Thlaici Ṭhabik Jesuh Khrih

You tube 👇👇👇

Jesuh Khrih Thlaici ṭhabik

Nihin kan relmi kan Bible nih Pathian pennak kong a kan cawnpiak. Kan pawngkam kan zoh tikah saṭil/ saram, thingkung, pangpar, inn le lo tampi an um i minung hi saram he kan i dannak bik hi khoika zawn ahdah a si hnga tiah kan zoh a si ahcun tampi a um ko lai. Asinain minung le saram/saṭil he kan i dannak bik pakhatte a langhnak cu minung cu bia kan chim kho, Kan i chawn kho, kan lung lawmhnak kan i hrawm kho, kan ngeihchiatnak kan i hrawm kho. Bia kan i ruah khawhmi hi saram nakin Pathian thluachuah ahleiin kan conak hi a si. Hi bantukin pakhat le pakhat kan i chawnhbiak khawhnak a ruang cu zeidah a si tiah cun kan biakmi kan Pathian, a kan sertu kan Pathian amah hrimhrim hi bia a chimmi Pathian a si. Bia a chimmi Pathian kan ngeih hih! Rome chan lioah siseh, Jesuh Khrih a rak nun lioah siseh, a tuchan zongah an um ko lai, mi tampi nih bia a chim lomi Pathian a biami tampi an um. Sihmanhsehlaw kan biakmi kan Pathian cu vawlei a serle cangka bia a chim i nihin ni tiang bia a chimmi Pathian a simi hi lunglawmh awk taktak a si. Pathian nih Adam le Eve sinah biachim hram a rak i thawk i Abrahamte chungkhar hna siseh, Moses sinah siseh vawlei tuanbia vialte ah bia a  chim zungzaltu Pathian a si. Cun caan a vun tlin tikah, bia a khiahmi a vun tlin tikah amah i a biakam a simi a Fapa Jesuh Khrih hrimhrim kha kan sinah a rak thlah tikah kan sin bak ah kan hna hrimhrim in theih khawh ding in bia a kan chimtu Pathian ṭhiamṭhiam a si. Cu a si caah vawlei hramthawk in a kan chawn zungzal tu, bia a kan ruah zungzal tu Pathian aw hi zeizatdah kan theih hngalh?

Thawngṭha kan vun rel tikah a donghnak ah zei kan ti tawn? “Pathian Bia a si” kan ti . Kan zapi nih “Pathian kan i lawm” tiah kan ti. Bia a kan chimhmi, an vun relmi kan vun theih set lo ahcun a zeitu kha kan i lawm? Mah ruangah Bible kan rel i a donghnak i Pathian Bia a si timi zawnte i Pathian kan i lawm kan ti taktak ahcun Pathian bia an relmi kha kan lungthin dihlak tein ngai i lunglawmmi bia taktak kha siseh. A zei an rel an chimmi theih huaha lo, ngai huaha loin Pathian kan i lawm kan timi khi zeihmanh sullam a ngei lo. Kan nu kan pa nih an kan chimhhrin an kan cawnpiak tikah na ka chimhrin, na ka cawnpiak caah ka lawm tiah kan vun ti tikah an chimmi an bia kha ṭha tein kan ngai tik lawngah lunglawmh awk a si le silo ngeihchiat awk a si le silo kha a bia pimi a si. A bia kan theihmi cungah khan Pathian kan i lawm ti kha kan lungthin takin rak chim cio u sih. Bia a chim pengmi kan Pathian a si bantukin atu kan chan tiang zongah a Bible Cathiang in siseh, a Bupi cawnpiaknak in siseh, kan Pathian nih bia a kan chimh len ko. Thawngṭha a phuangmi hna sinin kan sinah bia a chim ko. Kan nu le kan pa, kan saya/ sayamah tehna, kan pawngkam kan minung hawi hna sinin kan Pathian nih bia a kan chimh lengmang ko. Hlanlio in profet ngan pipi a rak petu Pathian, siangpahrang ṭhaṭha a rak petu Pathian a si bantukin atu kan chan zongah hruaitu ṭhaṭha, cawnpiaktu ṭhaṭha a kan pek lengmang ko. Pathian nih kan sinah biachim hi a ngol bal lo.

          Cun Jesuh Khrih hrimhrim kha ‘Bia cu minung ah a cang’ ti i John Thawngṭha chung i a kan chimh bantukin Jesuh Khrih cu a bia zong in bia a chim i, a nun zia hrimhrim zong in Bia a si. Pathian Bia a sining kha phunhnih a si. A kan cawnpiaknak in Pathian bia kha a kan chimh hrin i, a nunning hrimhrim, a ruangpum hrimhrim kha Pathian Bia a si. Jesuh Khrih kan cohlan mi le Jesuh Khrih kan ngeihmi te kha Pathian Bia kan sin i a ratnak cu a si. Thlaici ṭha Jesuh Khrih kan sin i a ratnak te kha a si. Pathian bianung kan cohlan mi kha kan chungah thlaici ṭha tuh a si cang. Minung nih thlaici kan cin tikah, a theipar ṭha seh, a vui rah tam seh ti kan duh tikah thlaici kha a ṭha deuhdeuh in kan thim.

