Akita khualipi le Nu Mary langhnak aruang (2)
A voikhatnak a Langhnak kong le Nu Mary Biacahmi (6 July 1973)
“Ka fa nu, Ka novice, keimah zulh dingin zeizong vialte kaltaak in ka nawl ṭha tein na ngai ti ka hngalh. A dam lomi a tha a dermi na hnakhaw (ear) a faktuk maw? Na hna chehnak in damter na si hrimhrim lai. Na kut i hma a ummi nih tah fahnak an pe maw? Mi vialte an sualnak in lungthlennak an hmuh khawhnak hnga caah thlacam ko. Mahkaa hmun i a ummi ka fale hna nan zapi tein nanmah ai-awh in midang chiahṭhan khawh dingmi nan si lo. Bawipa thisa salnu hna i thlacamnak kha, ṭha tein na cam maw? A si ahcun mah thlacamnak kha camṭi u sih.”
“Maw a thiangbik mi Jesuh lungthin, a thiangmi Bawipa thisa chung i a taktak in a ummi, ka taksa le ka lungthin dihlak cu na lungthin thiang sinah kan pek. Vawleicung dihlak biakṭheng cung i tuufa rawl danghnak puai i a pum aa pemi cungah le Pa Pathian cungah thangṭhatnak um ko seh law “na pennak tlung cang ko seh” tiah kan in nawl. Zaangfahnak in le toidornak he, keimah i pekchanhnak hi rak ka cohlan piak ko. Pathian sunparnak caah le thlarau tampi khamhnak caah na duhning bantukin rak ka hmang ko. Maw a ṭhawngbik mi Bawipa i Nu, na Fapa he zeitikhmanh ah rak ka ṭhenter hlah. Zaangfahnak in na dawtbik mi na fa bantukin rak ka huhpheng law rak ka khamh ko.” Amen.
Mah thlacamnak a dih in vancung in aw thangpi in a chim mi cu: “Pope, Bishops le Tlangbawi pawl caah thla fakpi in cam ko. Tipil na in thawk in atu tiang zumh tlak tein na campiak peng hna ti ka theih, cucaah fakpi in campiak peng rih ko hna. Nihin i thil sining vialte hna hi na bawi le sin ah chim dih hna law an in chimh mi paohpaoh kha rak ngai hna. Pathian nih thinlung tak tein thlacam dingin a kan fial va ti hna.”
A voihnihnak a Langhnak kong le Nu Mary Biacahmi (August 3, 1973)
“Ka fanu, ka novice, na Bawipa na daw maw? Na Bawipa na dawt a si ahcun kan chimh hnga mi hi ngai tuah. Mah hihi abia pituk mi a si caah na bawile na va chimh hna lai. Hi vawlei cungah pa tampi nih Bawi Jesuh cu an hrem, an fah ter. Vancung i a ummi ka pa hnemhnak caah le a thinhun mi nemter deuhnak caah thlarau tampi ka herh. Ka fapa he kan saduhthah mi cu misual mi hna le Pathian sinah lunglawmhnak hmete hmanh a ngei lomi hna caah anmah lungtho tein sifah innak a tuahmi le temh innak thawngin a rawk cangmi thlarau an remhṭhan mi hi a si. Vawlei mi hna nih Pathian thinhunnak an theihnak hnga caah Pathian nih minung vialte dantatnak ngan taktak pek dingin timhtuahnak a ngei (mahkaa zawn ahhin Japan rammi hna caah a chimmi a si) ka fapa he Pathian thinhunnak a daih deuhnak hnga caah voi tampi kan in nawlpiak hna. A ra dingmi (natural disaster) kokek rawhralnak zongin kan khamh hna, Jesuh vailam cungah a temh innak kha pekchanh in le, a thi sungbik a luangmi, dawtmi thlarau tampi hna pekchanhnak thawngin le, Bawipa nih harnak in dingin a thim cangmi thlarau bu hna in Pa Pathian cu ka hnemh. Thlacamnak, sumnak le ralṭha ngaiin amah caah in ngamnak hna nih Pathian thinhunnak a daihter deuh.
Mah ka chimmi hna hi nan Convent zong nih tuah ve uh ti ka duh, cun sifah in duhnak, thianhlimnak thlacam ko. Mah ti cun, Pathian cungah lunglawmhnak zeihmanh a ngei lomi le an lungthin kha thinhun tuknak lawngin a khatmi (pa pawl) vialte an i remhṭhan khawhnak hnga caah thlacampiak ko hna.
Bawipa thisa salnu hna i thlacamnak kha a sullam ruah bu tein cam law a tak in tuah i zuam law mah thlacamnak hi sual ngaihchihnak caah cam peng ko. Ahopaoh nanmah le nan sining tein Pathian sinah pekchannak tuah dih uh. Pathian a thei lomi pawl ca hmanh ah thlacamnak hi a herh. Thlacam a duhmi thlarau hna cu thlacam dingin an i pumkhawm cang. Hruainak phungphai nan ngeihmi cungah i hngeṭuk loin thlacamnak lei tuah na Bawipa hnemh dingah zumhtlak si i zuam ko.
—-Kan pehṭhan te lai…