ST. DOMINIC (SIANGBAWI,1170-1221)
Saturday, August 08, 2020
Ordo Praedicatorum phu a thawktu mithiang Dominic cu 1170 kum, Spain ram Calaroga khua ah a chuak. Siangbawi cannak a hmuh hnuah Osma khua Cathedral ah ṭuanvo an pek. Mah ka ahcun St. Augustine upadi kha a zulh i a cawn. 1204 kum, Denmark lei an kallio lampi ah Taulous khua in Hotel ngeitu pakhat kha a lung a thlen ter. Cucaah Dominic cu phungchimnak nih lung thawhternak thazaang a si kha a hmuh. Cu hnuah France thlanglei ah a laarmi Biaknak bu pakhat (French Albigenses) kha thlenter awkah an thlah. Kum tlawmpal chung fakpiin a phungchimnak ruangah siseh, amah i a thiangmi a nunzia langhternak ruangah siseh, a thianghlimmi a dinfelnak ruangah siseh, mi tampi cu Catholic Bu chungah an rak kir. Zumhnak a palhmi hna kha dohnak ah teinak a hmu lomi Citeaux khua i Zateih hna kha “Namtawng ai awh in thlacamnak kha nan hriamnam ah i hruk u; thilthuam ṭthanak in numnemnak thuam kha i hruk u” tiah a ti hna. Nikhat cu a ṭtha tukmi a phungchimnak kha zeibantuk cauk ah na cawn tiah an hal tikah “Dawtnak cauk chung chimloin zeibantuk cauk chunghmanh ah a si lo” tiah a leh hna.
Amah cu thawngṭtha chimtu a hawi tlawmpal hna he Taulous khua ah Praedicatorum phu kha an thawk. A mi hna cu a ṭthami carelnak le phungchimnak ah an pum an i pe. 1216 kum ah phungning in an cohlan hna. Dominic cu a unau hna kha Pathian kong (or) Pathian he lawngin biachim awk ruahnak a pek hna. Amah cu nungakthiang Mary kha upatpeknak in aa dawhmi thlacamnak a simi Rosary thlacamnak a hmang hmasatu a si. 1217 kum Bawinu Mary Vancung an cawinak puai ah Dominic phu hna kha kakip ah a thlah hna i “Kan thlaici hi chiah lo in nan vorh lai” tiah a cah hna. Bologna khua ah a um ṭthan hlanah Rome khua ah tlawmpal a um. Fakpiin thawngṭha rian ṭuannak ruangah a tha a dih i kum 52 a ti ah Bologna khua ah a thi.