AHMAANNAK KONG

  A hmaannak kha muisam in siseh, a rawh a fawimi awthawng bia in siseh, siloin a hmaannak nih dingteo in cawnpiaknak a tuarmi cu lunglawmh rumnak he an khat. Tam deuh in chim ahcun kan ruah damhnak le ruahnak hna cu kan nih kha a kan hlen tawn. A ngaite tiahcun mah hna nih khan hmuh hngalhnak tampi a kan pe kho mi an si lo. A thuk i kan hmuh hngalh khaw lomi kong bia ruah le soisel sualphawtnak hna nih zei santlaihnak khi dah a pek khawh? Bia halnak in bia ceih a si tikah mah hna kha a theih a hngal lo mi caah cawnpiak chimh hrin le sual phawt a ing lai lo. A hrut kho taktak. Kan nih cu kan caah ṭhathnemnak a um i a biapi mi thil hna kha zeirelloin kan um i ṭihnung ral asi thiam i a hleice mi thil hna kha papek in thinlung kan bunh ṭheo. Hi hi cu mit ngeih ko buin hmuh thiam lo nak khi a si. (Ps 63:5, Mk 6:18).

Zeicahdah a phun thil tikhawhnak thazaang aa thleidannak hna hngalhthiam ding ah kan i zuam? Zungzal nunnak bia kha kan ngaih i kan zulh ahcun rel cawk lomi khuaruahnak phunzakip in kan luat lai. Nunnak bia pakhat te lawngin thil zeizong te a rak chuak a si. Thil, saram vialte zong nih mah pakhat kha a hmuhsak. Cucu a hramthawk (Pathian) kha a si i kan nih kha a kan cawnpiak. A hohmanh Bawipa vel in luat i a hmaanmi theih hngalh khawhnak le bia ceih bia chah khawhnak a ngei lo. A bia (nunnak bia) ah zeizongte a hmun (um) tiah zumhnak, nunnak bia (abia) kha ṭuan awk rian vialte chimh le biachah innak le a bia thawng in zeizongte a zulmi cu a thinlung a fek i Pathian ah lung dai tein a naih khawh. A hmaan nak a si mi, maw Bawipa Pathian, zungzal dawtnak huham ṭhawnnak in nangmah he pumkhat ka siter hram ko sawh.

Nafa kei cu konglam phunphun kha ka rel ka theih a tam caah tha baa awlok chong in ka um cang. Ka ngaihnak dihlak nangmah lawng ah a um. Bawipa nak hmai ah saya ti mi dihlak dai tein um dih hna seh. Thil le saram zeizong vialte zong nih awthang lo in daitein um dih hna seh. Bawipa, nangmah pakhat lawnglawng nih ke cawnpiak hram ko. (Jn 8:25). Mi pakhat cu amah pum kha aa uk i thinlng thiang tein a chiah pauh ahcun biathuk hna kha tam chinchin in fawitein a hmuh theih lai. Zeicah tiah cun vancung in ceunak hmuhnak a si caah a si. A thiang, a ding, a fekmi lungthin a ngei mi cu a phunphun cawh kalh mi ṭuan awk rian hna kha a tuah ko nain lung vaivuanhnak a ngei lo. A ruang cu mah ṭhathnemnak hlawt aa zuam i Pathian ṭhawnnak ca lawnglawng aa tinh i a tuah caah a si.

Tlaih khip hremnak a ing lo mi duhfah hngarnak nak in zei thil nih dah hnahnawhnak an pek deuh lai. Pathian biatak kha thanuam tein a upat i nun ziaza a fekmi cu amah nih a tuah dingmi ṭuan awk rian hna kha i tinh in a lungput aa remh hmasa hnu ah a tuah ṭuan ṭheo. Cu pin ah cu ṭuan awk rian hna ah minung i a ṭha lo lung duhnak hna i lemsoi nak ah a zulh lo hlei ah khi hna kha ahmaan tein khuaruah tuaktaan kan i nawlngeihnak caan kha a ngaih ter. Amah i chunglei teinak caah zawnruahnak lo thazaang chuahnak in a ho nih dah har le fe in a tuah ṭuan lai? Kan nih a biapi bik in tinh dingmi rian cu nifa tein mah pum kha kilven i ziaza ṭhatter deuh nak in mah pum tei uk nak a si. Hi nunnak ah a tling cang tiah kan ruahmi thil kongkau kip ah cheukhat tlamtlin lo nak tete an um rih. Kan ruah, kan tuaktaannak hna zong ah a fiang set lo mi hna aa tel rih. Mah pum kha i niam ter i hmuh thiamnak cu a thuk hmual ngeimi fimnak thiammi nak in zumhtlak in Pathian sin naih khawh a si deuh.

