21.8.2025 Reflection

Bible relnak: Biaceihtu 11:29-39a; Maṭhai 22:1-14

Mithiang Pius X, Pope philhlonak

Thursday 22 August

Bible: Ruth 1:1, 3-6, 14b-16, 22; Maṭhai 22:34-40

Zanriah ei puai ah angki dum asiloah phungning tein angki hruk dingin an in sawm bal maw? Kei cu voi tampi sawm ka si cang. Thilthuam hrukning phunglam na zulh lo ahcun, luhter na si lai lo i na chuahkehnak muihnak chungah kuatṭhan na si lai ti ka zumh. Hika ahhin phungning tein thilthuam kong kan chim, laksawng pek zan ah kan lemcang nu cheukhat nih an langhtermi ahleiin thilthuam langhternak phun kha a si lo. Phungning tein thilthuam timi cu, nu caah angki hruk lo, pa caah nuamhsaihnak angki hruk lo tinak a si. Ṭhitumnak puai tahchunhnak ah a langmi sifakpa nih a sawmnak cafang hmete kha a rello ti cu ka zumh. Jesuh nih a donghnak ah a chim bantukin, mitampi cu auh an si nain tlawmte lawng thim an si caah ha rialnak a umnak lenglei muihnak ah hlonh a si. Zeiruangah dah hi thil hi a cang timi kongah Jesuh nih zeihmanh a kan chim lo.

Hi bianabia hi Luka 14:14-24 ah mirumpa nih rawldanghnak a tuahnak he aa lo. Nihin thawngṭha ahcun siangpahrang pakhat nih a fapa caah ṭhitumhnak puai a timhtuah. Jesuh i bianabia nih a sawmnak a cohlang duh lomi le a salle a hremtu hna kha dan a tat hna i a donghnak ah a thin a hungmi siangpahrang kong kha zeicah a langhter? Jesuh i bianabia ah tuanbia pahnih aa tel. Pakhatnak cu rawldanghnak ah sawmmi khual hmasa hna he aa pehtlai nain an duh lo.

Tuanbia ṭhen hnihnak nih siangpahrang cungah nawlngeihnak a ngei lomi le cu bantuk sawmnak hmuh ding a ruat bal lomi hna kong kha a langhter.

Cun cucaah hi thawngṭha caang kan ruah tikah Bishop Soc Villegas nih a cauk Love Like Jesus ah a chimmi biafang pathum le a ruahnak cheukhat kha cawi ka duh hna i cu cauk nih cun nihin thawngṭha chung i “Keimah” pathum kha philh lo dingin mipi kha a sawm hna i cucu Ṭhitumhnak Puai Bianabia kong a si:

Thawngṭha i a pakhatnak cu Sawmnak a si. Bawipa nih a velngeihnak puai ah ra dingin nifatin a kan sawm. Amah nih a timhtuah dih cang; a man a pek cang nain a sawmnak cohlan ding cu kanmah cungah aa hngat. A tlam a tlin tikah ra dingin timhcia tein kan um a hau. Cheukhat cu zaangfahnak tein kan al; caan dang ahcun cohlan kan duh, asinain thil sining he. Fiang tein chim ahcun, vawlei cung biaknak vialte lakah, mipi nih Pathian a kawl zungzalmi an rak si nain Khrihfa biaknak ahcun Pathian nih a kan kawlmi cu a si. Amah cu mi a kawltu a si. Zeitikah dah lungtak tein le fel tein cohlannak he kan leh lai?

Thawngṭha bia i a pahnihnak cu zeirel lonak a si. Sawmmi hna nih zeihmanh an ruat lo. Sawmnak cu zeiah an rel lo. Anmah le an chawlehnak le an rianṭuannak ah an kal. Bawipa cu zeiah an rel lo. Ruat hmanh, Pathian hrimhrim nih a kan sawm i cu hnuah a sawmnak ah “A si lo” tiah chim ngamnak kan ngei, zeicahtiah tuah ding thil dang kan ngei. Hi zeirel lonak cu nihin tiang a um peng. Sawmmi hna an si nain a leh lomi hna cu phuthum ah ṭhen khawh an si: a lung a tling lomi asiloah Pathian sawmnak nih zeihmanh a chim lo i a lung a thawhter hna lomi; dohtu hna asiloah Khrih le a Khrihfabu he ral a domi hna. Ramkhel cawlcanghnak in Khrihfabu thlen an duh; le upatnak a ngei lomi hna.

Thawngṭha bia i a pathumnak cu aa tlak lomi a si i cu nih cun upatnak a ngei lomi, sawmmi phu pathumnak kha a telter. Ṭhitumnak puai a luh hlanah thilthuam ṭha tein hruk ding an sawm a si nain amah sining bantuk tein cohlan awk a si tiah a ruah. Kanmah leiin, pumpak in, ka lungretheihnak cu Eucharistic (Missa) kan kai tikah zeitindah kan i hruk timi ah a si lo. Ka lungretheihnak cu, Bishop Villegas nih a chim bantukin – Khrihfabu chungah zeitindah kan um timi cungah a si deuh: kan chunglei lungput; zeitindah kan lungthin nih ningcang tein aa thuam. Mi pakhat nih: “kan taksa in kan um nain lungthin leiin kan um lo” tiah a ti.

Salm cauk nih: “Nihin ah Pathian aw nan theih ahcun nan lung kha hak hlah u,” (Salm 94:8) tiah a ti.