Sualhram ngei loin aa Demmi Nu Mary Puai kong he pehtlai in President Trump nih a chimmi bia
Nihin December 8 ni ah, Jesuh i nu a simi le Bible chung i mi lianngan pakhat a simi Mary i zumhnak, toidornak le dawtnak upatnak Ni Thiang a hmangmi American mi vialte hna nan dihlak in nan kut kan tlaih hna.
Mah ni ah, Catholic hna nih an zumhnak a simi, sual hram ngei loin aa semmi, Pathian i Nu a simi Mary puaini cu an tuah. Bible thiang nih a chimning ahcun, amah cu Nazareth khua ah, ngaknu note a si lio ah Vancungmi Gabriel nih khuaruahhar ngai a simi thawngpang pakhat in a rak chawnh: “I lawm ko, vel in a khatmi nu, Bawipa cu na sinah a um” tiin thawngthanhnak a tuah i “nau na pawi lai i a min ah Jesuh tiin a min na sak lai” tiah a rak ti.
Tuanbia chungah biapi ngaiin thil pakhat a cangmi cu, Mary nih Pathian duhnak kha zumhnak le toidornak he ralṭha ngaiin a rak cohlaan nak: “Zohhmah, kei cu Bawipa salnu ka si. Na bia bangin ka cungah si ko seh,” timi kong kha a si. Mary nih Pathian bia cohlaan dingin aa tinhmi nih khan minung nun-can sining vialte kha zungzal in a rak thlen. Thla 9 a si hnuah, minung sual tlanhnak caah le vawlei khamhnak caah vailamtahnak cung a nunnak a pe hnga dingmi Fapa Jesuh cu Mary nih a hrin i, Pathian cu minung ah a hung cang.
Kum 250 dengmang chung, Mary nih kan America mi hna tuanbia ah ahleiin hmunhma lak in a um. 1790 kum, ralpi a dih hnu kum hra hmanh a tlin hlaan ah, Zalonnak Phuannak min a thutu Charles Carroll i a unau a simi, United States ah a hmasabik Catholic bishop a simi Bishop John Carroll nih ‘Ram no tharte’ a simi kan rampi cu Khrih i a Nu a simi Mary nih zohkhenh dingah apnak a rak tuah, a rak pekchanh. Kumzabu cheu tluk a rauh hnuah, General Andrew Jackson nih New Orleans raldohnak ah British mi hna cungah khuaruahhar ngaiin teinak a hmuhmi cu Mary i bawmhnak thawngin a si tiah catholic hna nih an rak ti. Khuapi khamhnak ah Mary i bawmhnak philhlonak caah tiin, kum fatin January 8 ni paoh ah New Orleans ah catholic hna nih lawmhnak puai zong an tuah.
Kum caan saupi chung, Pathian sunparnak caah an nunnak a hmangmi Pathian rianṭuantu Ann Seton, Frances Xavier Cabrini, le Fulton Sheen tibantuk American i minthang hna zong nih Mary cungah upatnak thukpi an ngeih hna. Kan ram khualipi laifang ah a ummi “Sualhram ngei loin aa semmi Bawinu Biakinn” – ‘Immaculate Conception Nation Shrine Basilica’ cu chaklei America (North America) ah a ngan bikmi biakinn in Mary cu upatnak an pek. A ṭhing kho lomi Pathian hla “Ave Maria” cu rel cawk lo rammi hna nih an duh bikmi hla zong a si peng rih. Mary nih rel cawk lo biakinn si hna seh, siizung le sianginn hna an dirh hnanak ah thazaang tampi a pek hna. American college hna le university 50 hrawng nih Mary min an put. Cun, atu in ni tlawmpal ah, December 12 tiang, United States le Mexico i Catholic hna nih, Mexico mi hna lungthin ah hmunhma a labikmi Basilica of Our Lady of Guadalupe (1531), Mary sin upat peknak puai hna zong pehzulhin an tuah lai. America mi hna i zalonnak kum 250 kan panhlio caan zongah, America le kan rili hna lonh tiangin daihnak, ruahchannak le dawtnak ṭhanchonternak caah Mary i kilkawi-zonhkhenh, tlangtlak piaknak hna caah lunglawmhnak tampi kan ngei.
Kum zabu pakhat leng a liam cangmi, Vawlei Ralpi Pakhatnak lioah, Roman Catholic Khrihfabu hruaitu a simi Pope Benedict XV nih, Daihnak Siangpahrang Bawinu Mary zuk (milem) kha a tuahter hna i pekchanhnak a rak tuah. Cu zuk (milem) ah cun bawhte Khrih nih Olive thinghnah (daihnak hmelchunhnak) aa putmi a cuanhter i zumtu hna zong nih ṭihnung thah-nawnnak hna kha ngol in ‘daihnak’ kha i nunpi ding le i cawn dingin thazang a rak pek hna. Thla tlawmpal a rauh ah Vawlei Ralpi Pakhatnak cu a rak dih taktak. Nihin ah, ral vialte a dih-daihnak hnga le Europe le vawlei cung pumpi ah daihnak, rumnak le a hmunmi remdaihnak chan-thar a umnak hnga caah thla kan cam. Thazaang thar le ruahnak ṭha hna kan ngeihnak hnga ca zongah Mary sinah bawmhnak hal in kan mit kan hoih ṭhan.
Mary upatnak caah le kan ram um Catholic hna ca i a sunglawi tukmi Ni Thiang ah hin, chan tampi chung America ram um zumtu hna harsat caan ah bawmhnak, hnangamnak le bawmhnak a petu bia-thiang hna kha theih ruah chih in:
Velngeihnak in a khatmi, Maw Mary i lawm ko. Bawipa cu na sinah a um. Nangmah cu nu vialte lakah thluachuahnak a hmumi nu na si. Na chungin a chuakmi Jesuh cu thluachuak a si. Mithiang Mary, Pathian i Nu, misualmi kan caah, atu le kan thih lai caan ah thla kan cam piak ko. Amen.