Khrih Nunzia Cawnnak Cauk kong
CA LETTU HMAHTHAHNAK
Hi ca i sawhsawh in rel dingmi a si lo, thuk pi in ruat le tuaktaan hnu ah ziaza dinnak ruahkhun ding asi i Kawl holh bia ah arak um diam cangmi ziaza dinnak ca bia hmannak ning in ka lehmi a si. Biaknak phung timi cu mah i a rak i chuahthawknak a hram hmun le a biapi bik mi phun hna i zumhnak bia, bia hman ning hna he peh in a ra chuakmi ram, miphun, bia, ca hna in biatak cu Bible ca, Bible biafang hna sinakin, khi biaknak a karhnak hmun dang le miphun chungah pil in a pemh i cun ram chungah a hram bia (holh), ca lei biafang hmannak sinak in cu in serchinmi hmun le miphun hna nih zumh in an cohlan cio. Cuticun angaite ahcun mah ngeihmi ti cu a um lo.
Sihmanhsehlaw zumhmi biaknak pakhat i a hleikhun tein chiahmi dinnak zulhphung, biatak sinak in rikhiah (fehter) sullam hmuhsakmi biafang bia, biaknak zulhtawnmi phunglam, ruahkhunmi dinnak ziaza, hngalhnak phunphun hna, cu in voi khat ṭhan in a ra chuakmi a phi tiah a chang chang in aa pehtlaimi biaknak lei biafang hna si hna seh, biatlang si hna seh, ram pakhat in pakhat ah aa thleng i miphun a phunphun sin ah a phanh, an cohlan cio i hman cio pah buin sullam tlaihchih in dirkamhnak, asiloah biaknak hlun, zumhnak hlun, hmun le ram hruhchihnak zumhning hna he cawhkulh in a sullam thlen, ruahnak le zumhnak pial in zumhnak phun dang ngeihnak kha asi ṭheo tawn.
Cuti a si caah biaknak lei ca a lettu hna caah a hleice in harnak a si mi biafang thimnak, thlennak, rikhiah ṭhencheunak, hrial awk ṭha lo i hmun um hna hman mi biatlang hna i mitamnak nih ruahdamh cia mi sullam kha dikthliar in siseh, a tlaangpi in si seh, zei rel lo hnonmi holh bia ca kip ah a chuak ṭheo. Mi hmun le caan ningin aa tlak rem i mitampi nih fawitein an theih hngalh awk a si mi holh, biatlang, biafang hna in thlen i ka rak leh piakmi a si. Khi khi cu a rit tukmi ṭuanvo nganpi a si.
Sihmanhsehlaw biatak tiah cun holh bia, chimning le a ṭial dan hna cu khi bantuk ṭhiamṭhiam a si, miphun pakhat in pakhat ah, hmun ram (peng) pakhat in pakhat ah, rampi pakhat in pakhat ah thleng in, cohlanmi an hman cio mi lawng a um i khoikha ram, zeibantuk miphun hna i holh bia, ca, Bible, sianginn cawnmi cauk hna hmanh kha va cawn le hlathlai tuah hmanh, khi konglam hna kha fiangtein na hmuh khawh hna lai.
Cuti a si caah ca lettu nih hin zei miphun hna i ca, biafang, biatlaang, phunglam hna hmanh kha a fekmi, a hmaanbikmi , a dikthliarmi tiah ka zumh a si lo. Khi bantuk ningin a hmannak kong kha holh ca lei thiamnak (linguistics) thiamsang hna nih fianternak an tuah cangmi a si. Keimah nih fianternak tuahṭhan a hau ti lo. Sihmanhsehlaw, a tu ah ka lehmi cauk chungah hin keimah nih ka cohlan i ka hmanmi biafang, biatlang, ka serchuahmi biafang, sullam ka hmuhsak piakmi, miphun dang ramdang holhbia telh in biafang le a hman ning hna(idioms) kha hi holhbia lehmi cauk chungah hin nan hmuh lai. Saupi ka fianter ti lai lo. Biafang cheukhat kha a ralchantu cheukhat an um tiah ka theih caah siseh, mah biafang i hnulei tuanbia le zei ram, mizei phun hna sin in a rak i thlengmi ram dang mi le miphun dang hna i holhbia le zumhmi a si ti a si caah siseh, “kalaa” ti le “kula” timi biafang bantuk pei a si ko cu tiah alnak um lo in thleidan tein biafang thar ka tuah (ser) i ka lehmi a si. Cuti biafang serchuah i ka leh i ka hman caah ca ka lehnak ah hin a hnut tlai tuk caah siseh, a sullam hmuhsah a har tuk caah siseh, miraang cafang he peh in ka fianter chih caah siseh, ca reltu nih ruah le tuaktaan a har lai caah siseh, kei mah caṭiatu nih, kei mah ṭialmi kei mah nawlngeihnak a si tiah hruh phah tiang in ka ruatmi holh biadang hna kha aa tlak ning tein Kalaa holh “Puranaa” kha Myanmar nih Pawrana ti in remh i an auhmi Myanmar caah a kau ngaimi biafang sinak in an hmannak, ramdang in a changchang in a rat tlenkarhmi “patato” aalu hmanh kha Kalaa ram in kalaa nih “aalu” tiah an kawh caah Kawl hna zong nih aalu tiah kan auh ve i mah le hmun ram hrampi kung (flora) tiah ruah a si cangmi mah ngeihmi holhbia si nak in an hman cio mi kha ruahchih in chantiluan ningin mah duhnak ningin an hman cio mi cungah bia tam ti loin holhbia tlawmnak a dai. Lam peng hrial in dir piak ahcun ral um lo, kum sau nun ding asimi hi khulrang mi mawtawka (miraang holh) chan ah hin hi phunglam tein ka hman i holh ca ka leh a si.
Thomas Kempis ca nih thuk pi in a simi hna kha careltu zong nih thuk piin ruat in kawl a hau lai. Calettu nih Myanmar biafang le biatlang hmaning kha a thim i aa tlaking tein a hman ca zong ah hin careltu nih thuk piin sullam ruah tuaktaan hnu ah sullam lak i biatak (dinnak) ruahkhun, dinnak ziaza ruahkhun in na kawl te ding kha ka ruah caah a hleice in nawl kan duh ko hna.
Hi calehmi cauk a chuah khawhnak dingah a ka forhfialtu Bishop Gabriel cungah siseh, Bishop Abraham cungah siseh, ca a ka check piaktu Msgr.Bronu Sein Win cungah siseh, canam khawhnak dingah a kakip in a ka bawmtu min langhter ka duh lomi hna le bawmtu dang vialte zapi kha hi cauk a reltu dihlak nih Pa Pathian sinah thluachuah hal thla nan campiak cio nak lai kan nawl hna.