NGAIHTHIAMNAK TIMI CU
“Minung a simi paoh nih palhnak he a luat kho lo, vawlei cung ahhin sualnak in a thiangmi an um lo” timi bia kha kannih a nungmi pawngkam ah kan theih peng ko lai. A si ko, Minung a simi paoh nih palhnak he kan thiang lo. A tam le tlawm lawnglawng a dang lai. Cucaah a palh thiam minung kokek, palhnak a tlawm cu minung thil ti khawhnak timi phungthlukbia a rak chuahnak a si lai. Sihmanhsehlaw, “Palh thiam cu minung kokek” timi bia kha phung ah i tlaih in pehzulh palhnak zong cu a si velo. Minung taktak si ahcun palh thiam a si bang ngaihthiamnak ngeih zong thiam a hau ve. Palhnak he a thiang lomi ciocio khat le khat cungah nan i ngaihthiam lai. Ngaihthiamnak thiamding zong kan cawn hna lai. Mi sinin ngaihthiamnak kha kan duh ahcun mah pumpak zong nih ngaithiam a thiammi, minung si hmasa a hau. Bawipa Jesuh nih ngaihthiamnak he pehpar in konglam pathum in a kan cawnpiak.
Pakhatnak cu Pathian nih kannih kha midang kha ngaihthiam ding/ ngaihthiam lo ding i thimnak nawl a kan pe lo. Zeicahtiah ngaihthiamnak dinnak lawnglawng nih kannih minung umnak vawlei a phu/ bu ah dai tein nun, nuam tein um khawh nak caah a ṭha bik thazaang pakhat a si caah a si. Cucaah Dawtnak ngeitu Khrih Bawipa kha a biami kannih Khrihfa hna cu, ngaihthiam a thiammi si khawh kan i zuam ding a si.
Pahnihnak cu; Kannih ngaihthiamnak cu rikhiah a um lomi, a thawknak le donghnak a ngei lomi ngaihthiamnak phun a si a hau. Bible hlun chanah mi pakhat kha voithum lawng na ngaihthiam lai tiah zulhphung siikaan upadi a pek. Voithum na ngaihthiam ahcun mi pakhat caah a dih donghnak ngaihthiamnak a si tiah a theimi St. Peter cu Bawipa Jesuh Khrih kha, “Voisarih tiang ka ngaihthiam lai maw?” tiah a hal tikah “Voi sawmsarih let sarih” tiah Jesuh nih a rak leh. A chim duhmi cu ngaihthiamnak timi cu rikhiah a ngei lo, hauhruang a ngei lai lo. Rikhiahnak um loin na ngaihthiam lai, a ti duhnak a si. Kan pawngkam i chungkhar lakah chimtawn, theih tawnmi bia a um. “Nangmah fa hi na luan tuk cang; hi hnu voikhat sicun na fawi lo ti thei! Voihnih kan ngaihthiam cang hi mu, a tu a hnubik si cang seh, a hnu voikhat sicun keimah ṭhat lo ti hlah!” timi bia hna an si. A taktak in hibantuk bia hna kha ṭhatein kan ruah ahcun midang cungah annih i ngaihthiamnak cu rikhiah mi hauhruang chung lawnglawngah ngaihthaimnak phun a si.
Pathumnak cu; Ngaihthiamnak cu a tling, a dih cikcekmi thil a si lai. Chim duhmi cu kannih midang pakhat kha kan ngaihthiam tikah midang nih pekmi fah innak asiloah hliamhma hna zong kha vaan khatte chungah kan philh in kan hloh ding a si. Mah nih ngaihthiam cangmi kongkau hna kha kan philh awk a si lai. Fahnak hlun kha fahnak hna si ṭhan lo dingin kan hrial awk a si lai. Mi cheukhat nih an chim cio, Keimah, keimah nu nih midang kha ka ngaihthiam khawh ko nain, philh khawh ding cu a si lo; a hmaan ko. Ngaihthiamnak timi cu philh hlohnak a si lo bantukin zaangder chamhbaunak zong a si fawn lo. Midang nih kan cungah an palh ko hmanh ah, kanmah zong midang cungah a palh thiammi minung pei ka si hi timi zawnruahnak thinlung he theihpiaknak a si. Ngaihthiamnak cu zaangder ruangah a sung pek nak a si lo.
Ngaihthiamnak timi cu mi pakhatkhat nih mah cungah palhnak a tuah hmanhah mah mipa/nu kha zalong tein donnak a si. Ngaihthiamnak timi cu palhnak kha palhnak in leh rulhnak a si lo. Ngaihthiam a thiam mi thinlung kha a ngeimi minung cu vawlei cung ah aa nuam bikmi minung pakhat a si. Bawipa Pathian nih kannih kan sualnak kha a kan ngaihthiam zungzal bangin kannih zongnih kan ral kha ngaihthiam khawh dingah, dawtnak hmuhsak khawh dingah, ngaihthiam a thiammi minung si dingah thazaang veel zuarhmi a u le cungah a rak ngaithiammi Joseph bantuk a simi minung hna, amah kha thah dingah vawlei leh dih tiangin a rak kawlmi Siangpahrang Saul cungah David Siangpahrang nih a rak ngaihthiam bantukin a ral kha a ngaihthiamnak dinnak kha a rak hmuhsak mi Mithiang St. John Paul II bantuk a simi minung hna si khawh i zuam cio usih!
“Nanmah an hremtu hna kha Pathian sinah thluahchuah hal piak hna u; chiatserh nak siloin thluachuah nak kha halpiak hna u; Na ral cu a rawl a ṭam ahcun rawl va pe, Ati a hal ahcun ti va pe; Cuti na tuahnak nih cun a lu chungah meiṭil na chonh asi lai; Ṭhatlonak kha i teiter hlah u; ṭhatnak tuin ṭhatlonak kha tei i zuam u”
(Rom 12:14, 20-21)