August 31, 2025 Avoi (22) nak Zarhpini

👇Audio🎧

Bible relnak 👉Sir 3:17-18,20,28-29; Heb 12:18-19,22-24; Luke 14:1,7-14

St. Augustine kha Khrihfabu chungtel pakhat nih hitin biahalnak a tuah: “Father, biaknak ah abiapi bikmi thil hna cu zeidah an si?”

“Biaknak ah abiapi bikmi maw? Pakhatnak cu toidornak a si, pahnihnak cu toidornak a si i a pathumnak cu toidornak a si,” tiah St. Augustine nih a leh.

Nihin thawngṭha ah, Jesuh nih nupi ṭhitnak puai ah sawm an si tikah cabuai cung hmunsang a thimmi hna kong he pehtlaiin tahchunhnak he a kan cawnpiak. Nupi ṭhitnak inn ah abiapi bikmi bantukin an um awk a si lo; an thimmi ṭhutdan ruangah a sunglawi deuhmi khual pawl caah an sung. Cu hmun chuahtak dingin fial a simi cu ningzak awkngai a si. Mah cu keimah pumpak nih ka rak tonbal cang.

Khrihfabu zohkhenhnak puai ah sawm ka si. Chuncaw ei caan a si cang tikah, tlangbawi hna caah chiahmi cabuai ah ka ṭhu. Minute tlawmpal hnuah, Khrihfabu chungtel pakhat nih a ka naih i hi hmun hi tlangbawi hna caah chiahmi a si caah chuahtak dingin a ka ti. Cu Khrihfabu chungtel nih cun kedan le T-shirt sawhsawh ka hruk caah tlangbawi ka si ti kha a hngal lo. Cucaah cabuai dangah ka ṭhial i ka tthu. A ka theihmi Khrihfabu chungtel pakhat nih a ka hmuh i tlangbawi hna caah chiahmi cabuai ah ṭhial dingin a ka ti. Cu Khrihfabu chungtel nih tlangbawi ka si ti a hngalh tikah, ngaihthiam a ka hal i keimah nih: “A poi lo” tiah ka ti. Asinain ka lung a fak cang i ka ning a zak cang.

Jesuh nih hi tahchunhnak tuanbia hi an porhlawtnak in zuamcawh awk le toidornak kong cawnpiak awkah a chim. Sirach nih a voikhatnak bible ah a rak chim bangin: “Toidornak he nan rian kha ṭuan u law laksawng petu nakin dawt deuh nan si lai, toidornak na ngeih deuhdeuh tikah na ngan deuhdeuh i Pathian hmaiah mithmai ṭha na hmu lai.”

Ni khuapi ah kal a duhmi mi pakhat kong ka relmi tuanbia pakhat a um. Asinain hmunrawn kaupi le tlang hna tan a herh. A thaizing zinglei ah cu khua cu a phanh khawhnak hnga zanlei ah a umnak hmun kha a chuahtak a hau. Khualtlawnnak a thawk. Suimilam pakhat a hung phan cang, aw pakhat a theih: “Ding cang, vung kal law lungvar va la law na zal chungah rawn, thaizing ni a chuah tikah na ngaih a chia lai i na lawm lai,” tiah a ti.

Suimilam pahnih, pathum a liam cang… a fek tukmi le kal awk a ṭihnungtuk mi tlang a ṭum hlan tiang aw pakhat nih bia a chim pengmi kha a theih. A zaal chung a ummi lung hna nih a buaiter i a hliam ter caah khua a dei hlan tiang a hlonh hna i a zaal ah lung pakhat lawng a tang. Cucu Lungvar ah a hung cang. A lung aa lawm i a ngaih a chia. Ngaihchiatnak, lung dang a hlonh hna caah le lung pakhat a chuahtak i diamond ah aa cang caah aa lawm.

