Chungkhar ah Nupile hi a biapibik
(IT-chan) kan vun phak tikah
Innchungkhar pakhat ahhin a biapibik cu nupile cio hi an si. An vale an hmuhmi le an chuahpi mi lawng i rinh in zeitindah ka hloh khawh lai ti rumro aa zuammi nupile cu nupi ṭhalo an si i an chungkhar an si a fak. Nupile khuasak tintuk a thiammi innchungkhar cu zeitik hmanh ah an si a fak bal lo. An si a fahbik ah hawitluk tal in an nung kho.
Nupi ṭha le nupi chia tiah ṭhen in kan vun zoh hmanh lai. Zeibantuk khi dah nupi chia cu an si lai, ziah keimah le ka duhdawt bikmi in pei kaa thim i ka ṭhitmi a si cu, ka nupi hi nupi chia tiah na tikhawh lai, tiin biahalnak na tuah kho. A si, ahmaan ko. Tuchan ahhin Pa pakhat nih nupi a kawl tikah a duh lomi cu a ṭhi bal lo. Asinain a ṭhangcho mi chan (IT-chan) kan vun phak tikah pumpak i hmuh ballo le ziaza dikthliar in i hngalh lo buin phone i chawnh, ca i kuatnak menmen in aa ṭhi ummi zong an um ve ti kan hmuh. Nu belte hi hlan chan ahkhan an duh lo zongah an nu le pa, an chungkhat nih an hnekchih tawn hna. Tuchan ahcun hnekchih hau ti loin tlangval le ngaknu anmah pahnih an i duh ko ahcun tlikpi le fir ti bantuk a tam ngai. Kan Lai nunphung a buarmi kan tampi cang tinak a si.
Pa pakhat nih ngaknu pakhat a ṭhit tikah, a duhtuk i a ṭhitmi zong a um lai i a fel ruangah a ṭhitmi zong a um lai. Nu pakhat aa dawhtuk kan timi khi zei bantuk khi dah kan ti hna, a mui aa dawh, a sam a ṭha, a tungtai aa remmi hna pawl khi aa dawh ti a si ko hnga lo maw? Mah dawhnak kha cu lenglei dawhnak lawng a si kho men. Ziaza ṭhatnak, thinlung ṭha ngeihnak le umtu ningcang ṭhatnak le dawhnak zong zohchih a herhnak kha Pa tampi nih kan philh tawn. Pa pawl hi zapi zaran cu lenglei dawhnak nih hin a kan molh tawn.
Atu chan ahhin cun pakhat le pakhat i duh lo ahcun i ṭhitum tihi a um lem ti lo va si kaw, Pa pakhat nih nu pakhat kha aa dawh ruangah duh cia in a helh a si ahcun mah minu a ṭhatlonak kha a hmu kho ti lo. Biaṭha a chim zongah, bia chia a chim zongah a duhchih dih cang. Chiatnak a tuah zongah a duhchih dih cang caah a maimilh piak dih. Mah minu cung i a ṭhalo mi khi cu chim lo, an arhli a hmul kawng dih mi le an vokpi a dertuk i a khawm-ruh le a kengruh bo liangluang i a chuakmi hmanh khi, aa dawh ngaiin a hmuh i minu a duh ruangah a duh chih. Uico sehhrang ngaimi hmanh kha a duhchih i mah minu duhnak tuah le zulh lawng kha aa zuam cang. A helh chin a duh chin, ahnu ahcun mah nu hmuh loin a um kho ti lo. Tlangval pa thinlung chung cun mah minu kha a ṭhen kho ti lo. Thingtum leh lawng nu leh lawng, tiah a ṭhit khawh ve.
Cun pakhat a um kho rih mi cu nu lei nih tlangval pa kha a duh hmasa ai. Sihmanhsehlaw pa nih khan cun a duhtuk lem lo nain nu nih khan a vun hleh ciammam i zeiti tuah awk a ṭha ai lo. Kuvate a vun cawkpiak, lakphakti le changreute a vun dangh, viber le message in a hei sawm lengmang. Cuka dawr, khika dawr ah a choyite, a kik haangte thawkin pekkhat, pekhnihte a vun ti i an ei ṭi an ding ṭi. Cu vialte ngaknu nih ṭuanvo a vun lak dih. Ahnu ahkhan cun a thil vialte a vun sukpiak dih i a vun ṭeihpiak dih. Saṭal ngaiin tlangval pa aa chawk cang ai. Zaan ah puai kal le video zoh hna a vun sawm lengmang i zanṭim le khuamang ah an ṭin ṭi. Khuahnu tuk hna i an ṭin chel ah an inn riak ding hna a vun sawm caan a um tikah cun nu le pa kan ti cu khua fakpi in an ruat kho ti lo, pa zong lam hlapi tiang a hmu kho ve ti lo, khuaci an mui cang i ahnu tlawmpal ahcun mah hna pahnih ṭhitumhnak puai an tuah ti thawng kan theih cang.
Chim duhmi cu i helhnak le i ṭhitumnak kong siloin a nuammi innchung khorkhar si ding tu deuh kha a si. Nu le va timi cu an i hmuh an i tonning aa dang cio ko lai. Zeibantuk in an va i ton zongah nu le va an si cang ko i nupi ngeih hnu le va ngeih hnu cun ka nu le ka pa sinah ka um peng ko lai, ti awk a ṭhat ti lo caah mah tein i cawm a hau cang. Vawleicung i kan nunhnawh chan mi hi kan paw ca a si ti usih law kan palh lai lo. Pathian theihlo ahcun vawleicung kan nun hi pakpalong a si ko. Minung a simi paoh nih Pathian kan ngei cio i kanmah le Pathian cio cu kan biak.
Pathian ṭhatein biakkhawhnak dingah, nupile zong hi biapi ngai a rak si ve. Nupile hi amah pumpak in Pathian hngalhcia a rak si ahcun mah innchungkhar cu a nuammi innchungkhar a si ko lai. Kan Chinmi chung ahhin Pathian a hngal mi zatuak 90% hrawng kan si men lai nain Pathian a hngal taktak mi hi kan tlawm ngaingai. Acheu Khrihfa cu Pathian hi kan zumhtuk, kan hngalhtuk cang caah amah dir hmun i a dirmi zong kan um. Nang cu mithi na si, vancungram na kai lai lo, ti le mah Khrihfabu cu mithi bantuk an si, vanram an sung lai a timi hmanh kan um rih. Vanram kai le kai lo cu Pathian lawng nih a ceihte ding va si kaw, Pathian dir hmun i kan dir tikah Van le Vawlei sertu ko khi kan lo. Hi bantuk pawl hi Nu pawl deuh hi an si tawn. Zeicah kan ti ahcun hlen thiam Pastor pawl i hlennak kha biatak in an i zumh caah a si lai. Mah Pastor le Evangelist pa zong cu tinhmi pakhatkhat a ngeih ruangah a si i ahnu ahcun amah lila zong nih a zumh beh ve. Hi bantuk hlenthiam phungchimtu (Nal prophet) hna ruangah nu le va aa ṭhenmi zong an um.
✍️Norbert Ca Ling-OSC (Hakha)