“Ruahchannak he Khualtlawng” timi tlangtar tangah, Myanmar ramchung Catholic Khrihfabu nih June 22, 2025 zanlei ah Yangon khualipi St. Mary’s Cathedral ah Corpus Christi Puai cu Rampi Jubilee Puai tiin upatnak he an tuah.

Catholic Bishops’ Conference of Myanmar (CBCM) President a simi His Eminence Charles Cardinal Bo nih puai cu a hruai, Cathedral i Jubilee Innkapi in a lut i, diocese 17 aiawh in Bishop 22, Archbishop pawl, Tlangbawi pawl le Myanmar ram ca i Chargé d’ Affaires Msgr. Andrea Ferrante pawl nih an zulh.

Cathedral le a pawngkam cu tuanbia ah a cangmi Eucharistic puai ah aa telmi zumtu hna in an khat.

A bia hramthawknak ah, Cardinal Bo nih miphun buainak kha a cohlan i, a lung a fahtermi aw a chuah: “Mi tampi an ra kho lo nain, Diocese 17 aiawh in Bishop 22 an i tel. Nihin cu Corpus Christi Puai – Khrih Pum le Thisen, Lungrualnak Puai a si. Asinain, kan Myanmar ram cu ṭihnung dirhmun ah a um i kan ram le vawleipi caah thlacam hna u sih” 

Rome in Ruahchannak Aw

Phung a chim lioah, Msgr. Andrea Ferrante nih 2024 Christmas ah Rome khua ah Innka Thiang an hunnak i Pope Francis bia kha a hman: “Pope Francis nih ‘lungdonghnak a pe lomi Ruahchannak’ lawmhnak caah Jubilee a thanhmi kha kan philh lo. Hihi ruahchannak caan a si… Bawipa he tonnak lawmhnak hmuh awkah a kan sawm, thlarau leiah a kan auh, vawlei thlennak ah kanmah kha a kan pekchanh.”

Corpus Christi ah tuahmi National Jubilee cu zangfahnak thukpi ah a ser: “Kan lungthin le kan tonmi harnak le lungretheihnak hna kha hmunkhat ah kan hngalh i, a kan khamh i ruahchannak a kan pek caah Pathian sinah kan i lawm, cu lioah hmailei daihnak le rumnak caah kan nawl.”

A bia chimnak ah Myanmar ram pumpi ah harnak a tongmi hna: buainak asiloah lihninh le tilian bantuk rawhralnak ruangah inn a chuahtakmi hna, himnak a umlo ruangah aa pum kho lomi hna, pumsa le thlarau leiin a zawmi hna, le Radio Veritas Asia Myanmar Services le CBCM i Social Communication Office hmangin thlarau lei in aa fonhmi hna kha fiangtein a chim.

Eucharist: Dawtnak, Ruahchannak le Lungrualnak Hrampi

Msgr. Ferrante i phungchimnak cu Eucharist i a sullam a thuknak kong a si. Amah nih cun “mi vialte cungah Pathian nih a dongh hngal lomi a dawtnak a phuannak” tiah a ti, hitin a thanh: “Eucharist zoh tikah hitin kan ti: ‘Dawtnak a um i cu a um caah thil cu a ṭha leiah aa thleng kho i ruahchannak kan ngei kho.”

Eucharist cu “lungrualnak sacrament” tiah fakpiin a chim, zumtu hna kha “pum khat, Pathian zumhawktlak mithiang” ah a fonh hna, cu chungah Pathian a um taktak ti zumhnak kha a fehter.

Pope Leo XIV nih a langhtermi mitcaw Bartimaeus kong Thawngṭha tuanbia (Mk 10:46-52) kha ruahṭhan in, Msgr. Ferrante nih “Pathian nih a theih lomi aunak a  umlo” tiah a langhter. Jesuh i biahalnak kha Bartimaeus sinah a tahchunh – “Zeidah tuahpiak na ka duh?” – Eucharist ah Khrih a umnak he, nihin zumtu pakhat cio sinah cuticun a hal hna.

