October 29, 2026

Wednesday 👉🎧👇

Luke 13:22-30

Khamhnak le hlawtnak

Mithiang Matthai Thawngṭha (7:21) ah, Bawipa min, ‘Bawipa, Bawipa,’ ti lawng in vancung pennak luh khawhnak ding caah a zalo nain Pathian duhnak tuah cu a herhmi a si tiah an kan chimh. Cun Lamkaltu 2:21 ah, zeitindah khamhnak hmuh khawh a si timi kong ah hitin a ti: “Bawipa min a aumi paoh cu khamh an si lai.” Bible Caang pahnih karlak ah aa kalhmi a umko rua tiah a lang. A ngaingai ti ahcun, aa dang dihmi thil pahnih kong an chim caah pakhat le pakhat an i kalh lo. Khamhnak cu zumhnak lehnak ah man loin pekmi laksawng a si; Vancung Pennak chung luhnak cu Pa duhnak tuah ruangah pekmi laksawng a si.

Nihin thawngṭha ah mibu chungin pakhat nih Jesuh kha hitin a hal: “Bawipa, mi tlawmte lawng khamh an si lai maw?” Biahalnak cu a leh lo. Cu bantuk cun Biakinn hrawhnak kong a chim tikah, an theih duhmi cu, ‘Zeitik ah dah a si lai?’ (Mt 24:3) ti lawng kha a si. Cu biahalnak zong cu a leh lo. “Hi pa nih hin zeitindah a sa cu ei awkah a kan pek khawh lai?” (Johan 6:52), aphi a um lo. “Zeitindah mi cu a tar hnu ah hrinṭhan khawh a si lai?” Nikodemu nih a halmi (Johan 3:4), zong lehnak a um lo. Cu nakin hitin a ti hna: “Kutka bit in luh khawh i zuam u, zeicahtiah mi tampi nih an i zuam lai nain an thazaang a der lai.” Jesuh nih ahodah vancung ah a kai lai timi biahalnak a lehnak ah a chimmi a si. Amah chan lioah rabbi tampi nih, anmah le anmah aa thleidangmi misual tlawmte dah ti lo cu Israelmi vialte khamh an si lai tiah an rak ruah. Zeizong vialte hnuah, annih cu Pathian nih anmah he biakamnak a ser tikah ahleiin thimmi an si. Jesuh nih biahalnak cu direct in a leh lo. Sihmanhsehlaw, hi thawngṭha chungah hin, Jesuh nih khamhnak kong he pehtlaiin abiapi tukmi thil pahnih a chim:

Pakhatnak ah, Jesuh nih a bia a ngaimi hna kha biakamnak a tuahmi hna chungtel sinak nih Pathian Pennak chungah an lut lai tinak a si lo tiah a ti hna i a khuaruah a harter hna. Cun Jesuh he i theihhngalhnak nih Amah he zungzal nunnak i hrawm awkah amah tein aa tlakmi a siter hna lo. Jesuh nih an chimmi kha fek tein a al. Amah he pehtlaihnak an ngei lo. Phundang in chim ahcun Jesuh he biologically (ဇီဝဗေဒအရ – nunnak kong lei) in an i khat ko nain thlarau lei in cun Amah caah khual an si.

Pahnihnak ah, Jesuh nih miphun dang hna chungin mi tampi cu Pathian pennak chungah an lut lai tiah a ti. Khamhnak caah Pathian i, sawmnak cu Judah mi le Jentail mi caah a si. Hihi khamhnak sining cu vawleicung pumpi sining a si. Vancung Pennak ah a um lai tiah kan ruah bal lomi minung hna an um ko lai kan khuaruah a har lai. Hi hna hi ahodah an si lai timi fiang tein a chim lo. Amah nih a chimmi cu: “Nichuah le nitlak le chaklei le thlanglei in mi an ra lai…” Phundang in chim ahcun, hi bia nih hin Vancung nih Hindu, Muslim, Animist, Buddhist, Taoist bantuk minung a cohlan hna lai ti lawng a langhter; Pathian a zum lomi, thilri chawva a duhmi, sualphawtmi, nu le pa sualnak a tuahmi, rithai sii zuartu, ralhrang, hlennak a tuahmi le a dangdang hna an thih hlanah Pathian leiah aa mermi an tam deuh men lai.

Biatak tein chim ahcun, Pathian Pennak chung luh tikah thazaang he tukforhnak i dohnak le a duhnak tuahnak ah a kan dawnkhantu thil paohpaoh, zeipoi lonak le duhnak fonh tibantuk hna kha kan doh a hau. Thawngpang ṭha cu kanmah lawngin kan i zuam lo. Pathian nih a kan umpi i a vel hi a za ko. Jesuh nih teinak tling kan hmuh lai tiah a kan zumhter.

Cun cucaah, dawtmi ulenau hna, hneksaknak le tukforhnak caan ah Pathian vel le bawmhnak kha kan i bochan maw? tikha kanmah le kanmah i halṭhan hna u sih.