Pope thar cu Daihnak Meiinn siko seh

Cardinal Charbel nih Pope thar cu daihnak meiinn si dingin thla a cam.

Hmailei caah Ruahchannak

Pope thar cu Daihnak Meiinn si ko seh!

Khrih Jesuh chung i ka hawile hna

Tuanbia ah thlennak tampi kan hmuh. Gaza rawhralnak, ral nih a denmi Ukraine khuapi hna, Myanmar ram dai tein au thawng, Africa ram i tihalnak le daihnak a duh tukmi vawlei kan hmuh. Kan i ṭhen kho lo. A thi cangmi Pope Francis hi kan upat taktak ahcun daihnak caah rian kan ṭuan a hau.

Hliamhma a tuarmi le a ngaihchiami a fale caah a dir kho lomi hringtu pa bantukin lungthin ṭhawng nain a derthawmmi lungthin he Pope Francis nih South Sudan buainak hruaitu hna hmaiah a khuk aa bil i daihnak a nawl hna ti kha kan i cinken khawh. A tuahsernak cu bia nakin a ṭhawng deuhmi tehte pakhat in tuanbia ah aa tel. Hruaitu ṭha sinak cu uknak in si loin toidornak in a rami a si ti kha vawleipi a hmuhsak. A nawlnak cu ramkhel kong si loin Khrih lungthin chungin a si.

Asinain ral mei cu a lin chin lengmang. Nihin ah, hmun paruk ah ralpi ngan paruk a um, cun pengkulh kul (20) ah buainak a um, mi thong tampi an thi i mi nuai tampi an hram an thlak. Hihi ram tampi nih an tonmi ngaihchiatnak a si. Huatnak nih a tei tikah ahohmanh an luat lo. Nuclear ralthuam 13,000 leng nih atuah minung hi hrawh dih an timh cang. Huatnak le hrut ngaiin biakhiahnak tuahmi pakhat nih nuclear hrawhnak a chuahter khawh, khuapi hna kha vutcam ah a canter khawh hna, tiva hna kha sivai a pek khawh hna i van a muiter khawh hna.

Khatlei ah, vawleipumpi lumnak nih kan umnak vawlei a hrawh chin lengmang. Thlaici a tlau, tiva le tidil hna an ro, tikhal tlang hna an ti, vawleipi nih harnak a tong. Scientist pawl nih hmailei raldohnak cu zinan ruang i ral a si ti lai lo, nunnak hrampi a simi ti ruangah ral a si lai tiah an chim.

Cucaah, minung caah a dirkamhtu aw kan herh. Minung sining le a nunnak a hrocertu lungthin a hakmi hna kha biaceihnak ah a chuahpi khomi aw kan herh. Hi aw hi minung hi rawhralnak dihlak in a kirtertu aw a si awk a si.

Pope thar nih Catholic Khrihfabu cu a puitling deuhmi le a fek deuhmi zumhnak ah a hruai hna lai, Jesuh he i fonhnak ngan deuh ah a hruai hna lai i, vawleicung ah thumkomh Pathian dawtnak ngan deuh a ngeihter hna lai. Nihin ah ramkip biaceihnak zung le humanitarian agreements, United Nations telh in daihnak sertu a simi hna fehternak caah rian kan ṭuan a hau. Hihi Khrih vawleicung a ratnak a hrampi cu a si. Asinain ziaza lei nawlngeihnak in a khatmi aw umlo ahcun, hi hna hi an ṭha lai lo.

Minung khamhnak caah biaknak kip nih hmunkhat ah rian an ṭuan a hau. Thahnak nakin khamhnak kha biapi deuh ah an chiah awk a si, cun ruahchannak a ngei lomi hna caah ruahchannak an pek awk a si. Ruahchannak thar a chuahpitu ding hi  vawlei nih a herh.

Pope thar cu ruahchannak thar a chuahpitu a si hrimhrim lai.

Pope thar cu daihnak meiinn si ko seh.

#CardinalCharlesBo