Sihmanhsehlaw, fimnak ngeihnak cathiam fimnak pakhat kha thiamnak hna cu sualnak a si ti awk a si lo. Zeicah tiah khi hna cu kokek tein a thiangmi hna an si i Pathian duhnak he zong aa tlak. Asinain lung a thiang nun ziaza ṭhatnak kha sunhsak deuh in chiah ding a si. Aruang cu mi tampi hna cu nunṭhat (ziaza) ruah khawhnak nak in fimthiam nak a tamnak kha thazaang chuah in zuam ruang ah khi hna an palhnak lam an zulh sual tawn i ṭhat hnemnak hmuh lo, tlawmte hmuhnak hna an si. Biana ah kan nih cu vawlei rian hna theih khawh kan i zuam bantukin ziachiatnak hna hmuh nak in phoih i a thiangmi ziaza hna ruah khawh cio ahcun minung chung ah thur hnawmhnak hna le theih tlak lo thawngpang hna tampi a chuak hnga lo. Siangbawi chung hna zong ah zulhphung daithlannak hna a chuak hnga lo. Nangmah cu Pathian hneksak biahalnak ni ah zei ca hna dah na rak rel bal tiah an hal lai lo. Zei dah na rak tuah ti lawng an hal te lai. Zeitiin dah hmual ngei ngaimi phung na rak chim ti zong an hal lai lo. Na nunnak ah a hmaannak (Bible) aa tlak in ziaza ruahkhun in na rak tuah khawh ti lawng kha an hal te lai.

An nih an thih hlan ah ṭha tein na rak hngalhmi minthang hna le fimthiam hna cu a tu khoi ka an phanh dih tiah ka chim hnik tuah. Atu an hmunhma (rank) hna kha midang nih an co chanhcang hna a si lo mei? An nun lio ah a biapi ngai tiah kan ruat ngai hna nain atu ahcun an kong a ceih (chimtu) ding an um ti lo a si lo mei? Hi vawlei i sining hmuhsaknak(ngeihchiah rumnak) hna cu loh tlau an fawi. Mi pakhat cu fimnak a ngeih cangka, ziaza ṭhatnak he zong a tlinh a si ahcun zeitluk in dah a ṭhat lai? Cuti in huham a tlinh ahcun a rak cawnnak hna le a rak chimnak hna nih ṭhathnemnak a chuahpi te ko lai. Hi vawlei a nun lio ah Pathian rian kha zei rel loin a daithlang i santlai lo pakpalawng a si mi fim kawlnak lawnglawng ah an i zuam cio caah a rawkmi tampi an um. Minung hna cu huham niam sinak kha an duh lo i minlangh min than an duh cio caah a si. Cuti cun an khuaruahnak hna cu pakpalawng ah an cang dih. Pathian kha a nganmi in a komh a upat mi hna cu a taktak in a nganmi minung an si. Mah pum kha a zohchuk i vawlei i a sangbik sining hmuhsaknak hna zong kha man ngeihter lo a zohchuk mi cu a ngan taktak mi minung an si. Bawipa Jesuh hmai hmuh (biak) dingah vawlei cung thil rian le ṭuanvo vialte kha zun-ek bantuk in a fihmi cu hmuhnak a tling taktak mi an si. Cun mah duhnak hna kha a hlaw i  Pathian duhnak lawnglawng kha a zul a tuahmi cu biatak tein a fim mi an si.