
Pathian hmai cuanh in karhlaan khawh i zuam ko usih

2026 Nov 20, nihin ni hna zongah RVA program hmangin Pathian thawngṭhabia hrawmṭinak caanṭha a kan zaangfah ṭhan tu kan biakmi kan Pathian a min ka thangṭhat.
Thawngṭha a rak ngai i thazaang a kan petu, chungkhar pumpak nan zate Bawi Khrih min in nan kut kan tlaih hna. Kan Bawipa Jesuh Khrih nih thluachuah in pe hna seh tiah thlaza kan campiak hna.
Nihin hi i rel dingin Khrihfa Bupi nih a kan timhpiak mi Luke 19:45-48 tiang; “Jesuh cu Biakinn chungah a vung lut i chawdawr pawl kha a ṭhawl hna i Cathiang chungah Pathian nih ka inn cu thlacamnak inn a si lai a ti tiah aa ṭial. Sihmanhsehlaw nannih nihcun mifir thuhnak kua ah nan ser cang hna a ti hna. Jesuh nih Biakinn ahkhan nifa tein a cawnpiak hna. Tlangbawi upa pawl hna le phungbia cawnpiaktu Saya hna le hruaitu pawl nih khan thah an duh. Sihmanhsehlaw mi vialte nih khan a bia cu an ngaih i pakhat hrelh hmanh kha an duh lo caah annih nih cu tuahnak ding caah cun lam an hmu kho lo. Khrih thawngṭhabia a si. Dawtmi u le nau, nu le pa hna; Jerusalem Biakinnpi cu Biakam hlun ah Pathian a thinlung tiah kan ti khawh mi Isarel miphun nih Pathian an ton i raithawinak an peknak, Pathian an biaknak hmun a si. Sihmanhsehlaw nihin kan relmi thawngṭha chungah kan Bawipa Jesuh Khrih nih mifir thuhnak kua ah nan ser, chaw let chaw hrawlnak hmun ah nan ser hna. Biakinn cu thlacamnak ah nan hman awk a si tiah Cathiang chungah aa ṭial tiah a sik hna.
Duhdawt mi u le nau, nu le pa hna; biaknak i hruaitu upa pawl le nawl ngeitu pawl nihin tlangbawi nih raithawinak an tuah peng, sihmanhsehlaw hruaitu pawl hna nih tlangbawi telh in nawl ngeitu hna nih Biakinn cu zumhnak in thinlung thiang tein Pathian nawlbia zulh in Pathian sinah raithawinak pekchanh tu kha si loin a caan a sau tikah an zumhnak kha cirik a kai, vawlei sui ngun chawva duh tuk nak nih an nunnak kha a tei hna. Biakinn cu chaw let chaw hrawlnak hmun (sipuazi) tuahnak hmun ah an ser.
A pakhatnak ah; Pathian sin i pekchanhnak dingmi tuu, meheh pawl kha biakinn ah an zuar hna, a leng a man nakin tampi in duhfah hakkauhnak in nawl ngeitu hna nih an zuar. Jentail mi tangka in Pathian sinah thawhhlawm pek khawh a si lo i kanmah kan tangka lawngin a si tiah an ti i tangka thlennak an tuah i a let tampi a miak laak in tangka thlennak an tuah. Pathian biak ding raithawinak ah a rak ra mi Isarel mi hna caah santlai in a bawmchantu siloin a eihmuartu dirhmun ah biaknak upa pawl cu an cang. Kan Bawipa Jesuh Khrih nih Pa Pathian thinlung a hngalh I an nun can ning a hmaan lo kha a hmuh tikah Biakinn chungin a ṭhawl dih hna. Duhdawt mi nu le pa u le nau hna; nihin kan relmi Salm 119: 14 ah ‘Chawva tampi ngeih nakin na nawlbia zulh ka duh deuh’ a ti. 72 nak ah ‘na ka pekmi nawlbia cu ka caah vawlei cung tangka vialte nakin a ṭha deuh’ a ti.