Khamhnak cu zumhnak thawngin a ra, tiah a chim, Mithiang Peter bia in zumhnak phuannak kha a tharchuah: “Bawipa, aho sinah dah kan kal lai? Nangmah nih zungzal nunnak bia cu na ngei, nangmah cu a Thiangmi  Pathian Pakhat na si ti kha kan zumh i kan hngalh” (Jn 6:68,69).

Rianṭuannak le Remdaihnak caah Kawhnak

Msgr. Ferrante nih zeitindah Eucharist cohlannak nih zumtu hna kha Khrih dawtnak thilri ah a thlen hna ti kha a fianter, “raltuknak, huatnak, thihnak nunphung, zumhnak ngeih lonak nih a hliamhmi vawlei ah ruahchannak a karhter.”

Myanmar ram ah hlanlio le tuchan missionary pawl kha a hleiin upatnak a pek hna, harnak lakah an rianṭuannak nih biaknak nunnak, fimcawnnak le zatlang zohkhenhnak telh in “thil ṭha tampi a chuahter” tiah a ti.

Eucharistic (Bawipa Thisa) biaknak in an hmuhmi thazaang kha a langhter i zumtu hna kha hitin a forh hna: “Nan chan chungah Jesuh sinah va kal dingin kan sawm hna; amah nih a kan hngah ko, a kan remh ṭhan i a kan hnemh.”

Aa pummi vialte, “Khrih pum le thisen in cawmmi” hna kha an rian ningin “daihnak, ruahchannak le hnangamnak” a chuahpitu missionary si dingin a auh hna a ti.

Pope Leo XIV i thazaang peknak kha a leh i, zumtu hna cu “ruahchannak he khualtlawngmi” Khrih Vailamtahnak ah hram aa bunh tiah a ti hna.

Khrihfabu rianṭuannak ṭhatnak cu, Eucharist zohchunhmi lungrualnak le mah le mah i pekchanhnak dawtnak cungah aa hngat tiah a chim: “Kan ziaza, ṭihphannak, kan ruahnak le rian phuahnak nih kanmah le kanmah kha hnulei ah kan i hngat hlah seh. Na rianṭuannak cungah i lawm law i porhlawt ko.”  

Msgr. Ferrante nih Remdaihnak Sacrament hmangin Pathian le innpa he remdaihnak ser dingin auhnak in a donghter, Thiang Thlarau kha lamhruainak caah a auh i zumtu hna kha Thluachuak Nu Mary sinah a chiah hna i Eucharist ah Khrih an cohlan khawhnak hnga a bawmh hna.

Puai hnu le lawmhnak

Jubilee Missa dih hnuah, His Eminence Cardinal Charles Bo nih lawmhnak bia a chim, Msgr. Ferrante i bia: “Thluachuah pekmi sacrament kan biak tikah, a nungmi Bawipa ah kan i fonh awk a si ti kha a kan theihter” a ti.

Cardinal Bo nih “Dawtnak a um” timi biafang ṭhawng cu ṭihnung le huatnak  vawlei lakah a lungthin a hninh tiah a langhter, chungkhar zohkhenh a herhnak le missionary pawl cungah lawmhnak bia a chim lioah ṭhencheunak kong ralrinnak a pek hna.

Yangon i Auxiliary Bishop le National Jubilee Committee hruaitu a simi His Excellency Bishop Francis Than Tun nih Myanmar ram Archbishop le Bishop hna, Tlangbawi hna, biaknak lei, zumtu hna, le puai tuah khawhnak ding caah bawmchantu vialte hna cungah lunglawmhnak bia a chim.

Jubilee puai cu St. Mary’s Cathedral parish hall ah langhternak he pehzulh a si, Myanmar ram Archdioceses le Diocese kipah tuahmi Jubilee puai chungin zuk hmanthlak le cawlcanghnak pawl an langhter.

RVA Sgaw Karen Service nih RVAMMlS ah thlahmi cungin lakmi asi.