15 November Saturday
🎧👇
Bible: Luke 18:1-8
Aa zuammi nuhmeinu kong bianabia
Jesuh nih amah Voice Mail (Awthawng Ca) kha install tuah dingin biakhiahnak a tuah ahcun zeitin? Thla na cam i hitin na theih lai tiah na mitthlam ah cuanter hmanh: “Ka Pa Inn na ka auh caah kan i lawm. A tanglei thimnak hna lakah pakhatkhat kha thim: Nawlnak caah 1 hmet; Lawmhnak caah 2 hmet; Lungtlinlonak caah 3 hmet; A dang biahalnak vialte caah 4 hmet” ti a siah cun kan thlacamnak cu zeidah a cang lai?
Thlacamnak cu nihin thawngṭha i a tlangpi pakhat a si. Cun thlacam hi Pathian sinin laksawng a si. Mah cu seh zong a silo i magic formula (mitleh serning) thil zong a silo. Kanmah leiin raldohnak a herh, zeicahtiah dawtnak le mah le mah i pekchanhnak tuahsernak a si. Thlacamnak nih rian a ṭuan, kan i zuam i Pathian kha kan tuahter ahcun a ṭha. Voikhat hnih cu a chuahtermi kan hmu lai lo. Thlacamnak in Pathian kawl peng cu thlacamnak theipar ṭhabik a si cang.
Thawngṭha nih minung pahnih aa telmi; a ding lomi aa porhlawmi biaceihtu le toidornak a ngei i aa zuammi nuhmei; tahchunhnak pakhat a kan pek. Biaceihtu nih a hramthawk ahcun zeiah a rel lo, asinain a donghnak ahcun a lung a sautuk caah dinnak a pek. A lung a dong lai lo i a kal lai lo caah a donghnak ahcun amah tu hi a lung a dong i amah caah a ra. Cu tikah Jesuh nih a chim duhmi kha a chim. A ding lomi biaceihtu nih hi nu hi dinnak a pek ahcun Pathian nih a thimmi hna caah zeitluk in dah dinnak a chuahpi lai tiah a ti. Hi thawngṭha bianabia hmangin Jesuh nih thlacamnak kong ah zeidah a kan chimh? Thil pathum a um:
Pakhatnak ah, Pathian nih thla kan cam tikah a kan ngaihpiak tiah a kan chimh. Asinain Pathian nih kan thlacamnak a kan lehning cu kanmah caan suaimi ning in a si lo. Hihi kan palhnak a si tawn i cu nih cun Pathian cu zeitik caan le zeitindah tuah seh ti kan duh, cucu Amah si loin kanmah caan suaimi ningin a tuah awk a si tiah kan ruah tawn. Kan mit hmuhnak cu rikhiahmi, donghnak a ngeimi le a hramthawk tein donghnak hmuh khawh lomi a si ti cu zei a si hmanhah kan lungthin chungin a chuak (luat). Cucaah kan lung a dong tiah kan phunzai, Pathian cu kan cungah zeihmanh a rel lo tiah kan puh i zumhnak in kan nung lo. Asinain ahmaanmi cu Pathian nih kan herhmi thilṭha vialte kha kan halnak lawngin le thlacamnak ah kan lungsaunak thawngin a kan pek. Tamdeuh in kan hal ticu toidornak kan ngei lo tinak a si lo. Kanmah a kan dawtu le kan duhmi le kan caah aṭha bikmi pek a kan duhtu Pathian he kan i pehtlaih ti kha kan i cinken a herh. Kan hal tikah dawtnak le toidornak he kan tuah a hau.
Pahnihnak ah, thla kan cam deuhdeuh ah amah he kan i naih deuhdeuh lai tiah a kan ti. Cun, thla kan cam tikah kan halmi cu aa thleng thluahmah lai. Hngak ko usih law lung sau ko hna u sih. A donghnak ahcun kan duhmi cu kan herhmi a si ko lai. Cun tuah kan herhmi cu kan ruahnak, kan chunmang le kan tumtahnak hna kha Pathian thil hmuhning he aa tlakmi siter kha a si.
Zeitluk indah thla kan cam? Zeitluk in dah kan hal? Zeidah kan hal hna? Zeidah kan duh taktak? Kan duhmi le kan herh taktak mi kha kan thleidang maw? Cun Pathian kan dawtnak in a kan pekmi cungah, cu zumhnak le bochannak cu kan ngei taktak maw?
Pathumnak ah, “zungzal le lungdong loin thlacam a herhnak” kha a langhter. Mi tampi nih nawlnak thlacamnak kongah buainak kan ngei nain thangṭhatnak le lawmhnak thlacamnak kongah buainak kan ngei lo. Sihmanhsehlaw, thil pakhatkhat caah Pathian sinah lawmhnak chim cu a sullam a um ahcun hal zong a sullam a um ve awk a si. Thlacamnak nih Pathian lungput a thlen tiah kan ti kho lo, asinain a kan thlen: Pathian nih a kan dawtnak duhnak he aa tlakter. Jesuh nih a Pa he pumpak le naihniam tein a fekmi pehtlaihnak a ngeih bantukin, kannih zong balo le catloin thla kan cam zungzal tikah amah cu kanmah he a um ve.
Ka ulenau hna, a donghnak ah Samuel Johnson nih, thlacamnak nih amah tein tehte a herh lo, zeicahtiah a tehte cu a chunglei ah a um tiah a ti. Minung sining le rianṭuannak ah a um, thawchuah, ei le din bantukin a si i a sining taktak ah aa telmi a si a ti.