Unau chuahkhat Lungput abiapit zia
Lungkhah lungrualnak
Pope Jon Paul II nih “Lungkhah lungrualnak cu minung hna caah dinhnak le lungrualnak zulhawk lam a si. Ahohmanh hrial khawh lomi khuaruah tuaktannak i haalnak a si tiah a ra chim”. 1
Minung hna cu khat le khat “lungkhah lungrualnak kha ṭuanchuahnak in ṭhatlo chiatnak inn nganpi hna zong kan ṭhial kan lonh khawh lai tiah Pope John Paul II nih a chimpeh. 2
Pope Francis nih unau chuahkhat lungput abiapit zia kha a tanglei bantukin a rak chim.
“Kannih cu hmunkhatte ah a umkhat mi minung kan si bantukin ṭafar thisakhat lungput cu a umlo awk a ṭha lomi a herhmi konglam pakhat a si. Cubantuk a simi huntheihnak lungthin cu minung pumpak pakhat cio sinah kanmah chuahpi unau, ṭafar taktak sinakin a zohkhenh piak bantukin, cubantuk a simi lungput kan ngeih kawhlo ahcun ningcangte a si i a fekmi minung phu le a hmun a daimi nunnak kha kan hmukho lailo. Ṭafar thisakhat lungput cu innchungkhar pakhat le chungkhar tel minung pakhat cio sinin cawnlo hmuhkhawh mi a si tiah kan ti ko lai nain a rak kan cawm i a kan zohkhenhmi nulepa hna lawnglawng in a hram aa thawh kha cinken cio awk a si. Cubantuk ṭafar thisakhat thinlung put cu innchungkhar in aa thawk bantukin a dai a nuammi nunnak lei kalnak zulhawk lam a simi mah pawngkam he aa pehtlai chung paoh minung pakhat cio sin kha dawtnak pekchanhnak a si” (Cf. Pope Francis (47) nak vawlei cung Daihnak thawngthanhnak bia, 1 January 2014). Unau chuahkhat thinlungput cu mi vialte caah aa tluktlak mi tinvo kha sullam a fianter. 3
“Unau thinlungput cu a chungtel hna karlak ah zawnruahnak hna kha lungrualnak, pakhat kha pakhat pehtlai tein theihthiamnak hna kha a santer piak i pehtlai tein remnak sullam hna zong a langhter (Cf. Ibid P. 56)”. ‘Unau ṭafar taktak thinlungput’ cu mivialte nih daitein hmunkhat ah um khawhnak caah a umawk hrimhrim a simi thinlungput pakhat a si.
Cucaah takvun rang le a nak thleidannak phungphai kha a rak ralchanh mi Martin Luther King nih “Kannih vialte nih unau chuahkhat thinlungput he hmunkhat tein umding ah kan cawn awk a si. Cuti asilo ah mihrut hna bantukin hmunkhat tein kan thi te hna lai” tiah a rak ti. St. Paul nih (Hebrew 13:1) ah “Khrih chungah unau nan si bantukin pakhat le pakhat i daw zungzal u” tiah a kan forhfial.
Pakhat le pakhat, innchungkhar pakhat le khat, phukhat le phukhat, ramkhat le khat karlak unau chuahkhat ṭafar taktak thinlungput hna he dawtnak karhter i kan i komh a si ahcun hmunkhatte ah daite le i daw tein kan um ṭite lai ti a fiangmi a si. Hakauhnak, thinhunnak, keimah ti lungput, ruamkainak le unau chuahkhat thinlungput hna kha sivai luhter hlah u, minung pakhat le pakhat, tlangcungmi pakhat le pakhat kutsih in kan um zungzal lai i, i daw pengnak in zungzal daihnak kha sercio hna u sih tiah … a ti.
End Notes;
1. Cf. Pope John Paul II, Catholic International, vol.6, No. 1, January 1994, P, 13
2. Cf. Pope John Paul II, Encyclical Letter, Sallictudo Tei Socialis, Vatican City, Libraria Editrice, Vaticana, 1987, No. 40
3. Cf. Ignaimuthu, Value for life (Better Books, Bombey, 1994) P. 55