Bawinu Puai an tuah
Cardinal Tagle nih Antipolo Marian puai ah duhpatmi hna kha Khrihfa ruahchannak biacah in, thazaang a pek
Cindy Gorospe nih a tialmi | January 12, 2025
Cardinal Luis Antonio Tagle nih Marian puai ah duhpatmi (devotees) hna kha Pathian nih Thiang Thlarau hmangin an lungthin chungah a thletmi Pathian ziaza ṭha pakhat bantukin cohlan awkah Khrihfa ruahchannak in, a auh hna, an thlarau khualtlawnnak ah zumhnak le dawtnak he nun awkah thazaang a pek hna.
Tagle nih hi thazaang petu bia hi January 9 in 11, 2025 tiang, Antipolo Biakinn tiah auhmi, Daihnak le Khualtlawnnak Bawinu Shrine ah a hrawm.
“Thluachuak mi Ngaknu Mary, Kan Nu le Ruahchannak in kan Khualtlawnnak ah Kan Zohchunh awk” timi tlangtar in tuahmi puai cu, Filipino mipi nih an dawtmi Nu Mary, Antipolo Khuaruahhar Ngaknu thiang cungah zumhnak le pumpeknak thukpi langhternak a si.
Nithum chung puai cu January ni 9 ah thawk asi i Sual phuannak Sacrament hi a biapiin an chiah, Pathian a biami hna kha thlarau tharchuahnak le Pathian he thukdeuh in pehtlaihnak ngeihding caantha a pek hna.
Ni hnihnak, January ni 10 ah, karuna (charity) rianṭuan a ṭhatnak kha pa a pek, aa telmi hna kha Mary an duhpatnak langhternak caah, a herhmi hna sin phanh awkah thazaang a pek hna.
Puai cu January 11 ah mipi nih an i ngaih ngaimi Marian Conference le Missa in a dong, Cardinal Luis Antonio Tagle, Dicastery for Evangelization Pro-Prefect nih a hruai hna.
Pathian a biami thong tampi sinah bia a chim lioah, Tagle nih lungthintak tein phung a chim i, thluachuahnak a hmumi Ngaknu Mary cu Khrihfa ruahchannak taktak i zohchunh awk a si tiah a langhter.
“Kan Bawinu nih Pathian sin lawngin a rami kha cohlan awkah a kan sawm,” tiah Cardinal Tagle nih a thanh, zumtu hna kha vawlei biakamnak hna nakin Pathian dawtnak ah an nunnak hrambunh dingin a forh hna.
Cardinal nih a bia cu Jubilee Kum 2025 tlangtar, “Ruahchannak in Khualtlawngmi” he zong a pehtlaihter. Ralchanhnak le fahnak a chuahtertu, ruahchannak hmaanlo nih a chuahpimi ṭihnung kong kha ralrin a pek hna, zumtu hna kha Khrih cawnpiaknak he aa tlakmi lawmhnak, himnak le mah le mah i bochannak kong an ruahnak kha thianh awkah a forh hna.
A kaudeuh mi mission rianṭuannak ah Marian Conference nih, Antipolo Shrine cu Asia ram ah nunphung, biaknak le Marian cawnnak caah a hruaitu hmun pakhat dirh khawhnak ding caah a biapituk mi kehlan a si.
Hi timhtuahnak nih hin Philippines ram chung lawng si loin pengtlang pumpi ah thluachuah a hmumi ngaknu thiang Mary sinah biaknak thukpi le kauhter a timh.
Hngalh awk ngai a simi cu, Daihnak le Khualtlawnnak Ṭha, Nu Mary Shrine nih Philippines lawng siloin Southeast Asia ah a hmasabik International shrine a sinak le Asia ram ah a hmasabik International Marian Shrine zong a si.
A rummi tuanbia le a hmunmi pumpeknak nih vawleicung pumpi ah khualtlawngmi nuai tampi caah ruahchannak le zumhnak meiinn ah a ser.