Khrihfa hna Hremnak kong- Pope Francis
Vatican in April 29 ni ah, Pope Francis nih zarhfatin mipi sin biachimnak a tuah lio ah Khrihfa hna hrem tonnak kong he pehtlai in a chim.
Tlangcung cawnpiaknak a donghnak lei chungin cawnpiaknak a tuah lioah Pope Francis nih Khrihfa hna hrem an tonnak kong a chimmi ah, hlan Khrifa hna nakin tuchan Khrihfa hna hrem le thah an ton deuhnak kong a chim.
Mah bantuk cawnpiaknak a tuah lio ahcun Khrihfa hna hrem le thah an tonnak kong zong voitampi a nolh.
Kum 2005 thawk in 2015 tiang chung lawng hmanh ahhin thongza renglo Khrihfa hna thah an tong cang tiah zumh a si.
Pope Francis nih a timi cu: “hi bantuk harsat hrem tonnak hna hi a ran khawh chungin a dih i a daih khawhnak hnga caah thlacamnak le ruahchannak nganpi ngei hna u sih”.
Khrihfa hna zong nih a hremtu hna cung zongah ṭafar bantuk lungthin ngeih in um ṭi thiam dingin a chim i: “Cu bantuk hrem le thah a tongmi hna zong Bawipa a pum chungah pumkhat sinak, Bupi he pumkhat sinak” a si tiah a chim rih.
Cun, ralrinnak a chim rih mi cu: “Mah le mah i zangfah tuknak thinlung, asiloah, a ingtuarmi kan si peng ko timi thinlung ngeih lo ding” zong a chim rih.
Khrihfa hna cu midang hna nih an nehsawh hna tikah, cucu hrem sinak he aa lo hrimhrim lo tiah a ti rih.
A caan ahcun zumtu hna zong kan palhthiam tawn ko: zeicah tiah cun “Kan nunnak ah Khrih kan thlau tawn i a thawngṭhabia ṭhawnnak zong kan theih lo caah a si thiam” tiah Pope nih a ti.
Pope Francis nih mithiang Paul kong he tahchunhnak a chimmi cu: “Biatak a theih tikah amah cu mi dawt a thiam mi, hremnak le harsatnak a tonmi cung zongah lunglawm tein a cohlang thiamtu a si” tiah a ti.
Aid to the Church in Need (ACN) kum chiar theihternak (report) ah an chimmi cu, kum 2017 in 2019 karlak ah Khrihfa 300 million hrem le thah an tong tiah an ti.
A tanglei link in relchap khawh a si.