Ngakchia Tipilpeknak
Zeiruangah Ngakchia Tipilnak kan pek?
Zeiruangah ngakchia Tipilnak kan pek timi kan chim hlanah Tipilnak he pehtlaiin Jesuh nih zeitin a kan cawnpiak timi zohṭi hna u sih.
Jn. 3:5 chungah Jesuh Khrih nih “Ahohmanh Ti le Thlarau in hrin asilo ahcun Pathian Pennak chungah a lut kho lai lo” a ti. Cucaah Pathian Pennak luh khawhnak ding caah Ti le Thlarau in hrinṭhan mi si a herh hrimhrim.
Mk. 16:15-16 chungah cun “Vawleicung khua zakipah va kal ulaw miphun kip kha Thawngṭhabia va chim hna u. A zum i Tipilnak a ingmi paoh nih Khamhnak an hmuh lai” a ti. Kan i ralrin dingah, hi Bible cacang i a ti duhmi cu Khamh a si dingah Zumhnak lawng a za lo i Tipil hi a herh hrimhrim tinak a si. A zummi lawng (ngakchia pawl Tipil pek loding) Tipil pekding a ti duhmi a si lo.
Mat. 28:19-20 chung kan zoh tikah a fiang chinchin. “Va kal ulaw miphun vialte kha ka zultu ah va ser hna uh, Pa le Fapa le Thiang Thlarau in Tipilnak ve pe ulaw kan fialmi hna hi an zulhnak hnga va cawnpiak hna u” a ti. Tipilnak pek hnuah cawnpiaknak a ra colh.
A cung i Jesuh Khrih bia kan zoh tikah ngakchia Tipil pekding le pek loding aa tel lo. Asinain Pathian Pennak co dingah le Khamhnak hmuh dingah cun Tipilnak a herh zia kan hmuh.
Ngakchia Tipilnak pek dingah khoika Bible cacang hmanhah fiang tein kan hmuh lo bantukin ngakchia Tipil pek hi a dik lo ruangah pek loding timi bia zong khoika Bible cacang hmahah fiang tein kan hmu fawn lai lo.
Sihmahsehlaw, Household Baptism timi innchungkhar timi inn-chungkhar i a buin Tipil innak cu a tanglei i Bible cacang hna chungah fiang tein kan hmuh khawh. Act. 10:24-48 ah Cornelius te innchungkhar: Act. 16:15 ah Lydia te innchungkhar: Act. 16:33 ah Philipi khua i thonginn cawngtu innchungkhar: 1Cor 1:16 ah Stephanes innchungkhar hna an si.
A cungah kan langhter mi innchungkhar pawl ahhin ngakchia pawl an itel lo ti cu fiang tein kan chim kho lo nain an itel lai ti cu zumh a um ko. Asinain, hi innchungkhar hna i Tipil innak chirhchan in Bupi nih ngakchia pawl Tipilnak a pekmi a si lo.
Ngakchia pawl Tipilnak kan pek hnanak a ruangbik cu Effects of Baptism timi Tipilnak nih a chuahpi mi ṭhathnemhnak ruangah a si deuh. Tipilnak nih a chuahpi mi ṭhathnemhnak hna cu:
(1). Sual hrampi (Adam le Eve sualnak) in thianternak (Upa caah cun mah pumpak sualnak aa tel);
(2). Pathian fa cannak;
(3). Vancungram rocutu sinak;
(4). Khrihfa chungtel sinak hna an si.
A cung i kan chimmi ṭhathnemhnak pawl hi kan thlarau caah thil biapi le a herhmi pawl an si. Kan (ngakchia hna) fale hna cu zumhnak an ngeih rih ṭung lo, zeihmanh an hal thiam rih ṭung lo, tiin an thlarau i a herhmi ṭhathnemhnak pawl hi pe loin maw kan um lai? An taksa ca i a herhmi vialte an kan hallo hmanh ah hnuk kan dinh, rawl kan pek, hnipuan kan hrukter hna a si lo maw? An thlarau caah a herhmi zong kanmah nu le pa hna nih kan zalhpiak hna ahcun aa dawh ko na ti lo maw?
Cu lawng si loin, Tipilnak hi Biakam hlun chan i Circumcision timi cuarpar tannak he pehtlaihnak a ngeimi a si. Pathian nih Abraham he biakamnak a rak tuah zongah, cu biakamnak ahcun a miphun a simi pa vialte (ngakchia zong ni 8 an tlin ni ah) cuarpar tan dingah a rak fial hna. Cucaah cuarpar tannak in biakamnak chungtel sinak a rak langhter.
Jesuh Khrih a rat hnu Biakam thar ahcun, Biakam thar i hmelchunhnak cu Ti le Thlarau in hrinṭhannak timi Tipil innak hi a si. Cucaah, Biakamthar chungtel si dingah Tipilnak in cu a hau hrimhrim ko.
Cuti a si ahcun kan fale hna hi Biakam thar chungtel si nan siang hna maw siang lo ti cu kanmah tein ruah ding hrimhrim a herhmi a si ko. Ngakchia tipil peknak hi kumzabu 2 in Bupi chungah zalong tein an rak hmannak kong zong Bupi tuanbia cauk tampi chungah kan hmuh khawh. A.D 1500 hnu lawngah ngakchia Tipil peknak a rak dohtu an rak chuak hi a si.