Hihi nunnak tuanbia a si. Tualrawn nganpi cu kan ngakchiat lio caan a si. Kan ngakchiat lio ah kan nulepa nih hitin an kan ti tawn: “Hihi tuah law khihi tuah.” Tahchunhnak ah, hitin an kan ti: “Nannih cu miṭha nan si awk a si, biatak nan chim awk a si i zaangfahnak nan ngeih awk a si.” Hi hna hi kan tuah ahcun, kan i lawmh caan a phan lai. Lung hna cu ziaza ṭha – dinfelnak, biatak le zaangfahnak hna an si awk a si. Tlang cunglei cu hneksaknak kong a si. Kan tuar khawh tilo ahcun hlonh awkah tukforhnak kan tong. Midang nih an silo lio ah zeicahdah keimah cu ka ṭha asiloah biatak ka chim a herh tiah kan ti.

Asinain cu lung pakhat a tangmi cu zeidah a si i kan hlonh awk a si? Hihi toidornak ziaza ṭha a si. Cu thawngin, cu hneksaknak le harnak hna cu kutkau tein kan cohlan khawh men i cu thil vialte cu kan tawnghtham khawh men. Cun mah hi Jesuh nih a hmanmi ziaza ṭha zong a si. Jesuh nih hitin a ti: “Ka seihnam kha i bei u law ka nawl kha i cawn u, kei cu nunnem le toidornak ka ngei,” (Matt 11:29).

Nihin bible kan relmi hna ah abik in a voikhatnak relnak le thawngṭha nih toidornak i a biapitnak kong a chim.

Toidornak timi cu zeidah a si? Midang nakin kan niam deuhnak hnga maw a si? Kannih cu man kan ngei tilo ti maw? A si lo. Hi biafang hi Latin biafang humus in a rami a si i a sullam cu ‘nawn a ṭhami vawlei’ tinak a si. Phundang in chim ahcun, toidornak ngeih cu ahleiin kan thiamnak, kan thilti khawhnak le kan rikhiahnak asiloah kan derthawmnak hna he ahodah kan si ti cohlan awkah timhcia a si. Pathian nih aa tluk tein a kan ser i ahohmanh asang deuhmi an um lo. Jesuh Khrih bantukin, kannih zong nih hitin kan ti ve: “Keimah cu a nemmi le toidormi ka si caah ka sinin cawng u,” tinak a si. Jesuh nih a rak nunpimi nun – midang caah minung sinak nun kan ngeih awk a si tinak zong a si. Midang sinah biatak a chimmi kan hung si. Nihin ah mi vialte nih ahodah a sangbik ah a um lai tiah an i zuam ti kan hmuh. Asinain midang nunnak tawngh awkah kawh kan si. Kannih cu Jesuh kut, ke le kaa kan si. Midang caah pakhat cio cu Khrih kan si lai. Kan thiamnak le kan laksawng hna hi kanmah caah si loin a herh bikmi hna caah kan hman lai.

A pathumnak pa nih cun: “Ka nu Baibal lehmi hi ka uar tuk, zeicahtiah amah nih a nunnak taktak ah a leh, a chung i ṭialmi vialte kha a nunpi.” A dang pahnih cu an dai.

Pakhatnak nih hitin a ti: “Keimah ta cu a ṭha bikmi lehnak a si zeicahtiah mah cu New American Bible a si. Hihi Missa ah hman a si. A hmanmi biafang hna cu chanthar le hngalhthiam a fawimi an si.” Pahnihnak pa nih aa porhlawt: “Keimah ta cu a ṭhabik a si zeicahtiah hihi Jerusalem Bible a si. Biazai ngai a si i kan charismatic cawlcanghnak ah hmanmi a si”.

Tuanbia nih nihin kan thawngṭha ah Jesuh Khrih i zuamcawhnak kha a tawinak in a langhter. Jesuh nih Pathian bia hi nifatin kan nunnak ah leh dingin a kan zuamcawh. Kan thinlung, kan ruahnak le kan tuahsernak ah Bible nunter awkah a kan zuamcawh. Mah cu toidornak lam pakhat a si.

“Ka fapa, toidornak he na rian kha ṭuan law laksawng petu nakin an dawt deuh lai,” (Sir 3:17).