Reflection for 23 February 2025

Heb 7:25-8:6, Mk 3:7-12

Khrih Ah Zeizong Vialte Serthar Asinak

Nihin Bible kan relmi ah Khrih Jesuh cu Tlangbawi Ngan a sinak kong kan theihṭhan. Minung tlangbawi hna cu saram thi hmang in anmah an sualnak caah le midang an sualnak caah raithawinak an rak tuah. Anmah zong minung an si ve caah sualnak an ngei ve. Sihmanhsehlaw, Jesuh Khrih nih saram thi in siloin amah pum kha raithawinak ah a pek. Cucaah minung kan sualnak ngaihthiam kan sinak dingah saram thi in raithawinak pek a herh ti lo. Khrih nih voikhat ah zalak in kan caah raithawinak a kan pek piak. Khrih Tlangbawi Ngan nih a mah pum kha Pathian sinah raithawinak a peknak thawngin minung kan sualnak chungin a kan khamh lawng si loin raithawinak ah an rak hman tawnmi saṭil, saram vialte zong kha a khamhchih ve hna tiah kan ti khawh. Khrih nih kan thlarau lawng a kan khamh lo, kan pumsa, kan khuasak kan tintuknak ah zatlaknak le sungralnak a chuahpitu liampalnak vialtein a kan chanhchuah.

Chim duhmi cu, Khrih Jesuh nih amah pum kha zungzal a hmunmi rawithawinak ah rak pe hlah sehlaw, nihin ni ah kan sualnak le kan palhnak ngaihthiamnak caah zarh fatin, thla fatin, kum fatin in saram thi in raithawinak tuah va sisehlaw, raithawinak caah vok le ar hmanh aa cawk kho lomi, aa zalh kho lomi kan tampi kho men. Cucaah, atu kan chan, chanthar theologian hna nih an timi cu, Khrih nih minung kan sualnak in a kan tlanh, a kan khamh lawng siloin saram thilnung vialte zong nih khamhnak an hmuh ve tiah an tinak cu a si cu. Sertharnak (new creation) cu Khrih Jesuh thi in serthar kan si i, minung ca lawng ah asi lo, van le vawlei dihlak (the whole universe) kha Khrih Tlangbawi Ngan nih a thi in a tharchuah. Cucaah kan vawleipi hi Khrih ta asi caah  Pathian sermi thilri hna zohkhenhnak (care of creation/ stewardship) timi, minung cu Pathian chaw kengtu kan si timi catlang an aupi lennak asi cu.

Nihin thawngṭhabia kan theihmi chungah, Bawipa Jesuh le a zultu hna khual an tlawnnak ah mi tamtuk nih an zulh caah, Bawipa Jesuh cu mi nih an ka naan sual lai ti a phan caah lawng pakhat in ka timh piak uh tiah a ti hnanak kong le mitampi a damternak hna kong kan theih. Minung nih kan duhbik mi cu ngandamnak asi timi a lang. A zawmi lawng nih ngandamnak i a man kha ṭha tein an theih khawh. Kan damlio ahcun inn ṭha le lo ṭha le thil ṭhaṭha kan duh, chunmang a phunphun kan ngei tawn. Sihmanhsehlaw, damlonak le cancer zawtnak pakhatkhat nih a kan tlunh tik ahcun kan ngeihmi inn ṭha le lo ṭha hna zong sullam an ngei tilo i, nikhat nihnih, thlakhat thlahnih kan nun a sau khawhnak hnga kan ngeihmi chaw le va le inn hmun loram vialte zuar in kan i thlop tawn.

Damnak pekhotu sibawi minthang kan theih tikah kan ngeihmi dihlak chuah in sibawi ṭha sin kan panh tawn. Cuve bangin kan Bawipa zong mi tampi nih damnak hmuhduh ah an rak fuh an ka naan ti a phannak le lawng pakhat an timh piaknak asi. Cuve bangin, nihin kan chan zongah Pathian rianṭuanmi hna nih mipi sinah bawmhchanhnak, rianṭha ṭuannak a phunphun tuah asi tikah mitampi he kan um, kan ṭhutṭi tikah kanmah leiin, i ralrin dingmi tampi a um ve. Mizapi he cawhrup in rian kan ṭuan ko lio zongah a dang tein umnak hmunhma le a caan kan lak thiam a herh ve. Cuti asilo ahcun zapi lakah siarem lonak tete a chuak tawn. Pathian rianṭuantu kan dihlak in siseh, zumtu Khrihfa kan zapi tein siseh, Khrih le a ram ca i rian kan ṭuan tikah lungtleng hnavar ngeiin a um a ṭhu thiammi kan sinak hnga Bawipa nih fimthiamnak kan pe seh.