Pope Khualtlawnnak Kong
Cardinal Bo: Papal tlawnnak nih thazaang thar le zumhnak lungput a chuahter lai
Vatican media he bia an i ruahnak ah, Charles Cardinal Bo nih a ra laimi Pope i Asia le Oceania a tlawnnak nih thazaang thar le zumhnak a chuahter lai tiah a chim.
“Asia ram ah Pope a ratnak nih hin lungthawhnak lawng siloin zumhnak caah thazaang thar a chuahter i Asia mipi hna cu zumhnak thar a pek hna, zeicahtiah Asian miphun hna cu Pope lungthin (khuaruah) le thinlung he an i hlat lo ti a langhter,” tiah Asian Bishops’ Conferences (FABC) president, Cardinal Bo nih a langhter.
FABC president nih Asian tampi nih Pope kong lawng an theih i digital media bawmhnak in an hmuhkhawh nain mi tamdeuh caah cun Pope cu “a hlat deuh” tiah a fianter.
“Mipi lakah lungthawhnak a um, zeicahtiah Pope kha hmaitonh in an hmuhkhawh lawng siloin, cuka hmun Khrihfabu hna nunnak le zumhnak ah tharchuahnak a um lai ti ka zumh,” tiah Myanmar Cardinal nih a chim.
September 2-13, 2024 tiang Asia le Oceania, (Indonesia, Singapore, Timor-Leste, le Papua New Guinea) ah Papa nih a tlawnnak cu Pope Francis i ramdang ah avoi 45nak Lamkaltu Khualtlawnnak a si lai.
“Asia ram i aa thleidannak cu nunphung, biaknak le phunglam hna he aa dangmi a si. Philippines le Timor-Leste tilo ahcun Asia ram tamdeuh ah Khrihfa cu an tlawm lioah, zumhnak a karh cuahmahmi kan hmuh,” tiah Yangon Bishop, Cardinal Bo nih a chim.
Asian Khrihfabu hna cu an hmete nain an lungtho i an nung tiah a chim.
“Mirum asiloah sifak siseh, tamdeuh asiloah tlawmdeuh in siseh, ramkip ah harnak a phunphun an ton ko nain mipi zumhnak cu a hmun ko,” tiah Myanmar Cardinal nih a peh.
Cardinal nih a chimmi cu ramdang ah a pemmi Asia mi tampi nih an zumhnak an nunter i anmah pawl cu hlanlio Khrihfabu hna caah kan missionary an si. Hi an “inn thar hna” ah ruahchannak thar le lungthawhnak an chuahpi.
FABC president nih a langhtermi cu, “Asia ah, riantuan ṭi, biaruahnak le pakhat le pakhat upat ding kan cawn. Asinain a biapi bikmi cu harnak kan ton ko nain unau bantukin zeitindah umṭi khawh a si ti kha kan cawn.”
Amah nih cun, “Biaruahnak thawngin daihnak le remdaihnak lam hna cu Asia nih Universal Church sinah a pek khawhmi a si tiah ka zumh,” tiah a chim.
Khuacaan le pawngkam zohkhenhnak kong he pehtlaiin, Cardinal Bo nih, “Kannih cu a zohtu kan si kho tilo nain mi vialte caah khuacaan zohkhenhnak thanchoternak ah fakpiin kan i tel a hau. Asia ram i Khrihfabu zong hi pengtlang le vawleicung ah hi thlennak a chuahtertu ah a hruaitu a si ve awk a si.”
Pope Francis cu November 26-30, 2017 ah Kawlram ah a rak tlawng.