Vawleicungah minung nih thil ṭha kan timi hi tampi a um ko lai. Thil ṭha tampi lak i a ṭhacem cu Pathian i Bia Jesuh ṭhiamṭhiam a si ko. Mah ruangah thlaici ṭha lakah thlaici ṭhabik Jesuh Khrih pek kan simi hi lunglawmh awk ngaingai a si. Thlaici kan va tuh tikah, thlaici ṭhat lawng hi a za lo i thlaici kan tuhnak vawlei hmunhma le tuahsernak a simi nawn te hna, timhlamhnak tampi a herh ve. Vawlei ṭhatnak le nawn ṭha tein kan pekmi vawilei i a kheumi thlaici cu a ṭhan a fawi i a theipar a tampi. Cuve bantukin Jesuh Khrih kan sin i a rat i theipar a ngeih khawhnak ding caah kan lungthin le kan thlarau hi nifatin kan nunnak ah timhtuahnak ngei zungzal u sih.

Zarhpini caan lawngah timhtuahnak ngeih ding a si lo. Nifatin kan nunnak ah Jesuh Khrih he hawikomhnak caah timhtuah i kan lungthin innkaa kan hun piak tikah thlaici ṭha Jesuh Khrih amah hrimhrim kha kan sinah a ra i thei ṭha a tlai kho lai. Vawlei ṭha le thlaici ṭha an iton tikah a theipar tampi le vui ṭhaṭha tampi ah an i chuah kho. Pathian Bia Thlaici Thiang kan sin i a rat tikah a karhter chintu kan si ahcun lei thluachuah le van thluachuah a cotu kan si lai.

A tawinak i kan chim ahcun Thlaici ṭhabik a simi Kan Bawipa Jesuh Khrih vawlei cung i a rat tikah hin kan vawlei ahhin tah khoika hmunhmate kha hmunhma ṭhatnakbik cu a si? A tawinak in kan chim ahcun Nu Mary i ruang, Nu Mary i pum hrimhrim kha pei vawlei ahhin hmunhma ṭhatnakbik cu a si cu. Vawlei ṭhatnakbik ah a ra i a theipar tampi a karhmi cu Jesuh Khrih a si. Jesuh Khrih a thi i a thawhṭhannak kha theipar tampi a tlainak le a karhnak cu a si. A nunchung vialte i a hmuhmi sunparnak le lianhngannak vialte nakin a thawhṭhannak kha theipar ṭhabik a sinak cu a si. A thawhṭhannak thawngin kan sualnak vialte a thah dih, a ṭawl dih i nunnak a kan pek.

Nihin ah kan Bawipa Jesuh Khrih cu Thlaici a si i, thlaici vorhtu zong a si i a bia in siseh, a nunning in siseh, a karhchin lengmangtu a si bantukin kannih zong nih kan comi thlaici kha a theipar tampi tlai ter in mikip sinah thlaici ṭha a vorhtu le a petu si kho i zuam u sih. Donghnak ah Isiah Bible cathiang chungin donghter u sih. “Ka Bia cu van in a rung tlami ruah le hawrha bantuk a si lai. Ruah le hawrha nih cun van ah kirṭhan ti loin vawlei kha a hnawn ter i thlaici kha a khoh ter i, a ṭhan ter i thlaici tuhtu kha thlaici a pek hna i rawl eitu kha rawl a pek hna. Cubantuk cun ka kaa i a chuakmi Bia cu a si ve lai. Ka sinah a lawngin a ra kirṭhan lai lo. Tuah seh tiah a fialmi kha a tlolh lai lo i ka thlah hnawhchan mi thil ah khan a tlam a tling lai”. Pathian nih ruahti le dapti (hawrha) hmanh a sinah ṭhatnak pelo in kirṭhan lo dingin bia a kan kamh. Ruahti le dapti nakin man tampi a ngeimi minung kan nunnak zong vawlei ah Pathian nih a kan thlahnak chan tlamtling loin Pathian sinah a kirṭhan dingmi pakhat hmanh kan um lo. Pathian nih a kan thlahhnawh chanmi tlamtling tein a theipar, a vui a rah he Pathian sinah a phan dingmi lawngte kan si timi hi lunglawm tein i nunpi u sih.