Ulh caan zarh (5) nak kan rel hnga ding mi Bible Cathiang hna kha raut ṭi hna u sihlaw Bawipa sinin thazang  i laak ṭi hna u sih.

A voi (1) nak kan relmi cu Ezekiel 37:12-14 tiang a si.

Cu chung i kan hmuhmi cu: “ka thlarau cu nan chungah ka chiah lai” (Ezakeil 37:14) tiin kan hmuh.

Kan Bawipa Pathian nih minung pakhat cio kan chungah a thlarau kha a rak kan chiah piak taktak ko. Pathian Thlarau cu a thianghlim mi le ṭhatnak vialte a chuahtertu a si. Pathian nih a kan chiah piakmi thlarau duhning in kan nun a si ahcun Khamh kan si ko lai. Pathian thlarau duhning zulh cu nunnak a si.

A voi (2) nak Cathiang cu Rom 8: 8-11 tiang a si i:

Cu chungah kan hmuh ṭhanmi cu: “An minung sining duhnak lawng a zulmi nih cun Pathian kha an lawmhter kho lo” (Rom 8:8) tiah a ti ve.

A voi 1 nak kan relmi ah Pathian thlarau kan chungah chiah piak kan sinak kong a si. A voi 2 nak kan relmi ah Pathian thlarau silo in minung duhnak thlarau kong kha a si. (Minung duhnak lawng a zulmi nih cun Pathian kha an lawmhter kho lo) tiah a ti tikah minung duhnak cu a thianghlim lomi le rawhralnak leiah a kan panhtertu lawngte an si caah a si.

Pathian nih a kan duh piak mi cu a kan pekmi Amah Thlarau duhning zulh in nun kha a si. Kanmah duhning lawng kan zulh i kan nun a si ahcun Pathian duhning he aa ralchan mi a si caah thihnak lei a kan phanhtertu lawng a si. Zeicah kan ti a si ahcun Pathian hrimhrim cu nunnak a si bantukin a thlarau duhning in nun cu nunnak lam ah a kan phanhtertu a si caah a si.

Thawngṭha kan rel hnga dingmi hi Johan 11: 1-45 tiang a si.

Thawngṭha chung kan hun zoh ṭhan tikah Lazarus thihnak in Bawipa nih a thawhter ṭhannak kong a si.

Hi kaa zawn ah ruat ṭi hna u sih. Lazarus maw a thimi a si. Mary le Martha le an chung pawl maw a thimi an si?

Bawipa nih “keimah cu nunnak ka si” tiah a timi kha Mary, Martha le a chungkhar hna nih biatak tein an theih tak lo, an i fian tak rih lo ti cu kan hmuh khawh. Nunnak Bawipa an pawngah a dir ko nain an hmu kho lo. An thei kho tak lo.

Hi ka zawn ah thlarau leiin kan zoh tikah a thi taktak mi hna cu Mary, Martha le an chungkhar pawl hna tu hi an si.

Dawtmi u le nau hna, Bawipa duhnak kan tuah ahcun Nunnak lam ah kan phan ko hna lai. Minung duhnak lawng kan zulh, minung ruahnak lawng kan i bochan ahcun Pathian duhning he aa ralchan mi a si caah Thihnak lam tu ah a kan phanhter ko lai.

Bawipa nih a duhmi cu Amah kha biatak tein zumh le i bochan kha a si. Mary le Martha nih Bawipa kha an zumh an i bochan taktak tikah a nungmi an ṭapa an cohlan ṭhan.

Bawipa kha kan thinlung dihlak in i bochan hna u sihlaw kan chung i a kan chiah piakmi Bawipa Thlarau duhning hna kha zumhfek tein tuah khawh i zuam zungzal hna u sih. Bawipa nih Thluachuah in pe ko hna seh.