Psalm 111 nak ah ‘na nawlbia cu zungzal ka ro an si, ka lung a ka lawmhtertu an si’ tiah nihin kan relmi Salm chungah kan hmuh khawh. An i nuamhnak cu Bawipa nawlbia zulh i Pathian duh ning tein karhlan kha si ti loin tangka an duhtuk ruangah an mit a caw i vawlei sui ngun chawva ruangah zumhnak kha an kaltaak i an zumhnak kha cirik a kai i duhfah hakkauhnak lawngte in an biaknak an khahter, an biaknak mui an chiatter, an biakmi Pathian, zungzal a hmunmi Pathian mui an chiaṭer a si.
Duhdawt mi u le nau nu le pa hna; 1Tim 6 ah ‘Biaknak hi rumnak lam pakhat ah an ruah’ tiah a ti. Relnak 6 ah ‘Biaknak nihhin rumnak a chuahpi taktak, sihmanhsehlaw cu rumnak a ngeimi cu mah tinvo i a lung hna a ngammi kha an si’ a ti. Kan peh rih a si ahcun ‘zeidah vawlei ahhin kan i hun chuahpi, zeihmanh kan i chuahpi lo. Cu bantukin hi vawlei in kan kal tik zongah zeihmanh kan i kalpi kho lai lo, cucaah cun rawl le fenh aih kan ngeih ahcun cucu kan i zat awk a si ko. Rum a duh mi hna cu tukforhnak chungah khan an tla i ṭih a nungmi le ṭhatlonak a chuahter kho tu duhnak nih khan rap foih in a foih hna i cu nihcun rawhralnak ah khan a kalpi hna. Tangka duhnak hi ṭhatlonak a chuahnak hram a si. Mi a cheu cu tangka ngeih an duhtuk caah zumhnak kha an kaltaak i ngaihchiat nak a phunphun an tong’ tiah a kan ti.
Nihin ni ahhin tah nan nunnak kan nunnak ah Pathian inn a simi thiangthlarau inn a simi na takpum le ka takpum hi tah, kan zumhnak hi vawlei sui ngun chawva duhtuk nak ruangah kan zumhnak hi cirik a kai maw, Pathian nawlbia ah aa lawmmi kan si maw, Pathian nih a kan pekmi cu sui ngun chawva hi ro a si lo i a nawlbia hi ro a si. A duh ning tein karhlan i lungthiang tein amah thangṭhat le biak hi cucu Pathian nih a kan tinhpiak mi a nawlbia a hmuitinh cu a si. Cucaah cun Cathiang nih a ti bangin vawlei ah ei awk rawl le fenh aih kan ngeih ahcun a za ko a ti. A hleihluak i ngeih hi a hau maw, a hau lo. Biaknak hi rumnak ah a phakpi tu lam pakhat ah an ruah tiah an ti.
Khrih kan biaknak ahhin vawlei sui ngun chawva tlamtling khitkhet in ngeih naa tim maw, cu a si ahcun Khrih cu sipuazi bantukin na ruah a si. Kan kawl ding a si, kan hawl ding a si, sihmanhsehlaw Pathian duh ningin kan kawl kan hawl a hau i kan zumhnak kha tharchuah lengmang in zumhnak in fakpi in karhlan lengmang ding, a nawlbia ah i lawmh in amah thangṭhatnak ah, amah biaknak ah kan i lawmhnak a tlin awk a si. Sui ngun chawva ah kan i lawmhnak a tlin awk a si lo.
Pathian inn a simi Biakinn kan kal a si zongah, thiangthlarau biakinn a simi kan pum a si zongah thiang tein chiah khawh i zuam hna usih. Kan thinlung in a nawlbia zulh khawh i zuam hna usih. Kan tuah kan ṭuannak in amah lunglawmhter usih. Kawl phunthluk ah (ပါးစပ်က ဘုရားဘုရား လက်က ကားယားကားယား) tiah an ti, hmur le ka cu Pathian Pathian kan ti nain nun in Pathian ral ah a cangmi tampi kan um.
A zum sawhsawh mi si loin biatak tein biaknak lei i hruaitu kan si zongah zei bantuk dirhmun kan si hmanh ah Pathian hmai cuanh tein zumhnak in karhlan khawh i zuam ko usih.
Thazaang petu /- Saya Canute Bawi Kam
