MINUNG CANNAK
Mithiang Johan chimmi “Bia cu minung ah a cang” timi kha lak in Bupi nih, Pathian Fapa nih a kan khamhnak tlinh awkah minung sinak a rak lakmi kha, “Minung cannak” a ti. Mithiang Paul nih a phuahmi hla ah khan Bupi nih “Minung cannak” biathuk kong hla kha a sak.
“Nanmah lak ah mah lungput hi ngei u, cucu Jesuh Khirh ah nanmah ta a si; amah cu Pathian a si nain Pathian he i tluknak kha aa tim lo, sihmanhsehlaw amah le amah aa niam ter i sal cannak kha a lak. Minung he i lawh in hrin a si. Minung a vun si tikah amah le amah aa niam ter i vailam cung thihnak tiangin nawl a ngai.” (Phil 2:5-8).
HEBRU CAKUAT nih hi biathuk kong kha a chim ṭhiamṭhiam. Khrih nih hi vawlei cungah a rak tikah hi tin a chim, “Thawinak le laksawng kha na duh lo; sihmanhsehlaw ka caah pum kha na ka ser piak; khanghthawinak le sualthawinak kha na lung a si lo; cun keimah nih ka chim; zohhmanh, nangmah duhnak tuah awkah ka ra cang, Maw, Pathian” (Heb 10:5-7).
Pathian Fapa minung a cannak ah zumhnak hi Khrihfa zumhnak ah a fiangmi hmelchunhnak a si. “Mah hin Thiang Thlarau cu nan hngalh lai. Jesuh Khrih cu minung in a ra, tiah a phuangmi paohpaoh cu Pathian sin in an si”. (I Jn 4:2). Mah cucu hlanliopi in Bupi nih biaknak kong biathuk a vun sakmi ah lawmhnak in a fian ter. “Amah cu minung pum in a lang.” (ITim 3:16).
Pathian taktak le Minung taktak
Pathian Fapa minung a cang ti tikah Jesuh Khrih cu a cheu Pathian, a cheu minung, tinak a si lo. Cun minung sinak le Pathian sinak i kawmh in a rak chuakmi thicawh (kahpia) a si fawn lo. Amah cu Pathian taktak a si buin minung taktak a si. Kumzabu hmasa hrawng ah hi kong palh in a cawnpiakmi hna sin khan Bupi nih a rak dirkamh i a rak fianter.
Hmasabik palhnak cawnpiaknak hna ah a minung cannak tluk in a Pathian cannak kha an al lo. Lamkaltu hna chan in Khrihfa zumhnak nih Pathian Fapa minung a cannak kha a chim zungzal. (IJn 4:2-3, IIJn 7). Sihmanhsehlaw kumzabu pathumnak ah khan Bupi nih Antioch khua Council ah Samosata khua mi Paul cawnpiaknak kha al in, “Jesuh Khrih cu a sinak in Pathian Fapa a si, cawmnak in a si lo,” tiah a fehter ṭhan. Cun Arius nih, “Pathian Fapa cu a um o mi in a rami a si i Pa Pathian he cannak a khat lomi in a rak,” tiah a cawnpiak. Nicea khua Bupi Council meeting n ih mah cawnpiaknak kha a hlawt i, Pathian Fapa cu, “hirn” a si, “ser” a si lo. Pathian he cannak aa khat,” tiah zumhnak bia a fehter.
Nestorian palhnak cawnpiaknak nih, “Khrih cu a minung sinak kha Pathian fapa sinak chungah fonhchih a si,” tiah a ti. Hi palhnak cawnpiaknak kha doh in Mithiang Cyril (Alexandria) le Efesa khua i a voithumnak Bupi meeting nih, “Bia cu ruahnak a ngeimi thlarau nih nunnak a pekmi taksa kha a person ah a fonhchih i minung a cang,” tiah a ti. Khrih minung a sinak cu a nu nih a pawi cangka in Pathian Fapa i mi person a si. Mah ruangah hin Efesa Council nih A.D. 431 ah Pathian Fapa kha minung in a pawi caah Mary cu Pathian Nu (a nu) taktak ah a cang, tiah a ti.
Monophysite pawl nih, Pathian Fapa nih miung cannak a rak lak tikah a minung sinak cu a dih,” tiah an ti. Cu bantuk in palh cawnpiaknak a vun chuah tikah A.D. 451 Chalcedon Council meeting ah, “A thiangmi pupa hna bantuk in kannih nih kan Bawipa Jesuh Khrih cu pakhat lawngte a si, Pathian cannak a tling, minung cannak a tling. Pathian taktak a si; minung taktak a si; Pathian he cannak aa khat; sualnak ti lo cu kanmah he zeizongte ah kan i lo dih,” tiah a fian ter.
Cuticun Bupi nih Jesuh Khrih cu ṭhen khawh loin Pathian taktak le minung taktak a si. Amah cu Pathian le Bawipa a sinak kha hloh loin minung le kan unau ah a rak cang i Pathian Fapa taktak a si, tiah a zumh.