MITHIANG NORBERT
Monday, June 07, 2021
Mithiang Norbert (St. Norbert) cu Germany ram, Cleves khua, 1080 kum ah a chuak. A nun hramthawk ahcun sualnak phunphun le vawlei nuamhnak lawngin a caan a dih ter. Amah cu Brother zong a rak si. Asinain a phu lo mi lungthin duhnak lawng a rak si. Kum 33 a ti ah ruahlo piin i hliamsualnak pakhat ruang ah a nunzia i thlen nak lam pakhat a rak awng. Ṭih a nung i a ṭhawng ngaimi mintlau leknak ruangah a Rang kha a lautuk i hmakhat te ah a dir caah a Rang cung cun a tla i thi dengmang in a molh.
Mithiang Norbert cu a molhnak in nazi pakhat tlukah a lung a rak fimṭhan i Pathian sinah “Bawipa zei tuah seh ti na ka duh” tiah a hal. “Thilṭhalo na tuah lengmang mi in rak i merṭhen law thilṭha kha tuah cang tuah. Daihnak kha kawl tuah. Mahhnu ah rak ka zul” tiah awthawng pakhat nih a rak chimh. Norbert cu Xantan khua ah a va kal i Siangbawi ordination lak ding caah timhtuah nak a va ngei. Thla fak piin a camnak le sual ngeihchihnak in a nunzia kha aa remh ṭhan. A thianghlim mi, biatak ruahchannak kha tette piah awk caah a ngeih mi thilri vialte kha misifak hna kha a pek hna. Cuhnu ah pahnih nak Pope Gelasius sinah hlangfang in sual thlahnak a tuah. Pope Siangpahrang pa nih, a duhmi khuazei ramkip ah Thawngṭha phuannak nawl kha laksawng ah (lehrulh can ah) a pek ṭhan ve.
Kum 1120 ah Norbert cu minung an chuah langhlo nak hmun Premontre an ti mi tlang ah a hawi Siangbawi 13 hna he Biaknaklei bu pakhat an dirh. Kum 1125 ah pahnih nak Pope Honorius nih an bu dirhmi kha tlamtling mi bu ah a feh ter. Amah cu Magdebury khua chungah khan mi sifak ngai bantukin a luh caah Magdebury khua kutka cawngtu pahnih nih khuachung luhnak nawl kha an rak pe lo. Midang pakhat pa nih Bishop pei a si cu tiah a au tikah, kutka cawngtu pa cu a ning a zak ngai. Cu tikah St. Norbert nih “Apawilo, ka nau dawt, nang cu hihmun ah a ka thlah mi hna nakin pei na fel deuh hi ta,” tiah a ti.
Norbert nih cun rianthar (ṭuanvo thar) a lak hnu zongah kha Zateih pawl nih felfai in an zulh nak kha peh zulh in a zulh ve. A hmaan lo le tazaa lo in thil tuahnak te hna thilṭhalo tuahnak le hmuhsak nak hna kha a tlau khawh nakhnga caah Bupi chung i remhṭhan a herh mi hna caah khan remhṭhan awkah fekte in biachahnak a ngei. Mithiang Norbert cu 1134 kum, Magdebury khua ah a thi. Amah i a ruakpum hna cu Bohimia khua i a ummi Strahav Zateih Biakinn ah nihin nitiang a um ko rih.