Monday Reflection
Mirum Tlangvalpa
Bible: Judg 2:11-19, Psalm: 105, Mt 19:16-22
Nihin thawngtha relnak ah tlangval pa cu uar a um tuk. Jesuh sinah biahalnak pathum a tuah i cu nih cun a nunnak caah Pathian duhnak he aa tlakmi lam in nun a duh taktak ti a langhter. A biahalnak hmasabik cu biaknak lei biahalnak nganbik pakhat a si, ‘Zungzal nunnak hmuh awkah zeidah ka tuah awk a si?’ Nunnak lam, Pathian nih a duhpiakmi lam, hi vawlei nunnak leng nunnak lei ah a hruaitu lam kha zulh a duh. Jesuh nih, ‘Nawlbia kha zul hna u’ tiah a leh tikah, a pahnihnak biahalnak cu, ‘Zeidah a si?’ tiah a hal. Cu hnuah Jesuh nih midang he zeitindah kan i pehtlaih timi he aa pehtlaimi nawlbia pahra chungin a ṭial hna i, innpa kha nangmah le nangmah i dawt bantukin dawt ding timi nawlbia kha a chap. Hi nawlbia vialte ka zulh cang tiah Jesuh kha a zumhter hnuah, tlangvalpa nih a biahalnak pathumnak cu, ‘Zeidah ka tuah a herh rih?’ tiah a hal. Pathian he an i pehtlaihnak ṭhanchoter awkah zeidah ka tuah khawh rih ti kha hngalh a duh. Hi tlangvalpa kongah hin lungdaihnak a um, minung sinak, Pathian fa sinakin ṭhancho duhnak lungthin a um. Jesuh nih hi tlangvalpa a duhnak kha biapi deuh in a lak i a lehrulh i, ‘Na ngeihmi thil kha zuar law tangka kha sifakmi sinah va pe hna… cun ra law ka zul’ tiah a auh. Jesuh nih a tonmi paoh cu an ngeihmi thilri zuar awk le a khualtlawnnak ah Jesuh hnu zulh awkah auh an si lo, asinain Jesuh nih cu bantuk auhnak nih hi tlangvalpa a duhnak thukbik kha a lehrulh lai ti kha a hngalh. Sihmanhsehlaw, tlangvalpa nih hi auhnak cu a leh kho lo. Amah cu ‘rumnak nganpi’ a ngeimi a si ti a hung lang. A rumnak nganpi cu a thlah kho lo, cucaah ngaihchia ngaiin a kal. A tuah khawhmi nakin a tlawm deuhmi ah a lung a tling, Jesuh he i pehtlaihnak nakin a rumnak ah i hngatchannak kha a si. Kan dihlak in kan chungah thlarau duhnak thukpi kan ngei, tam deuh duhnak, Pathian caah duhnak, cucu zungzal nunnak lawngah tling tein a tling lai. Hi nunnak ah Bawipa nih pumpak in a kan auhmi kha hngalhthiam i kan lehrulh deuhdeuh tikah, kan chung i a thukmi duhnak cu a tling deuhdeuh lai i, Bawipa lawmhnak hrimhrim kha kan i hrawm deuhdeuh lai.
Vawleicung i nan lak i pahnih nih zei thil paoh nan hal ahcun, vancung i a ummi ka Pa nih an pek hna lai.