Mithiang Charles Lawnga le a Hawi le hna

Thursday, June 03, 2021

        Mithiang Charles Lwanga le a hawi (21) hna cu Uganda ram i hmasabik biaknak caah thah a ing mi hna tiah an upat mi hna an si. Kum 1870 kum ah Europe rammi Siangbawi hna cu mah ram ah an va phan i Siangpahrang Mtesa chan ah mission rian an ṭuan nak cu san a tlai ngai te. Asina’n kum 1885 kum ah Siangpahrang Mwanga a kai i a uk tikah amah i a miphun karlak ah Khrihfa zumhnak kha cat lakin hrawh awkah bia a chah. A ruang cu, Siangpahrang pa nih hin pa le pa i sualnak hi a zuangzam mi a si i mahbantuk ṭhatlonak ziaza, tuahsernak kha Khrihfa Siangbawi le a hawi hna nih cun an duh piak lo caah an cungah fak piin a thin a hun caah a si. Kumthum chung hremnak chungah, hi bantuk hrem a ing mi hna chungah Siangpahrang kuttang i rianṭuantu, bawi pakhat a simi Charles Lwanga le a dang mino 21 a hawile a ni tel ve. Annih vialte cu Siangpahrang inn in an hnuh hna. Annih kha Khrihfa zumhnak (sinak) hi nan hlaw lai maw hlaw lai lo kha Siangpahrang Mwanga nih a hal tik hna ah an za pi in “Kan thih tiang” tiah awkhat tein an leh. Acheu cu Siangpahrang hmai ah an lu an tan hna i a cheu hna cu an hngawng kha fei in pemlak an chunh hna. A tang mi hna kha meng 37 aa hlatnak hremnak hmun lei ah an kal pi hna. Mah hna chungah pathum (3) cu lam pi ah an thah hna i a tang rih mi hna kha pher in an zual chih hna i mei in an khangh hna. Ngakchia deuh pa pakhat cu aana ngei upa pakhat a si vemi a pa i nawlpek nakin a hngawng ah voikhat an chunh hnu ah a hmasabik ah a thi. Uganda i biaknak (zumhnak) caah lu pekin thahnak a ingmi vialte cu Jesuh Khrih an hlam buin an nunnak cu a dih ter. Cuhnu ah “zumhnak ruang i a thi mi hna thisen cu Khrihfa hna ca thlaici a si” timi Tertullian nih a chim mi bia hna cu a rak hman ngaite. Annih hna thihnak an in kum bakah Baganda hna chungin Khrihfa a si mi, milu cu zahnih in zanga tiang an karh i Khrihfa luh dingah Pathian bia a cawngmi hna milu cu zariat in thongthum tiang an phan.