i sunglawi bawibik ṭuanvo a simi Pathian Nu kha zohkhenh dingah Bawi Jesuh nih ṭuanvo a rak pek. Tuanbia ningin nunnak thiang Mary Vancung an cawinak kong kha a dirkamh i AD 49 kum, Ephesus khua ah a rak um. Cu hnu ah Biathlam a rak ṭialnak The Island of Patmos tikulh leiah ram chungin ṭhawlnak a rak ing. Cu tikulh ah kum tlawmpal a rauh hnu ah Ephesus khua ah a rak kir i Pathian he pehtlai mi sullam fianternak phungchimnak cauk 3 a rak ṭial. “Pathian cu dawtnak a si” (1Jn 4:7). A Bible ṭhabik a simi biaknak lei phung kong (asiloah) lunglawmh awk thawngṭha zong Ephesus khua ah a rak ṭialmi a si.

A kum a upat tikah a tuuruun (Khrihfa) hna kha Johan nih, “Ka dawt ka fale hna, pakhat le pakhat i daw u” timi biathiang (Bible) lawng kha atu le atu a chimh tawn hna. Annih zong nih zeicahdah hi Bible lawng hi atu le atu na kan chimh tiah an hal tikah, “Zeicah ti ahcun hi biafang cu Pathian Bible biathiang a si caah a si; nannih zong hi tluk tal cu nan tuah awk a si. Hi bangin nan tuah ahcun nan caah a za ko cang” tiah a rak leh hna. St. John cu AD 101 kum, Ephesus khua ah a thi.