A Thiang Zarh caah Pope Francis i Thazaang Laknak

A thiang zarh caah kan Pope Francis nih thazaang laknak video in a chimmi thawngṭhabia

Dawtmi nu le pa, u le nau hna, nan dam cio hna maw? Tuzan nanmah le nan inn cio len dingah caanṭha ka ngei. Tuah ningkel bantuk siloin phundang deuh in si lai. Nanmah nih nawl nan ka pek a si ahcun nanmah he chikhatte a si zongah biaruah ṭi ka duh.
Atu bantuk harnak kan tonlio caan ahhin kan ton liomi harnak vialte kan tei khawhnak hnga caah a hlankan nunning bantuk siloin phundang deuh in nan chungkhar ah nan nung lai ti cu keimah zong nih kan intuar pi ve hna. A lengchuah lo, Sianginn zong kai loin a ummi ngakchia hna le mino hna i hmailei an nunnak lamthluan caah keimah zong nih khua ka ruahpiak ve hna. Chungkhar dihlak in ka thinlung chungah nan um dih. Abiapi in midamlo an umnak chungkhar le Covid-19 ruangah chungkhar lei thih le loh a tong i a tap/a hram mi chungkhar dihlak hna dihlak ka thinlung ah nan um dih.
Tuni cu harnak a tongmi hna kong ka ruah tikah ka thlavai a kiang. Nan dihlak chungin ka thinlung ah naihniam deuh in a ummi upa deuh (tar) pawl caah khua ka ruat. Corona zawtnak ruangah siizung a phanmi hna zong ka philh hna lo.
Vawlei pumpi i a tlungmi zawtnak (Corona) ruangah anmah nunnak ca hmanh ah ruah loin mi vialte caah a herhnakbik hmunhma ah an nunnak pek in rianṭuan mi hna zong ka philh hna lo. Annih cu zeitik caan paoh ah rianṭuan khomi paral ṭha an si. Tangka leiah chambaunak a ngei i hmailei nunnak caah lungrethei in a ummi zong an um lai ti zong ka theih ko. Covid zawtnak ruangah anmah caah siseh, a leng i a ummi an chungkhar le an dawtmi hna caah lungrethei/ ṭihphannak in a ummi thongtla pawl ca zongah ka lung cu a phanṭhan hoi.
Inn le lo ngeilo, i bochan awk hmanh a ngeilo mi hna ca zongah khua ka ruatṭhan. Atu caan hi kan zapi/ mi vialte caah a har lio caan te a si. Mah vialte hi ka theih dih ko. Mah ruangah atu ka chimmi bia hna in le ka fale nan dihlak caah nanmah he naihniam tein ka um ko tinak thinlung he dawtnak in ka rak langhter duhnak a si.
Atu kan caan hi a ṭhabik siding in i zuam cio hna u sih. Kan pawngkam i a herhdeuhnak ah papek deuh in pekkhawh i zuam hna u sih. A thlavai kiangmi hna kha kawl hna usihlaw zatlang (mibu) he pehtlaihnak tuahpiak asiloah phone zong in pehtlaihnak tuah hna usih. Italy ram le vawlei pumpi i harnak a tongmi vialte hna caah thla campiak hna usih. Kan zapi tein, i ṭhenṭhek dih hmanh usih law  dawtnak thinlung kha kan sersiam a si ahcun zeitluk a hlatnak hmun i kan um hmanh ah kan lungthin cu a phan kho a si ko lo maw? Atu kan vawleipi i a herhmi cu dawtnak thinlung ser kha a si.
A hlan he i lawh loin a thiang zarh i puai hna cu kannih nih kan tuah cang lai. Pathian i a dongkho lomi dawtnak le thawngṭhabia cu a tawinak in ka langhternak a si. Kanmah le kan khuachung hna cu a king dih ko lai nain Thawhṭhan (Easter) thawngṭhabia cu a tlerh in aa tler dih lai. 2Korin 5:15 ah St. Paul nih a chimmi cu ‘Mi vialte caah a thihnak chan cu minung nih hin an nun chungah anmah ca lawngah nung ti loin, anmah ruang i thihnak a ing i a thoṭhan mipa ca i an nunnak hnga caah a si’. A thoṭhan mi Jesuh Khrih i a thawhṭhannak cu thihnak a tei ruangah a si.
Thawhṭhan zumhnak cu kanmah i kan i ruahchannak kha thazaang a pek. Tuzan hi ka fale nan dihlak he keimah nih bia kan i ruahṭinak cu a si. Kan vawleipi i a  tlungmi zawtnak ṭhalo in kan luat khawhnak hnga caah a ṭhabik caan timi cu kan i ruahchan ding a si. Cucu ruahchannak cu a si. Ruahchannak timi cu zeitik hmanh ah hnahnawhnak a kan pe lo, ruahnak ṭhalo zong a siter lo. Ruahchannak ah Dawtnak, Lungsaunak kha pakhat le pakhat cungah chiah in atu caan hna ahhin a ṭhabik siding in i timtuah hna usih.
Atu bantukin nan inn cio ah len in biachimnak caanṭha nan ka pek caah kaa lawm. Awnem tein biachimnak in harnak a tongmi hna, ngakchia hna le upa (tar) hna sinah naihniam tein umkhawh i zuam hna usih. Anmah hna sinah keimah cu an sinah naihniam tein ka um venak kong le Pathian nih a rauhhlan ah a ṭhalo mi harnak chungin a kan khamh cang lainak kong zong ka chimhpiak chih uh. Keimah ca zongah ka fale nan dihlak in thla ka campiak ve uh. Nan zapi tein rawl-ei kaa thaw dih uh. A rauhhlan ah kan i tong hna lai.