January 15, 2025 caah ruahnak cheuhnak
(Reading 1, Hebrews 2:14-18/ Responsorial Psalm, Psalms 105:1-2, 3-4, 6-7, 8-9/ Gospel, Mark 1:29-39)
1. Hebru cakuat chungin kan rel hmasabik mi nih kan zumhnak “thilthup” a thukmi, minung sinak kong kha a kan hngalhter ṭhan. Thluachuah Petu Thumkomh Pathian i Pahnihnak Minung, van le vawlei dihlak a sertu Bia, Pa i Fapa ngeihchunte nih kan minung sinak kha a lak!
Cun a Pathian sinak kha kan i hrawm. Khrihfabu hmasa hna nih lam tampi in an chim bantukin, Amah bantuk kan si khawhnak hnga kanmah bantuk a si ve. A khamhnak nunnak, sifah harnak, thihnak le thawhṭhannak thawngin kan sualnak man kha a pek i thihnak, zungzal ṭhennak in a kan khamh.
Nunnak lamthar caah a kan khamh, velngeihnak le zumhnak thawngin. amah chungah kan nung. Hi cakuat a ṭialtu nih a kan theihter bangin sualnak dah ti lo cu zeizong vialte ah kanmah bantuk ah a cang (Hebrew 2:17 le 4:15).
Minung tling, Pathian tling
A Thiangmi a minung sinak ah Jesuh Khrih cu kan harnak chungah a lut i kan caah zawnruahnak in a khat. Zaangfahnak timi Greek holh in a sullam cu midang harnak chungah luh tinak a si. Jesuh cu kan harsatnak le harnak chungah a lut cang. Hihi kan zum maw? Zaangfahnak a ngeimi kan Khamhtu sinah nikhat chung kan i mer maw? Thianhlimnak ah kan ṭhancho khawhnak ding le a Pathian sinak kan i hrawm khawhnak ding caah kan herhmi vel cu amah kha kan hal maw?
2. Jesuh cu midang i temtuarnak chungah a luh tikah, Thawngṭha chung i kan theihmi bantukin Simon Peter le a unau Andrew inn ah a luh tikah Jesuh i a zaangfahnak kan hmuh. Simon Peter i a nupi cu a dam lo i ihkhun cungah a um. Jesuh nih a kut in a tlaih, a thawhter i a damter! Pathian Pennak nih mipi hmai ah a rianṭuannak ah a luhhnawh mi hmelchunhnak a si. Zeizong vialte hnu ah, hi pennak thawk dingin a ra.
Cun, Thihnak a tei cang i thihnak in a thoṭhan cang caah a nung rih ko! Cun Simon Peter a nupi i nu nih damnak a hmuh tikah a lehrulhnak kha zoh hmanh! Bawipa rianṭuan hram a thawk colh! Nunnak ah pakhat cio nih kan i zuam. Hi Jesuh lila nih hin a kut a kan samh. Amah kut a si ti kan hngal maw? Amah sinah kan kut kan samh maw?
Thlarau lei, thinlung lei, pehtlaihnak lei, tangka lei, asiloah taksa lei in a kan damter tikah kan hngalh maw? Nihin ah kan sakmi Salm “Yahweh cu thangṭhat u, a min au u, a tuahmi thil kha miphun hna sinah thanh u” timi hi kan duh maw? Nifatin cutin tuah awkah i thim hna u sih.
3. Mithiang Mark nih Peter nupi i a nu damnak kong a kan chimh hnu ah, “Khuami vialte cu innka ah an i pum i, zawtnak phun khatkhat nih a zawmi tampi a damter hna” tiah kan theih. “cun “khuachia tampi zong a ṭhawl hna, sihmanhsehlaw amah cu ahodah a si ti kha an hngalh caah biachim a sianh hna lo.”
Hihi ngol hna u sih law ruat hna u sih. Thawngṭha cauk hna kha kan ngaih khawh i a luancia kum thonghnih lio thil cangmi kong lawngte an si tiah kan ruah khawh. Jesuh rianṭuannak cu nihin tiang a pehzulh ko! Kan lakah a kal i a um. Thlarau mit a ngeimi hna nih an hmuh khawhnak hnga, sualnak le ṭhatlonak taktak nih a chuahtermi saltannak chungin pa le nu hna kha damter awk le luatter awkah a kut a samh hna.
Cun a si, ṭhatlonak cu a um taktak. Catholic Khrihfabu Catechism nih “Satan asiloah khuachia le a dang khuachia hna cu Pathian le a timhtuahnak riantuan awkah zalong tein a almi a tlu cangmi vancungmi an si. Pathian dohnak ah an thimnak cu a fiang ko. Pathian dohnak ah minung kha pehtlaihter an i zuam.”a ti (CCC #414).
Khuachia cu a um taktakmi a si. Asinain khuachia zong Jesuh Khrih nih a tei cang. Cucaah, miṭhalo nih a kan tukforh asiloah Bawipa zulhnak lam in a kan pialter tikah, kan kut kan samh i Jesuh nih nihin ah kan theihmi minung hna caah a tuahmi kha kan caah tuah ve dingin kan hal a hau.
Thawngtha, A tuah lai
Khuachia hmanh nih ahodah a si ti a hngalh tiah Thawngtha nih a kan chimhmi kha hngalhter. Jesuh kong hngalh le Khamhtu le Bawipa a simi Jesuh hngalh taktak timi karlak ah aa dannak a um.
Sualnak muihnak le miṭhalo i lihbia chungin kan luatnak hnga Bawipa sinah kan hal maw? Jesuh nih a kan cawnpiakmi thlacamnak, “Kan Pa” tiah kan auhmi kha kan cam i “ṭhatlonak chungin kan luatter” timi biafang kan phak tikah, ṭhatlonak chungin luatter dingin kan hal taktak maw? Kan tuah kho i A tuah kho.