St. John Baptista Chuahni

Thursday, June 23, 2022

         Nungak thiang Maria bantukin Johan zong hi zungzal nunnuamh nak ram ah an kainak puai le leicung ah an chuah nak puai ni tuahpiak awkah a hleice in nawlngeihnak an ngei. A nu le a pa hna cu Pathian hmaiah mi ding si ko hmanh hna sehlaw Elizabeth cu a cingmi a si caah fanu fapa ngeih kho lo in a um i a kumkhua zong a upa ngaingai cang. Nikhat ah Zachariah cu Biakinn ah Tlangbawirian a ṭuan lioah Vancungmi Gabriel nih a sinah a rak lang i “Zachariah, na thinphang hlah, na thlacam nak kha Pathian nih a theih i na nupi Elizabeth cu fapa a hrin lai” tiah a ti.

“Annih cu tar an si cang caah Zachariah nih a leh ṭhan ve”. Gabrial zong nih “Nangmah cu ka bia kha na zumh lo caah ka chimmi bia a tlun hlan tiang na molh lai” tiah a ti. Elizabeth fa a hrin hnu ni 8 a tlin tikah an chungkhat le an innpa chakthlang an ra cio i ngakchia kha cuarpartannak an tuah piak. Amah kha a pa miphun lei hoih in Zakariah kan sak lai tiah an ti tikah Elizabeth nih “John tiah kan ti lai” tiin an bia cu a al hna.

Anmah a miphun chungah mah bantuk min a pumi voikhathmanh an i sak bal lo caah an khuaruah a har cio. A pa zongnih cahnah cungah “A min cu John” tiah a ṭial ve. Cu caante ah chitkhat tein a ka aa an i “Isarael Pathian na cungah thangṭhatnak um ko seh” tiah Pathian kha a thangṭhat. Ngakchia cu nikhat hnu nikhat a ṭhang chin i thlarau he a khat. Isarael miphun lakah a langmi a si hlantiang Thetse ram ah a um.