St. Cecilia, Virgin and Martyr

Audio (aw) zong in ngai khawh a si. 👇👇

Ngaknuthiang le Martyr

Ring-awn thiamsang hna kha a bawm i a zohkhenhtu Mithiang Cecilia cu Rome khua i upat awktlak innchungkhar in kumzabu (2) a chuak. Nungakthiang sinak in a nunchung um dingah bia aa kam nain, a nu le a pa nih hramhram in an fial ruangah upat tlakmi Valerian he an i um. Tthit-umhnak puai an tuah liopi ah Cecilia cu a dang tein a tthu i, a lung chungin Pathian thangtthatnak hla kha a sa. Cu ruang ahcun a hnu ah hlasak ring-awn fimthiam hna Mithiang tiah thanhnak a hmuh. A khaan chungah an i dinh tikah Cecilia cu Valerian kha a lung a thlenter khawh i, nuva sinak kha i sum dingin an hna a tla. Valerian tipilnak a in hnu ah Vanmi pakhat cu Cecilia pawngah a dir i, Rose pangpar le Lily pangpar in thilmi luchin kha Cecilia lu cungah a chinh lio kha a hmuh.

Cecilia cu a vapa i a naupa Tiburtius zong kha a lung a thlenter. AD 192 kum ah Commodus nih Bupi kha a hrem tikah annih unau pahnih hna zong Pagus Triopius an timi Rome khua in kilometer tlawmpal aa hlatnak hmun ah a biathiang caah thihnak an rak ing ve. Siangpahrang Prefect Almachius hmai bak ah a zumhnak a hmaannak kong kha fek tein a chim dih hnu ah a hngawng ah voithum bak tuknak a ing i, thi lak in an chiahtak. A ruak cu St. Carlistus i vawlei tang thlan chungah an rak vui i, a hnu ah Trastivere i St. Cecilia Biakinn ah an rak tthial. 1599 kum ah Cecilia i a rak cu thu lo in le amah ning tein a um kha an hmuh.