October 15, 2025 Nithumni
Luke 11:42-46
Farasi mi hna le Phungbia mifim hna caah ngaihchia a va si dah
Nihin thawngṭha ah Jesuh nih cawnpiaktu le upadi thiamsang hna sinah ‘nan caah ngaihchia a va si dah’ tiah a ti hna. Hihi an biaknak tuahsernak cu Pathian dawtnak in a chuakmi a silo ti langhternak caah a si. Pathian bia an ngaih lo caah le Pathian lam ah an hruai dingmi hna kha an hruai sual hna caah a si. Nawlbia pahra le nawlbia hna kha ahme tete phunglam le zulhphung thong tampi ah an ṭhen hna. Pathian dawtnak le innpa dawtnak tibantuk biaknak kong abiapi deuhmi hna kha an hlawt i, a herh lomi le a ritmi phunglam hna kha an herh. Pathian lei si loin Farasi biaknak leiah mi an hruai hna.
Hi phungbia cawnpiaktu hna bantuk kan si tikah a tanglei lungput hna hi kan lakah a um: thinhunnak, nahchuahnak, ralchanhnak, saduhthahnak, ziaza rawhralnak, thurhnawmhnak le ningcang loin tuahsernak, siasal biaknak, khuachia thiamnak, zuritnak le nuamhnak puai hna an si.
A ngaingai ti ahcun Jesuh nih hi nawlbia cawnpiaktu hna hi a mawhchiat hna tikah Pathian dawtnak le innpa dawtnak timi Pathian nawlbia a hrampi kha a langhter. Pathian cu dawtnak a si i a tuahmi thil paoh cu a kan dawtnak in a luang. Dawtnak cu raithawinak a si i nawlbia pahnih nih midang thilrit kha a pom i a cawi.
Francis Kong nih a ṭialmi One Day At A Time (vol. 3 pp 177-178) chungin tichung pilmi pakhat le a philh khawh lomi hmuhtonnak kong ka relmi tuanbia pakhat a um. Pathian a zum lomi in a ṭhangmi tlangval pakhat cu Olympic puai ah tichung pil thiam awkah aa cawn. A nunnak ah biaknak lei in huham a ngeimi cu biachim a thiammi Khrihfa hawikom sinin a rami a si. Tichung pilmi minopa nih a hawipa phungchimnak kha a ngaituk bal lo nain a theih tawn hna.
Zankhat cu tichung piltupa cu a kaimi sianginn ah innchung ti kholhnak ah a kal. Meiinn vialte cu an mit dih nain tidil cu vancung ceunak nganpi a ngeih caah le thlapa a ceu caah, cawnnak caah ceunak tampi a um.
Tlangvalpa cu a sang bikmi tichung pilnak thingphel ah a kai i thingphel kam i tidil lei ah a hnulei a mer i a kut a samh tikah, vampang cung i a muisam kha a hmuh. A pum thladem cu vailamtah bantuk a si. A khuaruah a har, caan tlawmpal a ruah. Cun a voikhatnak caah thil pakhatkhat a cang ti a hngalh.
Vailamtahnak thladem a hmuh cu a caah a ṭhawng tuk. A nunnak kha a zoh ṭhan i atu cu, a voikhatnak caah a si kho men, daihnak a um lo ti kha a cohlan. Thlennak a duh i cucu khuaruahhar ngai a si. Hi bantuk thil ngeih awkah, thlapa ceunak van tangah zanlei sang ah a cang.