REV. FR. ANDRE BAREIGHTS (M.E.P)
Lautu ramah Thlaci thlak hmasabiktu
Fr. Bareights cu December 15, 1930 kum, France ramah a chuak. December 18 ni ah tipil a ing. A ngakchiat tein cinthlaknak lei, saṭil zuatnak lei kha a duhmi a si i Sianginn kharcaan ah a chuahkehnak khua lei a tlunchel ah a hawile he nuam tein lente i celh kha a uarmi a si.
Fapa pali lakah upabik a si. 1936-942 tiang Siangniam le Sianglai ruun a kai. Octtober 1, 1949 kumah M.E.P Sianginn Paris ah a lut. May 29, 1955 Pentecost ni ah Tlangbawi thar (20) hna he Tlangbawi cannak a hmu ve. Amah cu Myanmarram Mandalay Diocese i mission rianṭuan dingin thlahmi a si ve. Culioah mission rianṭuan mino Tlangbawi hna Myanmarram luh a harlio caan a si. Amah he Tlangbawi pa (4), visa an hngah chungah Scotland ah a kal i mission rian bawmh pahin Mirang holh a cawng. 1957 kum January in May thla tiang France chaklei kibik i Little Catholic University ah sii lei thiamnak, Gregorian Pathian hla fimthiamnak kha a cawng. Cu kum October 17 ni ah Myanmarram luhnak nawl a hmu i November 28 ni ah Yangon a phan. 1958-59 kum ah Shwebo ah thlah a si i Kawlholh a cawnpah in mission rian a ṭuan.
Vawleicung ralpi pahnihnak a dih tikah Bishop Faliere nih 1959 kumah Hakha leiah a thlah. 1959 kum February thla thawkah Hakha a phan. Hakha holh a cawn hmasa. Ahnuah “Lautu” timi cahmai (50) aa telmi cauk chuah khawhnak tiangin holh a thiam.
1966 kum ah Fr. Bareigts cu Myanmarram in a kir ṭhan. Paris a phanh tikah miphun ṭengnge holh, nunphung hna kha thukdeuh in cawn dingah a uktu hna nih an forhfial. 1966-1969 tiang cu fimnak a cawn peh buin 1969 kum June thla ah ‘Lautu Holh, ca le nunphung’ timi tlangtar in cathluan a pek i M.A Degree an pek. Siang cachim hna nih a cathluan hrambunh in Paraku (Ph. D) degree lakter an duh nain ramdang lei mission rianṭuantu aa thim deuh caah 1970 kum August 4 ah Taiwan ah an thlah ṭhan. 2005 kum October ni 7 a thih ni tiang Taiwan ah mission rianṭuan in a rak um.
*A cunglei kong hna he pehtlaihin Cauk. Article a ṭialmi tampi a um.
(History of Catholic Mission in Chin Hills, Diamond Jubilee, Mindat p.158-160)
HNARING I BIAKNAK KARHTER HRAMTHAWKNAK
1959 kum January 11 ni ah Mandalay Bishop Faliere nih Hakha le Matupi kar biaknak karhter dingin ṭuanvo peknak bantukin Rev. Fr. Muffat, Fr. Lespade, Fr. Roy le Fr. Dixneuf he hmunkhat in Laitlang lei an rak kai i 1959 kum February thla ni 12 ah Fr. Roy le Fr. Bareigts cu Hakha khua an rak phan. Cu kum May 27 in June thla 17 ni tiang Hakha le Matupi karlak ah Fr. Bareigts umnak kawl dingah ni 22 rauh in khual an rak tlawng i khuate (28) an phan. Lamhruaitu ah Saya Sum Hrang (Calthawng) nih a rak zulh hna. Hnaring, Matupi, Surkhua, Sakta – khuali lawng nih tluninn an rak onh hna i a dang khua (24) nih tluninn an rak onh hna lo. Fr. Bareigts Diary
Lautu Circle Chairman U Ṭhio Ling (Bishop Lucius Hre Kung pa) nih Hakha in lam a rak hruai hna i May thla 30, 1959 kumah Hnaring an rak phan. Bangla ah an riak. A thaizing ah Hnaring bawi Pu Lian Kulh, Circle Chairman Pu Ṭhio Ling, Hnaring (B) Khuabawi Pu Mang Thang le tlangpi hna an i pum i Fr. Bareigts kha Hnaring khua ah umnak nawl an rak pek. Pu Thar Kung inn kha MMK 400/- in an cawk tak i Father pawl cu Matupi ah an lan. Rev. Fr. Roy nih rak thlah in 1959 kumah Fr. Bareigts cu Hnaring a rak phan ṭhan i a inn ah a um.
Hmasabik Missa cu Khrih Siangpahrang Puaini ah a rak tuah. Fr. Bareigts rian bawmh dingah Pu Ṭhio Ling nih Michael Mg. Hre Hmung a rak chimh piak i 15-11-1959 ni ah Catholic ah a rak luh ter. 29-11-1959 kum Zarhpini Missa thawkin Michael Hre Hmung nih pumh hruai hram a rak thawk. Cu ni thawkin Missa hruai rian, Tlangbawipa kha Lautu holh cawnpiaknak, Lautu ca sernak, Lautu ca rel, Thlacamnak cauk, Hla cauk chuahnak rian hna an rak ṭuan i laksawng (thahlawh) caah Fatherpa nih MMK 20/- a rak pek.
Fr. Bareigts cu 1966 kum, an ram France ah a kir ṭhan.