Vailamtahnak Cawisannak puai
September 14, Sunday
Nam 21:4-9; Phil 2:6-11; Jn 3:13-17
Dawtmi ulenau hna, Nihin ah kan Bawipa Jesuh i teinak philh lonak caah Vailamtahnak Thiang cawisannak puai kan tuah. Hi teinak cu a thihnak le a thawhṭhannak thawngin a tlam a tling. Vailamtahnak thawngin thihnak kha nunnak nih a tei.
Hi puai cu kum zabu 7 a dih hlan ah Rome khua ah an rak tuah. A timhmi cu Jerusalem ah chiahmi le Persia kut ah a tlami Vailamtahnak Thiang cheukhat hmuh ṭhannak philhlonak caah a si. Emperor Heraclius nih Mithiang Helen i Calvary ah a hmuhmi thil mansung cu a hmuhṭhan i May 3, 629 ah Jerusalem ah a rak put ṭhan.
A ngaingai ti ahcun hi Jesuh i Vailamtah hi Siangpahrang Constantine i nu St. Helen nih AD kumzabu (4) ah a hmuh. Tuanbia ning ahcun, Jew miphun Judah timi pa lawng nih vailamtahnak kong a umnak hmun a thei. Mithiang Helen nih a forh caah, Golgotha ah Siangpahrang Hadrian nih a sakmi Venus biakinn tangah an vui tiah a phuan. Cu hmun ah vailamtah pathum phum a si kha amah nih a hmuh tikah, khoimidah Khrih i vailamtah a si ti hngalh khawh a si lo. Cu liote ahcun mithi ruak vui dingin cu hmun pawng ah an kal i, Helen nih vailamtah pathum cu mithi ruak pawng ah a rak put hna. A thimi pa cungah vailamtahnak pathumnak an chiah tikah, cu pa cu a tho ṭhan i, hi cu nunnak petu Jesuh Khrih i vailamtahnak a si taktak ti kha a fehter.
Protestant unau tampi nih, zeicahdah kannih, Catholic pawl nih vailamtah kan upat tiah an hal zungzal asinain cu vailamtah cungah cun Jesuh cu thah a si taktak ko. A si vailamtah cu thih dantatnak phunkhat a si, misual, dotu le midang hna caah dantatnak a si. A si vailamtah cu a hlawh a tlin lonak, thingtum pakhat ah a cang, Judah mi tampi caah ningzahnak le ningzahnak hmelchunhnak ah a cang, cun sullam a ngei lo nain Khrih he cun, vailamtah cu sullam a ngeimi le khamhnak ah a cang, zeicahtiah ningzahnak le sualnak ningzahnak chungin a kan khamh.
Nifatin kan nunnak ah, kan buainak, hneksaknak, harsatnak le a dangdang hna he Vailamtah cu kan i hngalhter zungzal. Kannih nih hitin kan ti: “ka buinak (piahtana) a ngantuk cang, hi vailamtahnak hi ka tuar kho tilo!” asiloah hitin kan ti men lai: “”Atu lio ka nunnak ah vailamtahnak tampi ka ngei. Atu lio na nunnak ah na vailamtahnak cu ahodah a si?” A si kan nunnak ah vailamtahnak kan ngei ti cu kan al kho lo nain Pathian nih a kan pekmi cu kan phorh khawh caah a si.
Vailamtah ka put dingmi cu a rittuk tiah Bawipa sinah caan saupi le aw thangpi in a phunzai mipa tuanbia bantuk tein. “Ka sinah ra tuah,” tiah Bawipa nih mipa cu vailamtah an sernak dawr ah a kalpi. Hika ahhin a phunphun le a ngan le a hme aa dangmi vailamtah pawl an chiah hna.
A nuammi mithmai panh tein, Bawipa nih a ti: “Na pawngkam ah thil cawk law na duhmi pakhatkhat na hmuh ahcun i ken ko,” tiah a ti.
Cucaah mipa cu innka ah a lut, a vailamtahnak cu vampang ah a chiah i lawmhnak he a kut a hnawh i amah leiah a hlonh: “Hi hi nunchung caan tha a si, ka rak hngah lenmi thil pakhat a si. Zeiti a si hmanh ah vailamtahnak ka phorh a hau ahcun, thilrit tuk lomi, keimah pumpak he aa tlakmi pakhat ka hmuh khawh men.”
Cucaah hipa nih khi pakhat, cu pakhat, a dang pakhat tiah aa zuam i pakhat hmanh aa tlak lo. Pakhat cu a sautuk i vawlei ah a tla. A dang pakhat cu a tawituk caah a tluk. Pakhat cu a rittuk i thli nih a hninh. A dang pakhat cu a rittuk i a liang ah aa hliam. Lungdongh awkah timhcia a si cang, vampang ah aa hngatmi pakhat kha a hmuh. A ngan ning zoh in aa hruk, a kal i Bawipa lei ah mithmai panh tein aa mer i: “Hihi a si. Hihi ka kawlmi a si. Ka lak lai,” tiah a ti.
Cucaah innka in an chuak i Bawipa nih vailamtahnak aa putmi kha a hun i mer i mithmai panh tein hitin a ti: “Cucu na duh caah kaa lawm; na rak luhpimi kha a si.”
Dawtmi ulenau hna, Asinain vailamtahnak kongah a fiangmi pakhat cu, Jesuh nih kan caah vailamtahnak cu a pom i teinak ah a ser; cucu kanmah caah kan khamhnak a si.