Mithiang Augustine

Wednesday, August 28, 2024

Mithiang Augustine cu Bible thiam hna lakin fimnak thluak a ngan bik, a biapi bik mi (mi) hna ah pakhat asi ve. A chuahkehnak cu Africa Continent chaklei in asi. A pa cu zuk, milem a biami asi. A nu Monica cu Khrihfa asi. Augustine a ngakchiat lio ah hawi ṭhalo hna he komh in aum caah a ziaza arawk i Manisius timi ahmaan lo zumhnak a zulmi asi. A nu cu a va pa kha Khrihfa luh ding a forhfial caah athih hlan ah Khrihfa ah a rak lut. A nu Monica cu ziaza rawh in lam apalhmi afapa Augustine zong kha a ziaza remh thlen dingah kum(12) chung a ṭah bu in Pathian sin thla a cam hnu ah Bawipa Pathian cu a nu Monica i thlacamnak aw thawng kha a rak ngaih piak. Augustine cu Milan khua i Proffessor rian a rak ṭuan lio ah Bishop Ambrose i phungchimnak kha a va ngaihnak in Khrihfa biaknak kha athinlung in a rak duh ziar. Ni khat ah, Augustine cu dum pakhatchung i aum lio ah cauk pakhat kha i lak law rel tuah tiah awthawng a theih. A khuaruah har in cabuaicung i cauk kha a lak i a vun rel tikah,”Nuamhnak ah kaltuknak, zudin zuritnak,hor duh cuainak,vawlei rian ah thurhhnawmh nak, i sik velhnak le nahchuahnak kha hrial cio usih.(Rom 13:13) tiah a timi St.Paul i chimhrinnak bia hna kha a rel. Cutik ah hmakhatte ah alung aa thleng i chiatnak  nunzia kha ahlawt i Khrihfa ah a lut i Mithiang sinak hmun hma phan tiang in um i tuah kel tuah lengmang duhnak thinlung arak chuak. Kum (30) asi ah Siangbawi cannak ahmuh. A rauh hlan ah Hipona khua ca ah Bishop cannak ah an rak thim.